މަތީ ސާނަވީއަށް ކިޔަވައިދޭ އިސްލާމް ޓީޗަރުންނަށް ހާއްސަކޮށްގެން އިސްލާމިކް ފައިނޭންސަށް ހޭލުންތެރިކުރުވުމަށް ހާއްސަ ޕްރޮގްރާމެއް މަރުކަޒީ ބޭންކް -- އެމްއެމްއޭ އިން ފަށައިފި އެވެ.
އެމްއެމްއޭ އާއި އެޑިޔުކޭޝަން މިނިސްޓްރީ އަދި ރާއްޖޭގެ ފައިނޭންޝަލް އިންސްޓިޓިއުޝަންތައް ގުޅިގެން މާލެ ސަރަހައްދުގެ ސްކޫލްތަކުގައި މަތީ ސާނަވީއަށް އިސްލާމް މާއްދާ ކިޔަވައިދޭ މުދައްރިސުންނަށް އަމާޒުކޮށްގެން ކުރިއަށް ގެންދިޔަ މި ޕްރޮގްރާމްގެ ނަމަކީ "ޕްރެކްޓިކަލް އިންސައިޓްސް: އިސްލާމިކް ފައިނޭންސް ފޯ އެޑިއުކޭޓާސް"އެވެ.
މި ސެޝަންގެ މަގުސަދަކީ ކިޔަވައިދިނުމުގައި ރާއްޖޭގެ ކޮންޓެކްސްޓަށް ގުޅޭނޭހެން ރާއްޖޭގައި އިސްލާމިކް ފައިނޭންސިން ފޯރުކޮށްދެމުންދާ އިންސްޓިޓިއުޝަންތަކުންދޭ ހިދުމަތްތަކާއި ހިދުމަތް ފޯރުކޮށްދިނުމުގައި އަމަލުކުރާ ކަންތައްތައް މުދައްރިސުންނަށް ކިޔައިދީ އެ މުދައްރިސުންގެ ފަރާތުން ދަރިވަރުންނަށް ރާއްޖޭގައި އިސްލާމިކް ފައިނޭންސާ ގުޅޭ އެންމެ އަދާހަމަ އަދި ރަނގަޅު މައުލޫމާތު ފޯރުވައިދިނުމެވެ.
މި ޕްރޮގްރާމްގައި ވާހަކަ ދައްވަމުން އެމްއެމްއޭގެ ގަވަރުނަރު އަހްމަދު މުނައްވަރު ވިދާޅުވީ އިސްލާމިކް ފައިނޭންސިން ރާއްޖޭގައި ކުރިއެރުވުމަށް ވަރަށް ބޮޑު އަހަންމިއްޔަތު ކަމެއް ދެއްވާ ކަމަށާއި މިހާރު އެންމެ ބޮޑަށް މަސައްކަތް ކުރަންވީ އިސްލާމިކް ފައިނޭންސަށް ހޭލުންތެރިކަން އިތުރުކުރުން ކަމަށެވެ.
"ސްކޫލް ނިންމާ ދަރިވަރުންނަށް މި މައުލޫމާތު އެނގުން ވަރަށް މުހިއްމު،" ގަވަރުނަރު ވިދާޅުވި އެެވެ.
މި ސެޝަންގައި އިސްލާމިކް ބޭންކިން އާއި ކޮންވެންޝަނަލް ބޭންކިން އަދި އިންޝުއަރެންސް އަދި ތަކާފުލްގެ ތަފާތު ކިޔައިދީ ރާއްޖޭގައި އެ ހިދުމަތްތައް ފޯރުކޮށްދެމުންދާ ގޮތްތައް ޓީޗަރުންނަށް ވަނީ އޮޅުން ފިލުވައިދީފަ އެވެ.