ހައުސިން މިނިސްޓްރީން ޔަގީންކުރަންޖެހޭ ހުރިހާ ކަމެއް ޔަގީންކުރުމަށްފަހު ނޫނީ ބިންވެރިޔާ ސްކީމުގެ ދަށުން އެއްވެސް ގޯއްޗެއް ހުޅުމާލެ އިން ދޫކޮށްފައި ނުވާނެ ކަމަށް އެޗްޑީސީގެ މެނޭޖިން ޑިރެކްޓަރު ފަޒުލް ރަޝީދު ވިދާޅުވެއްޖެ އެވެ.
ފަޒުލް މިހެން ވިދާޅުވެފައި މިވަނީ ފޯޖުކޮށްފައިވާ ލިޔުންތަކެއް ބޭނުންކޮށްގެން ބިންވެރިޔާ ސްކީމުގެ ދަށުން ގޯތި ލިބިފައިވާ ކަމަށް ދައްކައިގެން އެ ގޯތި ތަކުގައި އިމާރާތްކުރުމަށް ބޭނުންވެ އެކަމުގެ ހުއްދައަށް އެދުނު މީހުންގެ ތެރޭގައި ފަޒުލްގެ ބޭބެ ފަޒީލް ރަޝީދުވެސް ހިމެނިފައި ވަނިކޮށެވެ. އެފަދަ ހުއްދައަކަށް އެދުނު ދެވަނަ މީހަކީ އަބްދުލްމަޖީދު މާހިރު އެވެ.
މިމައްސަލަ ފެންމަތިވެ ވަރަށް ބޮޑަށް ހޫނުވުމާ ގުޅިގެން ނޫސްވެރިންނާ މިރޭ ބައްދަލުކުރައްވާ ފަޒުލް ވިދާޅުވީ ބިންވެރިޔާ ސްކީމުގެ ދަށުން ލިބުނު ކަމަށް ބުނާ ގޯތިތަކެއްގައި އިމާރާތް ކުރުމުގެ ހުއްދައަށް އެދުމުން އެ އޮންނަ އުސޫލުން ހައުސިން މިނިސްޓްރީ ތެރެއިން ބޭނުންވާ މައުލޫމާތުތައް ސާފުކުރުމަށް އެޗްޑީސީ އިން އެ މިނިސްޓްރީއަށް މިދިޔަ ޖުލައި 22 ވަނަ ދުވަހު ސިޓީ ފޮނުވާފައިވާނެ ކަމަށެވެ. އެޗްޑީސީގެ ސިޓީއަށް މިނިސްޓްރީން ޖަވާބު ދީފައިވަނީ މިދިޔަ އޯގަސްޓް 15 ވަނަ ދުވަހު އެވެ.
ފަޒުލް ވިދާޅުވި ގޮތުގައި އެޗްޑީސީ އިން މިނިސްޓްރީއަށް ސިޓީ ފޮނުވަންޖެހުނީވެސް އެއް ބިމަކަށް ދެ މީހުން އެދުމުން އެކަން ކަށަވަރުކުރުމުގެ ގޮތުންނެވެ. ސޯޝަލް މީޑިއާގައި ދައުރުވަނީ މައްސަލަ ދިމާވި ދެ ބިމަކާ ގުޅޭ ލިޔުންތައް ކަމަށްވެސް ޔަގީންކޮށްދެއްވި އެވެ. އަދި މިނިސްޓްރީގެ ޖަވާބު ލިބުމާ އެކު ބިމުގެ "ޕާމިޓް" އެޗްޑީސީ އިން ކެންސަލްކުރި ކަމުގައިވެސް ވިދާޅުވި އެވެ
"އަޅުގަނޑުމެން އެއްވެސް ހާލެއްގައި މިނިސްޓްރީ އޮފް ހައުސިން އިން ނާންގާ ފަރާތަކަށް ބިމެއް ހަވާލުކޮށްފައެއް ނުވާނެ،" ފަޒުލް ވިދާޅުވި އެވެ.
ފަޒުލް ވިދާޅުވި ގޮތުގައި ފުރަތަމަ ބިން (20768) އިމާރާތްކުރަން ބޭނުންވެ ހުއްދަ ހޯދުމަށް ހުށަހަޅާފައި އޮތީ މިދިޔަ ޖޫން 30 ވަނަ ދުވަހު އެވެ. ދެވަނަ ބިން (20821) އިމާރާތްކުރަން ބޭނުންވެ ހުއްދަ ހޯދުމަށް ހުށަހަޅާފައި އޮތީ މިދިޔަ ޖޫން 29 ވަނަ ދުވަހު އެވެ.
މިމައްސަލައިގައި އޭނާގެ ބޭބެގެ ނަން ހިމެނިފައި އޮތް ނަމަވެސް މިމައްސަލައިގައި ގޯސްކޮށް ހިނގައިގެން އުޅޭ އެއްވެސް ކަމެއްގައި ފަޒުލްގެ ބައިވެރިވުމެއް ނެތް ކަމަށްވެސް އޭނާ ވިދާޅުވި އެވެ. އެހެންވެ ހަގީގަތާ ހިލާފު ވާހަކަތައް ފަތުރަނީ އަގުވައްޓާލަން ކަމުގައިވެސް ވިދާޅުވި އެވެ. ބޭބެގެ މައްސަލަ ފުލުހަށް ހުށަހަޅާފައި ނުވާނެ ކަމަށާއި ބެލީ މިނިސްޓްރީއާއި ވާހަކަދައްކައިގެން މައްސަލަ ހައްލުކުރަން ކަމަށްވެސް ވިދާޅުވި އެވެ. އަދި މިމައްސަލައިގައި އަމިއްލަ މަސްލަހަތު އިސްކޮށްގެން އެއްވެސް ކަމެއް ކުރައްވާފައި ނުވާނެ ކަމަށްވެސް ވިދާޅުވި އެވެ.
މިމައްސަލަ ތަހުގީގު ކުރުމަށް ފުލުހުން މިއަދު ވަނީ އެޗްޑީސީގެ ހެޑް އޮފީހަށް ވަދެފަ އެވެ. އަދި އޭސީސީ އިން ވެސް ދަނީ މިމައްސަލަ ތަހުގީގު ކުރަމުންނެވެ.
ބިންވެރިޔާ ސްކީމްގެ ދަށުން ހުޅުމާލެ، ގުޅިފަޅު އަދި ގިރާވަރުފަޅުން 9،000 އަށް ވުރެ ގިނަ ގޯތި ހިލޭ ދޭން ނިންމާފަ އެވެ. މީގެތެރެއިން ހުޅުމާލޭގެ ދެވަނަ ފިޔަވަހިން ދޫކުރަންޖެހޭ ހުރިހާ ގޯއްޗެއް މިދިޔަ މަހު ވަނީ އޭގެ ހައްގުވެރިންނާ ހަވާލުކޮށްފަ އެވެ.