ފާއިތުވި އެއްއަހަރު ދުވަހުގެ ތެރޭ 50 ފުލުހަކަށް ފިޔަވަޅު އަޅައި 20 ފުލުހަކު ވަޒީފައިން ވަކިކޮށްފައިވާ ކަމަށް ކޮމިޝަނާ އޮފް ޕޮލިސް އަލީ ސުޖާއު ވިދާޅުވެއްޖެ އެވެ.
ސީޕީ ވިދާޅުވީ ފާއިތުވި އެއްއަހަރު ދުވަހުގެ ތެރޭގައި ފުލުހުންނަށް ފިޔަވަޅު އަޅަނީ ފުލުހުންނަކީ ތަފާތުއެކި ކަހަލަ ކުށްތަކާ ނުފޫޒުން އެއްކިބާވެފައި ތިބި ބަޔަކަށް ހެދުމުގެ ބޭނުމުގައި ކަމަށެވެ.
ކޮމިޝަނާ ވިދާޅުވީ ފުލުހުންނަށް ފިޔަވަޅު އަޅަމުން ދަނީ އެ އިދާރާގެ ތެރޭގައި އޮންނަ ނިޒާމުގެ ތެރެއިން ކަމަށެވެ. އެއްވެސް ފުލުހަކު އުސޫލުތަކާ ހިލާފަށް މަސައްކަތް ކުރަމުންދާނަމަ އެކަމެއް ބަލައި އެފުލުހަކާ ދޭތެރޭ ފިޔަވަޅު އަޅާނެ ކަމަށްވެސް ވިދާާޅުވި އެވެ.
"އެއްވެސް ފުލުހަކު ގާނޫނާއި ގަވާއިދާ ހިލާފަށް މަސައްކަތް ކުރާނަމަ ފިޔަވަޅު އެޅޭނެ،" ސުޖާއު ވިދާޅުވި އެވެ.
ސީޕީ ވިދާޅުވީ ފުލުހުންގެ މުއައްސަސާއަކީ އެއްވެސް ބާރަކާ ނުފޫޒެއްގެ ދަށުވެގެން މަސައްކަތް ކުރަންޖެހޭނެ ތަނެއްގެ ގޮތުގައި އޮންނަ މުއައްސަސާއެއް ނޫން ކަމަށެވެ. ފުލުހުންގެ މަސައްކަތްތައް ބަލައި މުއައްސަސާ ތަކެއް ހުރުމުން އެ އިދާރާތަކުން އެކަންކަން ކަށަވަރުކުރާނެ ކަމުގައިވެސް ވިދާޅުވި އެވެ.
ޝުޖާއު ވިދާޅުވީ ފުލުހުންގެ މަސައްކަތްތައް ބަލައި ތަހުގީގު ކުރާ މުއައްސަސާތަކަށް އެ އިދާރާ އިން ފުރިހަމައަށް އެއްބާލުން ދޭނެ ކަމަށެވެ.