މިއަދު ޗައިނާގެ ވެރިރަށް ބެއިޖިންއަށް ކުރި ދަތުރުގައި މޯލްޑިވިއަން އެއަރލައިންސްގެ އަލަށް ގެނައި ވައިޑްބޮޑީ މަތިންދާބޯޓުން 252 ފަސެންޖަރުން ރާއްޖެއަށް ޒިޔާރަތްކޮށްފި އެވެ.
މިއީ މޯލްޑިވިއަންގެ އޭ 330-200 ގެ ވައިޑްބޮޑީ މަތިންދާ ބޯޓު ރާއްޖެއިން ބޭރަށް ކުރާ ދެވަނަ ދަތުރެވެ.
މޯލްޑިވިއަންގެ މި އައު ވައިޑް-ބޮޑީ މަތިންދާބޯޓު ރާއްޖެ ގެނެސްފައިވަނީ މިމަހުގެ 6 ވަނަ ދުވަހުއެވެ. އެ ބޯޓު ރާއްޖެ ގެނައިފަހުން އެންމެ ފުރަތަމަ ދަތުރެއް ކޮށްފައިވަނީ ޗައިނާގެ ޗަންގްޑޫ އަށެވެ. މިހާރު މޯލްޑިވިއަން އިން ވަނީ ޗައިނާގެ ޗަންގްޑޫ އަދި ބެއިޖިންއަށް ދަތުރުތައް ފަށާފައެވެ.
މީގެ އިތުރުން، މިމަހުގެ 27 ވަނަ ދުވަހު ޗައިނާގެ ޝެންހާއީއަށްވެސް ދަތުރުތައް ފެށުމަށް ވަނީ ހަމަޖެހިފައެވެ. މި ދަތުރުތަކުގައި ކޮންމެ ސިޓީއަކަށް ހަފުތާއަކު އެއް ދަތުރު ކުރުމަށް ވަނީ ހަމަޖެހިފައެވެ.
މި ވައިޑް-ބޮޑީ މަތިންދާބޯޓަކީ ވައިގެ ބަނދަރެއްގައި ޖެއްސުމަކާ ނުލާ 13،000 ކިލޯމީޓަރުގެ ރާސްތާއަކަށް ސީދާ ދަތުރުކުރުމުގެ ޤާބިލްކަން ލިބިފައިވާ މަތިންދާ ބޯޓެކެވެ. މި ބޯޓުގައި ބިޒްނަސް ކްލާހުގައި 18 ގޮނޑިއާއި، ޕްރިމިއަމް އިކޮނޮމީގައި 36 ގޮނޑިއާއި އިކޮނޮމީ ކުލާހުގައި 210 ގޮނޑި ހިމެނެ އެވެ.
މި އައު ވައިޑް-ބޮޑީ މަތިންދާބޯޓާއެކު މޯލްޑިވިއަން އެއަރލައިންސްއަށް ދުރު މަންޒިލްތަކަށް ދަތުރުކުރުމުގެ ޤާބިލްކަން އިތުރުވެ، ޚާއްޞަކޮށް ޗައިނާގެ އެކި ސިޓީތަކަށް ދަތުރުކުރުމުގެ ފުރުޞަތު ފަހިވެގެން ގޮސްފައިވާކަން ފާހަގަކުރެވެ އެވެ.
