ދިވެހިރާއްޖެއިން އަބަދުވެސް އިންސާނީ ހައްގުތަކުގެ އުސޫލުތައް ނަގަހައްޓައި، ދަމަހައްޓާނެކަމުގެ ޔަގީންކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދެއްވައިފި އެވެ.
ބައިނަލްއަގްވާމީ އިންސާނީ ހައްގުތަކުގެ ދުވަހުގެ މުނާސަބަތުގައި "އެކްސް"ގައި ކުރެއްވި ޕޯސްޓެއްގައި ރައީސް ވިދާޅުވީ އަޅުގަނޑުމެންގެ ހައްގުތަކަކީ ގުޅިލާމެހިފައިވާ ހައްގުތަކެއްކަން ހަނދާންކުރަންޖެހޭ ކަމަށެވެ.
ރައީސް އިތުރަށް ވިދާޅުވީ ޑިމޮކްރަސީގެ މައިގަނޑު އަސާސަކީ ކަރާމާތާއި ހަމަހަމަކަމާއި އަދުލު އިންސާފު ގާއިމުކުރުން ކަމުގައި ވާހިނދު އެފަދަ މުޖުތަމައެއް ބިނާކުރުމުގައި ރާއްޖެ ދެމިއޮންނާނެ ކަމަށެވެ.
ރާއްޖެއަކީ ޖިއޮގްރަފީ ގޮތުން ތަފާތު، ހާއްސަ ކަމެއް ލިބިފައިވާ ގައުމެއް ކަމަށްވާތީ، ރާއްޖޭގެ ވެއްޓަށް ފެތޭ ގޮތަށް ސިއްހީ ހިދުމަތާއި، ތައުލީމާއި، އަދުލުއިންސާފުގެ ހަމަހަމަކަން ލިބޭނެ އިންތިޒާމު ހަމަޖެއްސޭނެ ސިޔާސަތުތަކާއި ގާނޫނުތައް އެކުލަވާލައި، އެންމެންގެ ޝާމިލުވުމާއި ބައިވެރިވުން އެކުލެވޭ، ސުލްހަވެރި، މުޖުތަމައެއް ބިނާކުރުމަށް މި ސަރުކާރުން މަސައްކަތް ކުރަމުންދާ ކަމަށްވެސް ރައީސް ވިދާޅުވި އެވެ.
ރައީސް އިތުރަށް ވިދާޅުވީ ނޫސްވެރިކަމުގެ މިނިވަންކަމާއި، މަސައްކަތްތެރިންގެ ހައްގުތަކާއި، މިންތީގެ ހަމަހަމަކަމާއި، އަންނަން އޮތް ޖީލުތަކަށް ދެމެހެއްޓެނިވި މާހައުލެއް ގާއިމުކޮށްދިނުމަށް މިސަރުކާރުން މަސައްކަތްތަކެއް ކުރަމުންދާ ކަމަށެވެ.
ކޮންމެ އަހަރެއްގެވެސް ޑިސެމްބަރ 10 ވަނަ ދުވަހަކީ ބައިނަލްއަގްވާމީ ފެންވަރުގައި ފާހަގަކުރާ އިންސާނީ ހައްގުތަކުގެ ދުވަހެވެ.
މިދުވަސް ފާހަގަކުރަން ފެށީ ޑިސެންބަރު 10، 1948 ގައި، އއ އާންމު މަޖިލީހުގެ ޖަލްސާއިން އިންސާނީ ހައްގުތަކުގެ އާންމު ގަރާރު ނުވަތަ "ޔުނިވާސަލް ޑެކްލަރޭޝަން އޮފް ހިއުމަން ރައިޓްސް" (ޔޫޑީއެޗްއާރް) ފާސްކުރުމާ ގުޅިގެންނެވެ.
މިއަހަރުގެ އިންސާނީ ހައްގުތަކުގެ ދުވަހުގެ ޝިއާރަކީ "އަޅުގަނޑުމެންގެ ހައްގުތައް، އަޅުގަނޑުމެންގެ މުސްތަގުބަލު، ހަމަ މިހާރު" އެވެ.