އެމެރިކާގެ އިންތިހާބީ ރައީސް ޑޮނަލްޑް ޓްރަމްޕް މަގާމާ ހަވާލުވެވަޑައިގަންނަވާ ރަސްމިއްޔާތު ޖެނުއަރީ 20، 2025 ގައި އޮންނާނެ އެވެ. މި ރަސްމިއްޔާތަށް ގައުމުތަކުގެ ބާރުގަދަ ލީޑަރުންނާއި މަޝްހޫރު ފަންނުވެރިންނަށް ދައުވަތު ދޭނެ އެވެ.
ރިޕޯޓްތައް ބުނާ ގޮތުން ޓްރަމްޕް ހުވާކުރައްވާ ރަސްމިއްޔާތަށް ވަޑައިގެން ދެއްވުން އެދި ޗައިނާގެ ރައީސް، ޝީ ޖިންޕިންއަށް ވަނީ ދައުވަތު އަރުވާފަ އެވެ. އެމެރިކާގެ ނޫސްތަކުން -- އިތުބާރު ހުރި މަސްދަރުތަކާ ހަވަލާދީ މި ހަބަރު ވަނީ ގެނެސްދީފަ އެވެ.
އެމެރިކާގެ ސީބީއެސް ނިއުސްއިން ބުނާ ގޮތުން ޝީ ޖިންޕިންއަށް ޑޮނަލްޑް ޓްރަމްޕް ދައުވަތު އެރުވީ ފާއިތުވި ނޮވެމްބަރުގައި -- ރިޔާސީ އިންތިހާބު ހަމަ ކާމިޔާބުކުރެވުމާ އެކު އެވެ. ނަމަވެސް، ޝީ ޖިންޕިން މި ދައުވަތު ގަބޫލުލުރެއްވިކަން އަދި ކަށަވަރެއް ނުވެ އެވެ.
ޗައިނާގެ ރައީސަށް ޓްރަމްޕް ދައުވަތު އެރުވި ނަމަވެސް އެމެރިކާ އާއި ޗައިނާއާ ދެމެދު ގުޅުން އެހާ ރަނގަޅެއް ނޫނެވެ.
އެމެރިކާއިން ދުނިޔެވީ ހުރިހާ ކަމެއްގައި ޗައިނާއަށް ނުބައި ތުހުމަތުތައް އަބަދުވެސް ކުރެ އެވެ. މިކަމުގެ ސަބަބުން އަދި ވަކިން ހާއްސަކޮށް އަސްކަރީ ގޮތުން ޓައިވާން ބާރުވެރިކުރުމަށް އެމެރިކާ ގެންގުޅޭ ސިޔާސަތުގެ ސަބަބުން، ޗައިނާއާއި އެމެރިކާއާ ދެމެދު އުދާސްވެފައި އޮންނަތާ ވެސް އަހަރުތަކެއް ވެއްޖެ އެވެ.
އަނެއްކޮޅުން އެމެރިކާއަށް އެތެރެކުރާ ޗައިނާގެ ވިޔަފާރި މުދަލުން ނަގާ ޓެކްސް ބޮޑުކުރުމަކީވެސް އެމެރިކާއާ މެދު ޗައިނާއަށް ހިތްހެޔޮ ނުކުރެވޭ ސަބަބެކެވެ.
އިގުތިސާދީ ގޮތުން ޗައިނާ ހޯދަމުންދާ ކުރިއެރުންތައް އެމެރިކާއަށް ބަލައެއް ނުގަނެވެ އެވެ. އެހެންކަމުން ޗައިނާ ސައިޒު ކުރުމަށްޓަކައި، ޗައިނާގެ ވިޔަފާރި ކުންފުނިތަކަށް ދަތިކުރުމާއި ޗައިނާއަށް ނިސްބަތްވާ ވިޔަފާރި މަރުކާތައް އެމެރިކާގައި މަނާކުރުންވެސް ވަނީ ބޮޑު މައްސަލައަކަށް ވެފަ އެވެ.
ޝީ ޖިންޕިންގެ އިތުރުން ގައުމުތަކުގެ ބާރުގަދަ ސިޔާސީ ލީޑަރުން -- ހަންގޭރީގެ ބޮޑުވަޒީރު ވިކްތަރު އޯބަން ފަދަ ދުނިޔެ ޖެހިލުންވާ ބައެއް ލީޑަރުން، ޓްރަމްޕް ހުވާ ކުރައްވާ ރަސްމިއްޔާތަށް ވަޑައިގަންނަވާނެ އެވެ.
މި ރަސްމިއްޔާތަށް ވަޑައިގަންނަވާނެ ލީޑަރުންގެ ނަންތައް އަދި މުޅިން ކަށަވަރު ނުވި ނަމަވެސް މިއީ ސިޔާސީ ބޮޑު އެއްވުމަކަށް ވާނެ އެވެ.