(20 ފެބްރުއަރީ 2025 އާ ގުޅޭ)
ސިޓިންރޫމަށް އައިސް ސޯފާގައި އިށީންނަން އުޅުނު ވާކިފްގެ ހަރަކާތްތައް މަޑުޖެހުނެވެ. އޭނާގެ ލޮލުގައި އަޅައިގަތީ ކުޑަދޮރު ކައިރީ ފާރުގައި ޖައްސާފައި ހުރި ކެބިނެޓްގެ މަތީ ބަހައްޓާފައިވާ ގަހެވެ. ހުދުކުލައިގެ މާތަކެއް އަޅާފައި އެ ގަހަކީ އެ ގޭތެރެއިން ކުރީން ފެނުނު މަންޒަރެއް ނޫނެވެ. އަނެއްކޮޅުން ރަހާއަކީ ގަސް ގެންގުޅޭން ލޯބިކުރާ އަންހެނެއްނޫންކަން ވާކިފްއަށް އެނގެ އެވެ.
"ރަހާ." ވާކިފަށް ގޮވާލެވުނީ ނިކަން ބާރަށެވެ.
ބަދިގޭގައި ހުރެފައި ސިޓިންރޫމަށް ރަހާ ބޯދިއްކޮށްލީ ސުވާލު އުފެދިފައި ހުރެ އެވެ. ވާކިފް ގޮވާލިލެއް ބާރުކަމުންނެވެ. އޭރު ވާކިފް އައިސް ހުއްޓިލީ ކެބިނެޓް މަތީ ބަހައްޓާފައި ހުރި ގަސް ކުރިމަތީ އެވެ. ކިހިނެއްކަންވީ ލަފާކޮށްލަން ރަހާއަށް އެނގުނެވެ.
"ކޮންއިރަކު ހޯދި ގަހެއް؟." ވާކިފް ސުވާލުކުރި އެވެ.
"ގަސް ހެއްދުމާއި މަލަކީ ރަހާއަށް ކަމުދާ އެއްޗެއްނޫނެއްނު." ވާކިފްއަށް ރަހާގެ ގޮތް އެނގެޔޭ ބުނާ ފަދައަކުން ބުނެލި އެވެ.
"އެއީ... ފްރެންޑެއް ދިން އެއްޗެއް. ދިނީމަ ނުހިފާ ނުކެރުނީ. ހައްދަން އެހާ އުނދަގުލެއްނުވާނޭ ވެސް ބުނި. ހިތަށް އެރީ ޓްރައިކޮށްލާނީއޭ." ހަޤީޤަތުގެ އެއްބައި ފޮރުވަމުން ވާހަކަދައްކަން ޖެހުނީތީ ރަހާ ވާހަކަދައްކަމުން ބަދިގެއަށް ވަނީ ވާކިފަށް ނުބަލާން ވެގެންނެވެ. އޭރު އޭނާގެ ފަހަތުން ވާކިފް އައެވެ.
"ކޮންފްރެންޑެއް؟." ވާކިފް އަހާލި އެވެ. ނަމަވެސް ރަހާ ކުރަން ހުރި މަސައްކަތް ކުރަމުން ދިޔައީ ވާކިފް ބުނި އެއްޗެއް އަޑު ނީވުނު ފަދައިންނެވެ. އެހެންވެ އިރުކޮޅަކު މަޑުކޮށްލާފައި އަނެއްކާ ވެސް ވާކިފް ވާހަކަދެއްކި އެވެ.
"އެއީ ކޮންފްރެންޑެއް؟. އަހަރެންނަށް އެނގޭނެތަ؟. ކޮންތާކުން ދިމާވީ؟" މިފަހަރު ވާކިފްގެ ސުވާލުތައް ގިނަވި އެވެ. ދެން ވެސް ރަހާގެ ފަރާތުން ޖަވާބެއްނަ އެވެ.
