ކިޑްނީ ޓްރާންސްޕްލާންޓް ކުރުމަށް ބޭނުންވާ ދިވެހިންނަށް އާސަންދައިގެ ދަށުން ޔުނައިޓެޑް އަރަބް އެމިރޭޓްސް (ޔޫއޭއީ) އިން ހިދުމަތް ލިބޭނެ އިންތިޒާމު ހަމަޖައްސައިފި އެވެ.
ޔޫއޭއީ އަދި ތައިލެންޑް ފަދަ މަތީ ފަންތީގެ ސިއްހީ ހިދުމަތް ދޭ ގައުމުތަކުން ދިވެހިންނަށް ބޭސް ކުރެވޭނެ އިންތިޒާމު ހަމަޖައްސައިދިނުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ.
ރައީސްގެ ވައުދު ފުއްދުމުގެ ގޮތުން އާސަންދަ ކުންފުނިން ވަނީ މިދިޔަ ޑިސެމްބަރު 10 ވަނަ ދުވަހު ދުބާއީގެ ބުރްޖީލް މެޑިކަލް ސިޓީ އާއި ބެންކޮކްގެ ވޯލްޑް މެޑިކަލް ހޮސްޕިޓަލް އަދި ބެންކޮކް ހޮސްޕިޓަލާ އެކު އެއްބަސްވުމެއްގައި ސޮއިކޮށްފަ އެވެ. މި އެއްބަސްވުމުގެ ދަށުން ހިދުމަތް ދިނުމަށް އެއްބަސްވެފައި އޮތީ މިއަދުން ފެށިގެންނެވެ.
ރާއްޖޭގެ ހޮސްޕިޓަލްތަކާއި ކްލިނިކްގެ އިތުރުން ދިވެހިންނަށް މިހާރު އާސަންދައިގެ ހިދުމަތް ލިބެނީ އިންޑިއާ އަދި ސްރީލަންކާގެ ހޮސްޕިޓަލްތަކުންނެވެ.
އާސަންދަ ކުންފުނިން މިއަދު ބުނީ ޔޫއޭއީގައި ކިޑްނީ ޓްރާންސްޕްލާންޓް ކުރުމުގެ ހިދުމަތް ލިބޭނީ އެ ހިދުމަތް ކޮންމެހެން ބޭނުންވެފައިވާ މީހުންގެ ތެރެއިން ފުރުސަތު ލިބިފައި ނުވާ މީހުންނަށް ކަމަށެވެ. ޔޫއޭއީގައި ކިޑްނީ ޓްރާންސްޕްލާންޓް ކުރާނަމަ
ބަލިމީހާ ގެންދަން ބޭނުންވާ ޑޯނާއަށްވެސް ޓިކެޓާއި ހުރުމުގެ ހަރަދު ދިނުމަށް އާސަންދަ އިން ވަނީ ނިންމާފަ އެވެ.
މީގެއިތުރުން ރާއްޖެ، ސްރީލަންކާ އަދި އިންޑިއާގައި ބައްޔަކަށް ބޭސްކުރާތާ އެތައް އަހަރެއްވީއިރުވެސް ސިއްހީ ގޮތުން ކުރިއެރުމެއް ނުލިބޭ ހާލަތުގައި ޑޮކްޓަރުންގެ ހުށަހެޅުމެއް އޮތް ނަމަ އެފަދަ ބަލި މީހުންނަށް ތައިލޭންޑް އަދި ޔޫއޭއީގައި އާސަންދައިގެ ދަށުން ހިދުމަތް ލިބޭނެ ގޮތް ހަމަޖައްސައިދިނުމަށްވެސް އާސަންދަ ކުންފުނިން ވަނީ ނިންމާފަ އެވެ.
އާސަންދަ އިން އިތުރަށް ބުނީ ރާއްޖެ، ސްރީލަންކާ އަދި އިންޑިއާގައިވެސް އާސަންދަ ލިބޭ ގޮތަށް ތައިލެންޑާއި ޔޫއޭއީގައިވެސް އާސަންދަ ހިދުމަތް ލިބޭނީ އެކަމަށް ހަމަޖެހިފައިވާ އާންމު އުސޫލުގެ ތެރެއިން ކަމަށެވެ.