ގޯލްޑަން ފުޓްސަލް ޗެލެންޖު 2025ގެ ޒޯނު ފައިނަލްތައް މިރޭ ފެށުމަށް ތައްޔާރުވެއްޖެ އެވެ. މިރޭ ކުޅުމަށް ހަމަޖެހިފައިވާ ހަތަރު މެޗަކީ ވެސް ވަރަށް ފޯރިގަދަވާނެ މެޗުތަކެއް ކަމަށް ލަފާކުރެވެ އެވެ.
ފުރަތަމަ ދެ މެޗު ފަށާނީ މިރޭ 8:00 ގައެވެ. މި މެޗުގައި ޒޯން 6 އިން ތ. ތިމަރަފުށި އާއި ލ. ގަން ބައްދަލުކުރާއިރު، ޒޯން 8 ފައިނަލުގައި ވިލިމާލެ އާއި މައްޗަންގޯޅި ބައްދަލުކުރާނެ އެވެ. އަދި ދެވަނަ ބުރުގެ މެޗުތައް ފެށުމަށް ހަމަޖެހިފައިވަނީ މިރޭ 10:00 ގައެވެ. މި މެޗުގައި ޒޯން 3ގެ ބަ. އޭދަފުށްޓާއި ކ. ކާށިދޫ ބައްދަލުކުރާއިރު، ޒޯން 5ގެ ފައިނަލްގައި ފ. ދަރަނބޫދޫ އާއި ދ. ކުޑަހުވަދޫ ބައްދަލުކުރާނެ އެވެ.
ޒޯން 6 ފައިނަލުގައި މިދިޔަ އަހަރުގެ ޒޯން ޗެމްޕިއަނުން ކަމަށްވާ ގަން، ތިމަރަފުށްޓާ ބައްދަލުކުރާއިރު މިއީ މިދިޔަ އަހަރުގެ ފައިނަލުގެ ރީމެޗެކެވެ. އޭރު ގަމުން ވަނީ ތިމަރަފުށި 2-1 އިން ބަލިކޮށްފަ އެވެ.
ޒޯން ބުރުގައި މިދެ ޓީމު ބައްދަލުކުރި މެޗުގައިވެސް ގަމު ވަނީ 1-0 އިން މޮޅުވެފަ އެވެ. ގަމަކީ މި މުބާރާތުން އެއް ފަހަރު ތަށި އަދި ދެ ފަހަރު ޝީލްޑް ހޯދާފައިވާ ޓީމެކެވެ. އަދި ތިމަރަފުށިން ވަނީ ތިން ފަހަރު މުބާރާތުގެ ތަށި ހޯދާފަ އެވެ.
ޒޯން 8 ފައިނަލުގައި މިދިޔަ އަހަރުގެ ސެމީ ފައިނަލިސްޓުން ކަމަށްވާ ވިލިމާލެ ބައްދަލުކުރާނީ މައްޗަންގޯޅިއާއެވެ. ޒޯން ބުރުގައި ވިލިމާލޭން ވަނީ މައްޗަންގޯޅި 7-1 އިން ބަލިކޮށްފަ އެވެ. މިއީ ވިލިމާލެއަށް ރީތި ނަތީޖާއެއް ހޯދުމުގެ ފުރުސަތެކެވެ. މިދިޔަ އަހަރު ވިލިމާލެ ޒޯން ފައިނަލުން ވަކިވެފައިވަނީ މާފަންނާ އެކު ޕެނަލްޓީ ޖަހައިގެން 7-6 އިން ބަލިވެގެންނެވެ.
ޒޯން 3 ގައި މުބާރާތުގެ އެންމެ ފަހުގެ ޗެމްޕިއަނުން ކަމަށްވާ އޭދަފުށި ކުޅޭނީ ކާށިދޫއާ ދެކޮޅަށެވެ. މިއީ މިދިޔަ ތިން އަހަރުގެ ތެރޭގައި މިދެ ޓީމު ބައްދަލުކުރާ ތިންވަނަ ފަހަރެވެ. ޒޯން ބުރުގައި އޭދަފުށިން ވަނީ ކާށިދޫ 7-4 އިން ބަލިކޮށްފަ އެވެ. އަދި މިދިޔަ އަހަރު އޭދަފުށިން ވަނީ ކާށިދޫ 3-0 އިން ބަލިކޮށްފަ އެވެ.
ޒޯން 5 ފައިނަލުގައި މިދިޔަ އަހަރުގެ ޒޯން ޗެމްޕިއަނުން ކަމަށްވާ ކުޑަހުވަދޫ ބައްދަލުކުރާނީ ފ. އަތޮޅު ޗެމްޕިއަން ދަރަނބޫދޫއާ އެވެ. ޒޯން ލީގު ބުރުގައި ކުޑަހުވަދޫން ވަނީ ދަރަނބޫދޫ 6-2 އިން ބަލިކޮށްފަ އެވެ. މިއީ ދަރަނބޫދޫ ޒޯން ބުރުގައި ވާދަކުރާ ފުރަތަމަ ފަހަރެވެ. އަދި އެޓީމު އަތޮޅު ބުރުން ޗެމްޕިއަންކަން ހޯދާފައިވަނީ ވެސް މުޅިން އަލަށެވެ.