"ރަހާއާއޭ މަ މި ވާހަކަދައްކަނީ." ކުއްލިއަކަށް ރަހާގެ ކަނާއަތުގައި ހިފައި ވާކިފާ ދިމާއަށް އަނބުރާލަމުން އޭނާއަށް ބުނެވުނީ ތަންކޮޅެއް ބާރަށެވެ. އޭރު ވާކިފްގެ މޫނުމަތިން ހިތްހަމަނުޖެހުން ފާޅުވޭވޭ ހުއްޓެވެ. ރަހާގެ އަތުގައި އޮތް ޕާންފޮތި ތަޅުންމައްޗަށް ވެއްޓުނެވެ. ވާކިފަށް ނަޒަރު ހުއްޓުނު އިރު ރަހާގެ ދެ ލޮލުން ވެސް ފާޅުވާން ހުރީ ހިތްހަމަނުޖެހުމެވެ. އޭނާއަށް ވަގުތުން ދެބުމަ ކައިރިކޮށްލެވުނީ އެވެ.
"ބޭރުތެރޭގައި ވާކިފް ކިތަންމެ އިރަކު އުޅުނަސް އަހަރެން އެއްޗެކޭ ބުނަންތަ؟. ދަނީ ކޮންކޮންތާކަށްކަމެއް ބައްދަލުކޮށް ގުޅުން އުފައްދަނީ ކޮންބަޔާކަން އަހަރެން ކައިރީ ވާކިފް ބުނަންތަ؟. އުފާކުރުމާއި ހިތްހަމަޖެއްސުމަކީ ހަމައެކަނި ވާކިފަށް އޮންނަ ކަމެއްތަ؟. އަހަރެން އާ ރައްޓެހިން ހޯދައިގެން ނުވަނީތަ؟." ރަހާއަށް ވާހަކަދެއްކުނީ މީގެ ކުރީން ވާހަކަނުދައްކާހާ ބާރަށެވެ. ހީވީ އެތައް އަހަރެއްގެ ބަންދުވެފައި ހުރި އުދާސްތަކެއް ރަހާ ބޭރުކޮށްލީ ހެންނެވެ.
"ކީކޭ ކިޔަން ރަހާ ތިއުޅެނީ؟. އަހަރެން ބޭރުތެރޭގައި މަޖާނެގުމުގައިތަ މިއުޅެނީ؟. ނޭނގޭތަ މިހިސާބަށް އާދެވިފަ މި ތިބީ ކިހާ ބުރަކޮށް އަހަރެން މަސައްކަތްކޮށްގެން ކަމެއް. ރަހާއަށް ހުރިހާ އުފަލެއް ހޯދައިދޭކަށް ނޫންތަ އަހަރެން މި މަސައްކަތް ކުރަނީ... ގޭގައި އިނދެގެން ތީ ދޯ އަހަރެންނާ މެދު ވިސްނާ ގޮތަކީ." ވާކިފަށް ވަގުތުން ރުޅި އާދެވުނީ އެވެ. އެހެންނަމަވެސް އޭނާއަށް ހައިރާންކަމެއް ގެނުވީ ރަހާ ހީނލި ގޮތެވެ. އެ ހީނލުމުގައި މަލާމާތް އެކުލެވިފައިވާހެން ވާކިފަށް ފާހަގަވީ އެވެ.
"އަހަރެންގެ ކަންކަން ބަލަހައްޓަންތަ ވާކިފް ތިހާ ބުރަކޮށް ތިއުޅެނީ؟. ބަލަ ވާކިފް ހަނދާންނެތުނީތަ ތި ބިޒްނަސް ފެށުމުގައި އަހަރެން އެހީވީވަރު. އަހަރެން ވަޒީފާއަށް ނުކުތުން ހުއްޓާލީ ވާކިފް ބުނެގެން ދޯ. އެހެންނޫނަސް ކުންފުނީގެ ތާޓީ ޕަސެންޓް ޚިއްޞާދާރެއް އަހަރެންމީ. އެވަރުން އަހަރެންގެ ޚަރަދުތައް ނުބެލެހެއްޓޭނޭ ހީވޭތަ. މި ގެއަކީ ވެސް ދެ މީހުންގެ ލާރީގައި ދެ މީހުންގެ ނަމުގައި ގަނެފައި އޮތް ގެއެއް. މި ގެއިން ލިބޭ ކުލިން ވެސް އަހަރެންނަށް ބައެއް ލިބޭނެ. އަހަރެން ކަމެއްނެތިފައި ގޭގައި ހުންނާތީ ވާކިފަށް ހީވީތަ އަހަރެންނަށް ބޭނުންހާ ގޮތެއް ހެދިދާނޭ. ޔޫ އާ ނޮޓް މައި ޝުގަރ ޑެޑީ... ރެޔާއި ދުވާލު މަސައްކަތުގައި ތިއުޅެނީ އަހަރެންނަށް ޓަކައެއް ނޫން. އެހެން ހީކުރެވެންޏާ ދެއާޒް ސަމްތިންގ ރޯންގ ވިތް ޔޯ ބްރެއިން." ރަހާގެ ދުލުގައި ވެސް ހިފެހެއްޓުމެއް މިއަދު ނެތް ކަހަލަ އެވެ. ދުވަހަކުވެސް ވާކިފާ ދިމާއަށް ނުގޮވާ އެއްޗެހި އޭނާއަށް ކިއިއްޖެ އެވެ.
