އުމުރުން 18 އަހަރުން ދަށުގެ އަންހެން ކުއްޖަކަށް މަސްތުވާތަކެތިދީ، އެ ކުއްޖާއަށް ޖިންސީ ގޯނާ ކުރި ކަމަށް ތުހުމަތު ކުރެވޭ، އަހްމަދު ވިއާމްގެ މައްޗަށް ދައުވާ އުފުލައިފި އެވެ.
އެކަމަކު ވިއާމްގެ މައްޗަށް ކުރި ދައުވާތަކުގެ ތަފްސީލެއް އަދި ނުލިބެ އެވެ.
ކުޑަކުދިންނަށް ޖިންސީ ގޯނާ ކުރުމާ ގުޅޭ މައްސަލަތައް އާއްމުކޮށް ކުރިއަށް ގެންދަނީ ކުއްޖާގެ މަސްލަހަތުގައި އާއްމުކޮށް ހުޅުވައި ނުލަ އެވެ. އެހެންކަމުން މި މައްސަލައިގެ ތަފްސީލް ހޯދަން ދަތިވަނީ އެވެ. އެހެންނަމަވެސް ވިއާމްގެ މައްޗަށް ދެ ދައުވާއެއް އުފުލާފައިވާ ކަމަށް ވަނީ މައުލޫމާތު ލިބިފަ އެވެ.
މި މައްސަލައިގައި ވިއާމް އެންމެ ފުރަތަމަ ހައްޔަރުކުރީ ފިލައިގެން އުޅެނިކޮށެވެ. ފުލުހުން އޭރު ވިއާމް ހޯދީ އޭނާގެ ފޮޓޯ އާއްމުކޮށް، އޭނާ ހޯދުމަށް އާއްމުންގެ އެހީތެރިކަމަށް އެދުމަށްފަހު އެވެ.
އޭނާ ހޯދުމަށް އާއްމުންގެ އެހީތެރިކަމަށް އެދުނުތާ މާ ގިނައިރުތަކެއް ނުވަނީސް އޭނާ ހޯދާފައިވެ އެވެ.
ވިއާމް ފިލުވުމަށް އޭރު އެހީތެރިވެދިން އޭނާގެ ރައްޓެއްސަކުވެސް ފުލުހުން ހައްޔަރު ކުރި އެވެ. މައުލޫމާތު ލިބިފައިވާ ގޮތުގައި އެ މީހާގެ މައްޗަށްވެސް ވަނީ ދައުވާ އުފުލާފަ އެވެ.
ވިއާމް ބަންދުކޮށްފައި ހުރުމަށްފަހު އޭނާ ދޫކޮށްލުމުން، ދައުލަތުން އެ މައްސަލަ ހައިކޯޓަށް ހުށަހަޅުމުން އޭނާ ދޫކޮށްލީ ގާނޫނާ ހިލާފަށް ކަމަށް ކަނޑައަޅާފައިވެ އެވެ.