ގދ. ތިނަދޫއަށް ސިޓީއެއްގެ ދަރަޖަ ދިނުމުގައި އޮޅުވާލުންތަކެއް ހުރި ކަމަށް ތުހުމަތުކޮށް އެ މައްސަލަ ބެލުމަށް ލޯކަލް ގަވަމަންޓް އޮތޯރިޓީ (އެލްޖީއޭ) އަށް ހުށަހަޅައިފި އެވެ.
މި މައްސަލަ އެލްޖީއޭއަށް ހުށަހެޅުއްވީ ތިނަދޫއަށް ނިސްބަތްވާ ތިނަދޫ އުތުރު ދާއިރާގެ މެންބަރު ސައުދުﷲ ހިލްމީ އެވެ.
އެލްޖީއޭއަށް ސައުދުﷲ ފޮނުއްވި ސިޓީގައި ވިދާޅުވީ ތިނަދޫ ސިޓީއަކަށް ބަދަލު ކުރުމުގައި ދިވެހި އެތައް ބަޔަކު އިންތިހާއަށް ކަންބޮޑުވާ އަދި ގާނޫނާއި ހިލާފު އެތައް ކަމެއް ހިނގާފައިވާ ކަމަށެވެ.
އެކަމުގެ ސަބަބުން ކުރިއަށް އޮތްތާނގައިވެސް އެފަދަ ކަންކަން ހިނގާފާނެ ކަމަށް ބެލެވޭތީ މަކަރާއި ހީލަތާއި އޮޅުވާލުމާއި އެނޫންވެސް ޖިނާއީ މައްސަލަތައް ކަމަށް ބެލެވޭ މައްސަލަތައް ބެލުމަށް ފުލުހުންނަށް ފޮނުވުމަށާއި މިކަމުގައި ބޮޑެތި ގޯސްތަކެއް ހަދާފައިވާ ކަމަށް އެލްޖީއޭއަށް ފެންނަނަމަ ތިނަދޫ ކައުންސިލާ ދޭތެރޭ ފިޔަވަޅު އެޅުމަށްވެސް ސައުދުﷲ ގެ ސިޓީގައި އެދިފައިވެ އެވެ.
ތިނަދޫއަށް ސިޓީއެއްގެ ދަރަޖަ ދިނުމުގައި އޮޅުވާލުންތަކެއް ހުރި ކަމަށް ތުހުމަތުކުރެވޭތީ އެ މައްސަލަ ބެލުމަށް ސައުދުﷲ ވަނީ ރައްޔިތުންގެ މަޖިލީހަށްވެސް ހުށަހަޅުއްވާފަ އެވެ.
ތިނަދޫއަށް ސިޓީއެއްގެ ދަރަޖަ ދިނުމުގައި ގާނޫނާ ހިލާފު އެތައް ކަމެއް ހިންގާފައި ކަމަށް ބުނެ ތިނަދޫއަށް ސިޓީއެއްގެ ދަރަޖަ ދިނުމަށް ނިންމާފައިވާ ނިންމުން ބާތިލްކުރުމަށް ހައިކޯޓަށް ވަނީ ދުސްތޫރީ މައްސަލައެއް ހުށަހަޅާފަ އެވެ.
މިމައްސަލަ ހައިކޯޓަށް ހުށަހެޅުއްވީ އެންވަޔަރަމަންޓް މިނިސްޓްރީގެ ކުރީގެ ޑެޕިއުޓީ މިނިސްޓަރު އަދި ތިނަދޫއާއި އެންމެ ބޮޑަށް ވާދަކުރާ ގދ. ގައްދޫއަށް ނިސްބަތްވާ ގާނޫނީ ވަކީލް މުހައްމަދު ރާގިބް އެވެ. ޑެޕިއުޓީ މިނިސްޓަރެއްގެ މަގާމުގައި ހުންނަވައިގެން ދައުލަތާ ދެކޮޅަށް ދައުވާކުރުމުން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ރަގީބް މަގާމުންވެސް ވަކިިކުރައްވާފަ އެވެ.
ލާމަރުކަޒީ ގާނޫނު ބުނާ ގޮތުން ސިޓީއެއްގެ ދަރަޖަ ދެވޭނީ އާބާދީގައި 10،000 މީހުން ހިމެނޭ ރަށްތަކަށެވެ.
ތިނަދޫއަށް ސިޓީއެއްގެ ދަރަޖަ ދިނީ މިދިޔަ ރިޔާސީ އިންތިހާބުގެ ކެމްޕޭންގެ އެންމެ ފަހު ދުވަސްކޮޅު އޭރުގެ ރައީސުލްޖުމްހޫރިއްޔާ އަދި އެމްޑީޕީގެ އޭރުގެ ރިޔާސީ ކެންޑިޑޭޓް އިބްރާހީމް މުހައްމަދު ސޯލިހް އެވެ.
ތަފާސްހިސާބުތައް ދައްކާ ގޮތުން އޭރު ތިނަދޫގެ އާބާދީއަކީ 8،000 މީހުންނެވެ. އަދި އޭރު ތިނަދޫގައި ދިރިއުޅެނީ 5،000 އެއްހާ މީހުންނެވެ.