ރާއްޖެ އާއި ޗައިނާއާ ދެމެދު ސޮއިކޮށްފައިވާ މިނިވަން ވިޔަފާރީގެ އެއްބަސްވުން -- ފްރީ ޓްރޭޑް އެގްރީމެންޓް (އެފްޓީއޭ) އަށް މިއަދުން ފެށިގެން އަމަލުކުރަން ފަށައިފި އެވެ.
މި އެއްބަސްވުމުގައި ދިވެހި ސަރުކާރާއި ޗައިނާ ސަރުކާރުން ސޮއި ކުރީގެ ރައީސް އަބްދުﷲ ޔާމީންގެ ވެރިކަމުގައި 2014 ވަނަ އަހަރު އެވެ. ނަމަވެސް އޭގެފަހުން އެމްޑީޕީގެ ސަރުކާރުން މި އެއްބަސްވުމަށް އަމަލުކުރުމަށް މަސައްކަތް ކޮށްފައެއް ނުވެ އެވެ.
ޗައިނާ-ރާއްޖެ އެފްޓީއޭއާއެކު ރާއްޖެއަށް ބޮޑެތި ފައިދާތަކެއް ކުރާނެ ކަމަށް ސަރުކާރުން ވަނީ ބުނެފަ އެވެ.
ޗައިނާ-ރާއްޖެ އެފްޓީއޭއާއެކު ލިބޭ ބައެއް ފައިދާތައް
- ޑިއުޓީ މައާފުވެ، 7،000 އަށްވުރެ ގިނަ އައިޓަމް ޗައިނާއަށް އެކްސްޕޯޓް ކުރެވޭނެ،
- ރާއްޖެއިން ޗައިނާއަށް އެކްސްޕޯޓްކުރާ މަހުގެ ހުރިހާ ބާވަތަކުން ޑިއުޓީ މައާފުވުން،
- އިމާރާތް ކުރުމަށް ބޭނުންކުރާ ގާތްގަނޑަކަށް ހުރިހާ ބާވަތަކުން ޑިއުޓީ މާފުވުން،
- އަމިއްލަ މީހުންގެ އުފެއްދުންތައް ޗައިނާއަށް އެކްސްޕޯޓް ކުރުން،
އިކޮނޮމިކް މިނިސްޓްރީން މީގެ ކުރިން ބުނި ގޮތުގައި ޗައިނާ-ރާއްޖެ އެފްޓީއޭއާއެކު ކުދި ވިޔަފާރިތަކާއި ކްރިއޭޓިވް ނުވަތަ އުފެއްދުންތެރި މަސައްކަތްކުރާ މީހުންނަށް ގިނަ ފުރުސަތުތަކެއް ހުޅުވިގެންދާނެ އެވެ. އެ ގޮތުން ތްރީޑީ ޕްރިންޓަރާއި ފޮޓޯގްރަފީ ސާމާނުގެ އިތުރުން ގަހަނާ އުފެއްދުމަށް ބޭނުންކުރާ ސާމާނާއި ލޭބަލް ޕްރިންޓަރުން ޑިއުޓީ މައާފުވާނެ ކަމަށް އިކޮނޮމިކް މިނިސްޓްރީން ވަނީ ބުނެފަ އެވެ.