ބޭރު ފައިސާ އިން ލިބޭ އާމްދަނީގެ ބައެއް ދިވެހި ރުފިޔާއަށް މާރުކުރަންޖެހޭ ގޮތަށް ލާޒިމުކޮށް ފާސްކޮށްފައިވާ ގާނޫނާ ގުޅިގެން މަހަކު ގާތްގަނޑަކަށް 40 މިލިއަން ޑޮލަރު މާރުކުރާނެ ކަމަށް ބެލެވޭ އެމްއެމްއޭ އިން ބުނެފި އެވެ.
ބޭރު ފައިސާ އިން ލިބޭ އާމްދަނީ ދިވެހި ރުފިޔާއަށް މާރުކުރަންޖެހޭ ގޮތަށް ހެދި ގާނޫނާ އެކު މިދިޔަ އޮކްޓޫބަރު މަހު ވަނީ އެކަމާ ގުޅޭ ގަވައިދުވެސް ހަދާފަ އެވެ.
ގާނޫނަަށް އަމަލުކުރަން ފަށާނީ މިމަހުގެ 28 ވަނަ ދުވަހުން ފެށިގެންނެވެ.
ގަވައިދުގެ ދަށުން އޮކްޓޫބަރު މަހުގެ ސޭލްސްއަށް ބަލައި އެމްއެމްއޭ އިން ލަފާކޮށްފައިވަނީ އެ މަހުގެ ތެރޭގައި އެކަނިވެސް ގާތްގަނޑަކަށް 40 މިލިއަން ޑޮލަރު މާރުކުރާނެ ކަމަށެވެ. އެެހެންކަމަށްވާނަމަ އެއީ އެއީ ގާތްގަނޑަކަށް 617 މިލިއަން ރުފިޔާ އެވެ.
ގާނޫނާއި ގަވައިދު އޮތް ގޮތުން ރާއްޖޭގެ ރިސޯޓުތަކަށް އަންނަ ކޮންމެ ފަތުރުވެރިއެއްގެ ބޮލަކށް 500 ޑޮލަރު މާރުކުރަން ޖެހެ އެވެ. އަދި ގެސްޓް ހައުސްތަކަށް އަންނަ ކޮންމެ ފަތުރުވެރިޔަކު 25 ޑޮލަރު މާރުކުރަންޖެހެ އެވެ.
ރާއްޖޭގައި 175 ރިސޯޓް ހިންގަމުންދާއިރު 138 ރިސޯޓްގެ އޮކްޓޫބަރު މަހުގެ ސޭލްސް ރިޕޯޓް އެމްއެމްއޭ އަށް ލިބިފައިވެ އެވެ. އަދި 37 ރިސޯޓްގެ އެ މައުލޫމާތު ނުލިބި އޮތް ކަމަށްވެސް ބުނެ އެވެ.