"ވާހަކަ ބަދަލުކޮށްލީ ދޯ. އަހަރެންނަށް ރަހާ ތިފޮރުވާ ކަމެއް އެނގިދާނޭތީ ބިރުގަތީތަ؟. އަހަރެންނަށްވުރެ ރަނގަޅު ގޮތެއް ފެނުނީތަ؟. އެޔެއް ވެސް ނޭނގެ... އަހަރެންނަށް އެނގެނީ މިހާރަކަށް އައިސް ރަހާ ބޭނުންނުވާކަން އަހަރެން ކައިރިވާން ވެސް. ދެން އަނެއްކޮޅުން އެ ގަސް. އިނދެގެން މިހާ ދުވަސްވީރު ރަހާގެ ހޮބީސްތައް އަހަރެންނަށް އެނގިފަ ދޯ ހުންނާނީ. މި ނޫނީ ގަސް ހައްދާ ހިތަކުން ނޫޅޭ. ކޮންމެވެސް ކަމެއް ބަދަލުވީމައެއްނު ކުރީން ނުކުރާ ކަމެއް ކުރާނީ." ވާކިފް ވެސް ހިތުގައި އުފެދުނު ވަހުމްތައް ފޮރުވާކަށް ގަސްދެއް ނުކުރި އެވެ. އަނބިމީހާގެ ބޮލުގައި ނުސީދާކޮށް ނަމަވެސް އެ އެޅުވެނީ ކިހާވަރެއްގެ އިލްޒާމެއްކަން ވާކިފްއަށް އިޙްސާސްނުވާ ކަހަލަ އެވެ.
"ވާކިފްއަށް ގޭގައި އަހަރެންނާއެކު ހޭދަކުރާނޭ ވަގުތު ނުލިބެންޏާ އަހަރެންނަށް ހެޔޮ ގެޔަށް ނަޔަސް. އެކަކުވެސް ސައުވީސްގަޑިއިރު އޮފީހުގައި އުޅޭކަށް ނުޖެހޭނެ. އޮފީހޭ ކިޔައިގެން ތި އުޅޭތަނެއްގައި އުޅޭ. އަހަރެންނަށް ވަރިހަމަ... އަހަރެން އުޅޭ ގޮތާ ބެހޭނެކަމެއްނެތް. އަހަރެން ވެސް ވާކިފްގެ ސުވާލުތަކަށް ޖަވާބުދޭނަން ވާކިފް ތި އޮފީހަކުން އަވަހަށް ގެއަށް އަންނަން ފެށި ދުވަހަކުން. އެހެންނޫނީ ޖަސްޓް ލީވް މީ އެލޯން. އައި ޑޯންޓް ކެއާ އެނީ މޯ. އުޅޭނެވައްތަރަކަށް އުޅޭންވީ." ރަހާގެ ވާހަކަތައް އެ ހިސާބަށް ދިޔަތަނާހެން ވާކިފަށް އަމިއްލަ ނަފްސު ނުހުއްޓުވިގެން އަތް ހިއްލާލެވުނީ ރަހާގެ ކޯތާފަތްމަތީ ޖަހާށެވެ. އެހިނދު ރަހާގެ ދެ ލޯ ވެސް ދިޔައީ ބޮޑުވެގެންނެވެ. ވާކިފް ދުވަހަކުވެސް އޭނާގެ ގައިގާ ޖަހާފައި ނެތެވެ.
"އަހަރެން ގައިގަ ޖަހަންތަ ތިއުޅުނީ؟." ރަހާއަށް މިހެން އަހާލެވުނިއިރު އޭނާގެ ދެ ލޮލުން ކަރުނަ ހިލިއްޖެ އެވެ.
