އެމްޑީޕީ އިން ކުރިއަށް ގެންދާ އިހްތިޖާޖު ކުރުންތައް މުޅި ރާއްޖެއަށް ފަތުރާލައިގެން ކުރިއަށް ގެންދިއުމަށް އެ ޕާޓީން ނިންމައިފި އެވެ.
އެމްޑީޕީ އިން އެގޮތަށް ނިންމީ "ގާނޫނުއަސާސީގެ ދިފާއުގައި" އެ ޕާޓީން މިހާރު ކާނިވާ ސަރަހައްދުގައި ކުރިއަށް ގެންދާ ޖަލްސާގެ ކުރިން ބޭއްވި އެ ޕާޓީގެ ގައުމީ މަޖިލީހުގެ ބައްދަލުވުމަށް ހުށަހެޅި ގަރާރެއް ފާސްކޮށްގެންނެވެ.
ގައުމީ މަޖިލީހަށް ހުށަހެޅި ގަރާރުގައި ވަނީ އެ އިހްތިޖާޖުތަކުގައި ސިޔާސީ ޕާޓީތަކާއި މަދަނީ ޖަމިއްޔާތަކާއި އެކަމުގައި ބައިވެރިވާން ބޭނުންވާ ވީހާވެސް ގިނަ ބަޔަކު ބައިވެރިކުރަންވެސް އެދިފަ އެވެ.
އެމްޑީޕީ އިން މުޅި ރާއްޖެއަށް އިހްތިޖާޖުތައް ފުޅާކުރަން ނިންމާފައި މިވަނީ ރައީސް ޑރ. މުހައްމަދު މުއިއްޒުގެ ވެރިކަމަށް އެއް އަހަރުވީއިރު ސަރުކާރުން ރައްޔިތުންނަށް ވީވައުދުތައް ފުއްދުމަށް މަސައްކަތް ކޮށްފައި ނުވާ ކަމަށް ބުނެ އެވެ.
ސަރުކާރުގެ ސިޔާސަތުތަކާއި ވެރިކަން ކުރާ ޕާޓީ ޕީއެންސީގެ މެޖޯރިޓީ އޮތް ރައްޔިތުންގެ މަޖިލީހުން ފާސްކުރާ ގާނޫނުތަކާ ގުޅިގެން އާންމު ދިރިއުޅުމަށް ދަތިވެފައިވާ ކަމަށްވެސް ބުންޏެވެ.
އެމްޑީޕީގެ އިހްތިޖާޖުތައް މުޅި ރާއްޖެއަށް ފުޅާކުރަން ނިންމި ނަމަވެސް އެކަން އަމަލީ ގޮތުން ކުރާނެ ދުވަހެއް އަދި އިހްތިޖާޖުތައް ފުޅާކުރުމަށް ކުރާނެ ކަންކަމުގެ ތަފްސީލް އެމްޑީޕީ އިން ދީފައެއް ނުވެ އެވެ.