ވޮޝިންގްޓަންގައި އޮތް އެޓްލާންޓިކް ކައުންސިލްގެ ބައްދަލުވުމެއްގައި އެމެރިކާގެ ސެކްރެޓަރީ އޮފް ސްޓޭޓް އެންތަނީ ބްލިންކެން ތަގުރީރުކުރައްވަނިކޮށް -- ހޯލުތެރޭގައި އަންހެނަކު އަޑުގަދަކޮށް ބްލިންކެން އަކީ ހަނގުރާމައިގެ ކުށްވެރިއެއް ކަަމަށް ގޮވައި އިހުތިޖާޖުކޮށްފި އެވެ.
އޭނާގެ އަޑުގައި ނެތް ތަނަށް ހަޅޭއްލަވައި ބްލިންކެންއާ ދިމާއަށް އޭތި މީި ގޮވައި ވަނީ ޝުއޫރު ފާޅުކޮށްފަ އެވެ. އޭނާ ބުނީ ބްލިންކެން އަކީ ދެ އަތްތިލަ ލެއިން ތެމިފައި ހުރި ފުރޭތައެއް ކަމަށެވެ.
އެޓްލާންޓިކް ކައުންސިލްގައި ބްލިންކެން ވާހަކަދެއްކެވީ މެދުއިރުމައްޗަށް އަލިއަޅުވާލައްވައި ދުނިޔޭގެ ޚާރިޖީ ސިޔާސަތާ ބެހޭ ގޮތުންނެވެ. ބްލިންކެންގެ ހަތަރު އަހަރުގެ ވަޒީރުކަމުގައި، މެދުއިރުމަތި މަސްލަހަތުކުރުމަށް ކުރެވުނު މަސައްލަތްތަކަށް ވެސް އޭނާ އަލިއަޅުވާލެއްވި އެވެ.
އެންތަނީ ބްލިންކެންއަށް ރައްދުކުރި ހަޅޭއްކުގައި އަންހެނާ ގޮވީ، ސެކްރެޓަރީ އޮފް ސްޓޭޓަށް ވުރެ ރަނގަޅު ލަގަބަކީ "ބްލަޑީ ބްލިންކަން -- ސެކްރެޓަރީ އޮފް ޖެނެސައިޑް" ކަމަށެވެ.
"ސެކްރެޓަރީ އޮފް ޖެނަސައިޑް، އަހަރެމެން ކަލެއަކަށް މާފެއް ނުކުރާނަން -- ކަލޭގެ ދެ އަތް ތެމިފައި ތިއޮތީ ކުށެއްނެތް އެތައް ހާސް ބައެއްގެ ލެއިން،" އަންހެނާ ހޯލުން ނެރެގެން ގެންދިޔައިރު ވެސް އޭނާ ދިޔައީ އަޑުގެ ކޮޅަށް ގޮވަމުންނެވެ.
"ނަސްލު ނައްތާލުމާއި. ހަނގުރާމާގައި ކުށްކުރުން ފަދަ ބޮޑެތި ޖަރީމާތައް ފިޔަވައި ކަލޭމެންގެ ފަރާތުން ވާރުތަވާނެ އެކައްޗެއްވެސް ނެތް" ކަމަށް އަންހެނާ ގޮވި އެވެ.
އެންތަނީ ބްލިންކެން މިހާރު ގުނަމުން އެ ދަނީ ވަޒީރުކަމުގެ އެންމެ ފަހުގެ ދުވަސްތަކެވެ. މި ހިނގާ ޖެނުއަރީ 20 ގައި ޑޮނަލްޑް ޓްރަމްޕް އެމެރިކާޣެ ރައީސްކަމާ ހަވާލުވެވަޑައިގަންނަ ހިސާބުން ބްލިންކެންގެ ދައުރު ހަމަވާނެ އެވެ.
ދުނިޔޭގެ ގިނަ ބަޔަކު ގަބޫލުކުރާ ގޮތުގައި އިޒުރޭލުގެ ވެރިން -- ޚާއްސަކޮށް ބޮޑުވަޒީރު ބެންޖަމިން ނަތަންޔާހޫ އާއި އެމެރިކާގެ ރައީސް ޖޯ ބައިޑަން އަދި އެންތަނީ ބްލިންކެން ފަދަ ލީޑަރުންނަކީ ހަނގުރާމައިގެ ކުށްވެރިންނެވެ. މި މީހުން ވަނީ ފަލަސްތީންގެ ނަސްލު ހައްތާލުމަށްޓަކައި، ޖާނާއި މާލުން އިޒުރޭލަށް ވާގިވެރިވެ އެހީތެރިވެދީފަ އެވެ.