އޮލިމްޕިކް ކޮމިޓީ (އެމްއޯސީ) އަށް މި އަހަރަށް 63 މިލިއަން ރުފިޔާގެ ބަޖެޓެއް ރޭ ބޭއްވި ޖަލްސާއެއްގައި ފާސްކޮށްފި އެވެ.
މީރުމާ ހޮޓެލްގެ ކާނިމާ މާލަމްގައި ބޭއްވި އެމްއޯސީގެ ކޮންގްރެސްގައި ފާސްކުރެވުނު މި ބަޖެޓްގެ އެންމެ ބޮޑު ސްޕޮންސަރަކީ ދިވެހި ސަރުކާރެވެ.
އެމްއޯސީގެ ސެކްރެޓަރީ ޖެނެރަލް އަހްމަދު ތަމޫހް ސައީދު ވިދާޅުވީ ބޭރުގެ ގޭމްސްތަކަށް ކުރާ ހަރަދުގެ އިތުރުން ބައެއް އެހެނިހެން ޕްރޮޖެކްޓްތަކަށް ސަރުކާރުން ހާއްސަ ބަޖެޓް ސަޕޯޓެއް ދޭނެ ކަމަށެވެ.
ފާސްކުރެވުނު ބަޖެޓްގެ ބޮޑު ބައި ހޭދަކުރާނީ ރާއްޖެއިން މި އަހަރު ބައިވެރިވާ އިންޓަނޭޝަނަލް ގޭމްސްތަކަށެވެ. މީގެތެރޭގައި ޕާކިސްތާނުގައި ބާއްވަން ހަމަޖެހިފައިވާ ސައުތު އޭޝިއަން ގޭމްސް ހިމެނެ އެވެ. ނަމަވެސް އެކި ފަހަރު މަތިން ފަސްކުރަމުން ދިޔަ މި ގޭމްސް ބާއްވާނެ ވަކި ތާރީހެއް އަދިވެސް ޕާކިސްތާނުން އިއުލާނުކޮށްފައެއް ނުވެއެވެ.
މައުލޫމާތު ލިބިފައިވާ ގޮތުގައި މި އަހަރު އެ ގޭމްސް ޕާކިސްތާނުގައި ނުބޭއްވިއްޖެނަމަ، އެ ފުރުސަތު ޕާކިސްތާނުގެ އަތުން ވަގުތީގޮތުން ނެގިގެން ހިނގައިދާނެ އެވެ.
