ޕާކިސްތާނުގެ ދުރު-ރާސްތާ ބެލިސްޓިކް މިސައިލް ޕްރޮގްރާމާ ގުޅިގެން އެ ގައުމުގެ ދައުލަތުގެ އިދާރާތަކާއި ބައެއް އަމިއްލަ ކުންފުނިތަކާ ދެކޮޅަށް އެމެރިކާ އިން ދަތިކުރުމުގެ އިތުރު ފިޔަވަޅުތަކެއް އަޅައިފި އެވެ.
މި ފިޔަވަޅުތައް އިއުލާން ކުރެއްވި ހާރިޖީ ވުޒާރާގެ ތަރުޖަމާނު މެތިޔު މިލަ އެވެ.
އޭނާ ވިދާޅުވީ ޕާކިސްތާނުގެ ދިފާއީ އިދާރާ -- ނެޝަނަލް ޑިވެލޮޕްމެންޓް ކޮމްޕްލެކްސް (އެންޑީސީ) އާއި އިތުރު ތިން އަމިއްލަ ކުންފުންޏަކާ ދެކޮޅަށް މި ފިޔަވަޅުތައް އަޅާފައިވާ ކަމަށެވެ.
އެމެރިކާގެ މި ނިންމުމާ އެކު އެންޑީސީއާއި އެހެން ބައެއް ކުންފުނިތަކުގެ މުދަލާއި ފައިސާ ހިފެހެއްޓުމަށްވެސް އެމެރިކާއިން ވަނީ ނިންމާފަ އެވެ.
ޕާކިސްތާނުގެ ހާރިޖީ ވުޒާރާ އިން މިކަމާ މެދު ހިތްހަމަނުޖެހުން ފާޅުކޮށް ބުނީ މިއީ ވަކި ކޮޅަކަށް ބުރަވެފައިވާ ހިތާމަވެރި ނިންމުމެއް ކަމަށެވެ.
އެމެރިކާއިން ބުނާ ގޮތުގައި ޕާކިސްތާނުން އުފައްދާ 'ޝާހީން' މަރުކާގެ މިސައިލަކީ ނިއުކްލިޔާ ހަތިޔާރު އުފުލުމުގެ ގާބިލްކަން ލިބިފައިވާ މިސައިލެކެވެ. 'އެޓޮމިކް ސައިންޓިސްޓްސް' ޖަމިއްޔާއިން ބުނާ ގޮތުގައި ޕާކިސްތާނުގައި މިވަގުތު 170އާ ގާތްކުރާ އަދަދަކަށް ނިއުކްލިޔާ ބޮމު ސްޓޮކް ކޮށްފައިވާ ކަމަށް ބެލެވެ އެވެ.
މީގެ އިތުރުން އެމެރިކާއިން ފިޔަވަޅު އެޅި ކުންފުނިތަކުގެ ތެރޭގައި އެފިލިއޭޓްސް އިންޓަނޭޝަނަލް، އަޚްތަރު އެންޑް ސަންސް ޕްރައިވެޓް ލިމިޓެޑް އަދި ރޮކްސައިޑް އެންޓަޕްރައިސަސް ހިމެނެ އެވެ.