ކުރެވެން އުޅުނު ކަންތައް ވާކިފަށް ރެއަކާލީ ދެނެވެ. ހިއްލާލެވިފައިވާ ކަނާއަތް މުއްކަވާލަމުން ވާކިފް އަތް ތިރިކޮށްލީ އެވެ. އޭނާއަށް ދަތްކުނޑިވިކާލެވުނެވެ. ދެން ހަލުވިކޮށް ރަހާގެ ކައިރިން ދުރަށް އޭނާ ހިނގައިގަތެވެ. އެ ދިޔަ ގޮތަށް ގޮސް އޭނާ ނިދާކޮޓަރިއަށް ވަދެ ދޮރު ޖެހީ އެވެ.
* * * * *
"ވަދޭ." ދޮރުގައި ޓަކި ޖަހާލި އަޑަށް ޑަކްޓަރު ޒަރަކް ބުނެލި އެވެ.
"ހެލޯ ޑަކްޓަރ." އެތެރެއަށް ވަންގޮތަށް ރަހާ ބުންޏެވެ.
"ރަހާ... މިއަދު ކުއްލިއަކަށް އެޕޮއިންމެންޓެއް ހެއްދީ ކިހިނެއްވީ؟. އިއްޔެ ބޭސް ނަގައިގެންތަ ދިޔައީ؟." ޒަރަކް އަހާލި އެވެ. އޭނާ ވެސް ކަންބޮޑުވީ ރަހާގެ ހާލަތު ގޯސްވީއޭ ހީވެ އެވެ. އަނެއްކޮޅުން އެހާ ވިއްސާރަ ދުވަހެކެވެ. ރަހާ ހުރީ ހިސާބަކަށް ތެމިފަ އެވެ. އޭނާ ކުޑައެއްގެ ހިޔާ ހޯދިނަމަ އެވަރަށް ނުތެމޭނެކަން ޒަރަކްއަށް އެނގެ އެވެ.
"ވާރެޔާ ތެމުނީތަ؟. ޓެކްސީއެއް ނުލިބުނު." ޒަރަކްއަށް އަހާލެވުނެވެ.
"މީ... އަސްލު މިއައީ މީތި ރިޓާންކޮށްލަން. އެޕޮއިންމެންޓެއް ނުހައްދާ ޑަކްޓަރއާ މީޓުނުވެދާނެތީ." ރަހާގެ އަތުގައި އޮތް ކޮތަޅު ޒަރަކްއަށް ދިއްކޮށްލި އެވެ. އޭގައި ޒަރަކް ހިފިއިރު ކޮތަޅުގައި އޮތީ ކުރީން ދުވަހު އޭނާ ރަހާއަށް ދިން ގަހެވެ.
"މިއޮއް ވިއްސާރައިގައި މީތި ދޭން ތިއައީ. އިޓްސް އޮންލީ އަ ޕޮޓެޑް ޕްލާންޓް. ރަހާ ރިޓާން ކުރާން ދިން އެއްޗެއްނޫން." ޒަރަކް ނިކަން އަވަހަށް ބުންޏެވެ.
"މި ގަހަށް ބަލާލީމަ އެނގޭ މީހަކު ވަރަށް ލޯބިންކަން ހައްދަމުން އައީ. މާތައް ވެސް ވަރަށް ރީތި. އަހަރެންނަކީ ގަސް ގެންގުޅޭ މީހެއްނޫން އެހެންވެ އަހަރެން އަތުން ގަސް މަރުވެދާނެތީ. އައި އޭމް ސޮރީ. އައި ކާންޓް އެކްސެޕްޓް އިޓް." ރަހާ ބުންޏެވެ.
"ގޭތެރޭގައި ބަހައްޓާލީމާ ހިތްހަމަޖެހޭނެ. ބަލަހައްޓަން އެހާ އުނދަގޫ ގަހެއްނޫން. އަހަރެންގެ ބައްޕަ ވަރަށް ގަސް ހައްދާނެ. ރަހާއަށް ލިބޭ ހުސްވަގުތުގައި ކުރާން ރަނގަޅުކަމެއް އެއީ. ބޭކާރު ފިކުރުތަކާއި މީހާ ދުރުކޮށްދޭނެ އެކަހަލަ މަސައްކަތެއް ކުރާން ފެށީމަ... ތަންކޮޅެއް ފަސޭހައިން ހެއްދޭ ކަހަލަ ކުޑަ ގަހެއް ރަހާއަށް ގެނެސްދޭންތަ؟." ޒަރަކް ބުންޏެވެ.
