މަސްތުވާތަކެތީގެ މައްސަލައެއްގައި އިންޑިއާ ދެ މީހުން ހައްޔަރުކޮށްފި

ދިވެހިރާއްޖެއަށް މަސްތުވާތަކެތި އެތެރެކޮށް، އޭގެ ވިޔަފާރި ކުރާކަމުގެ ތުހުމަތުގައި އިންޑިއާ ދެ މީހުން ހައްޔަރުކޮށްފި އެވެ.

ރާއްޖެއަށް މަސްތުވާތަކެތި އެތެރެކޮށް، އެ ތަކެތީގެ ވިޔަފާރި ކުރާ ކަމުގެ ތުހުމަތުގައި ހައްޔަރުކޮށްފައިވަނީ ސައްދާމް ހުސައިން ކިޔާ މީހާކާ އެމްޑީ ތަމަންނާ ކިޔާ މީހެކެވެ.

މީގެ ތެރެއިން ސައްދާމުގެ އުމުރަކީ 30 އަހަރެވެ. އަދި ތަމަންނާގެ އުމުރަކީ 31 އަހަރެވެ.

މި ދެ މީހުން ކޯޓަށް ހާޒިރު ކުރުމުން، ދެ މީހުންގެ ބަންދަށްވެސް 10 ދުވަސް ޖަހާފައިވެ އެވެ.

ދެ މީހުންގެ ބަންދު އަމުރު ރިޕޯޓުން އެނގޭ ގޮތުގައި، ދެ މީހުންގެ މައްޗަށް ތުހުމަތު ކުރެވޭ މައްސަލައާއި ގުޅިގެން ހެކި ހުށަހަޅާފައިވެ އެވެ. އަދި ކޮންޓްރޯލް ޑެލިވަރީގެ ލިޔުންތަކާއި ފޮޓޯތައް އަދި ކަސްޓަމްސްގެ ލިޔުންތައްވެސް ކޯޓަށް ހުށަހަޅާފައިވެ އެވެ.