"ތޭންކްސް ޑަކްޓަރ. އެކަމަކު މިވަގުތު ބޭނުމެއްނޫން... ޑަކްޓަރ. މިއަދު ހޮޑުލެވުނުއިރު ތަންކޮޅެއް ގިނައިން ލޭ އައިކަން ފާހަގަކުރެވުނު." ރަހާ ވާހަކަ ބަދަލުކޮށްލީ އެވެ.
"ރަހާ. ކީމޯ ފަށަން އަހަރެން ނަސޭޙަތްތެރިވީން. ވީހާ ވެސް އަވަހަކަށް ފަށަންވީ. އުމުރުން 31 އަހަރު. ތީ އަދި ހަމަ ޒުވާނެއް. އަދި އުންމީދު ގެއްލުވާލާކަށްނުވޭ. ފައިސާއަށް ދަތިވަނީތަ؟. މިކޮޅުން ހުންނާނެ ޕޭޝަންޓުން އެކި ކަހަލަ ފަންޑުތައް... ތިހެން ގިނަ ދުވަހު ހުރެއްޖެނަމަ އަމިއްލަ ނަފްސަށް އަނިޔާ ތިދެނީ." ޒަރަކްގެ ވާހަކަ ހުއްޓާލަން ޖެހުނީ ރަހާ ވާހަކަދައްކަން ފެށީމަ އެވެ.
"އަދި ބޭނުމީ ބޭހުން ފަރުވާކުރާން. އެއަށްފަހު ވިސްނާނަން." ރަހާ ބުންޏެވެ.
"ތެރަޕީ ނުނަގާ ނުވާނެ. ރަހާ ތެރަޕީ ނުނަގަންޏާ އަހަރެން ބޭސް ދިނުން ހުއްޓާލާނަން. އަހަރެން ދޭ ލަފާ ޤަބޫލުނުކޮށް ބަލިން ރަނގަޅުވާން މަސައްކަތް ނުކުރާ ޕޭޝަންޓެއް އަހަރެންނަކަށް ނުބެލޭނެ. ޕްލީޒް ރަހާ. އަމިއްލަ ނަފްސާ މެދު އެހާ ފަރުވާކުޑަ ނުކުރޭ. ރަހާއަށް ބޯންމެރޯއެއް ބޭނުންވާނަމަ އަހަރެން އެކަމުގައި އެހީވާން މިހުރީ. މިކޮޅުން އެކަންކަން ވެސް ހަމަޖައްސައިދޭ. އަހަރެން އިސްކަމެއްދީގެން ބަލައިދޭން ތައްޔާރަށް މިހުރީ... ބުނަން ރަހާ. އިފް ޔޫ ޑޯންޓް ސްޓާޓް ޓު ވެލިއު ޔޯސެލްފް، ނޯވަން އެލްސް ވިލް ބީ އޭބަލް ޓު ހެލްޕް ޔޫ." ޒަރަކްގެ އަޑުގައި އިންތިހާ ކަންބޮޑުވުންވި އެވެ.
"ހުރިހާ ޑަކްޓަރުން ވެސް ޑަކްޓަރ ޒަރަކްހެން ވާނެނަމަ ދޯ. އައި ބިލީވް ދެއާ ވުޑް ބީ ފިއުވާ ޕޭޝަންޓް ޑަކްޓަރ ކޮންފްލިކްޓް." ރަހާ ކުޑަކޮށް ހިނިތުންވެލަމުން ބުންޏެވެ.
"އޯލްރައިޓް. ޔޫ ޑޯންޓް ހޭވް ޓު ސްޓާޓް އެޓޭޗިން ލޭބަލްސް ޓު މީ. އަހަރެންގެ ޝިފްޓް ވެސް މި ނިމުނީ. ރަހާ ނޫން ޕޭޝަންޓެއް ނެތް. އިތުރު ބޭހެއް އެބަ ލިޔެދެން. ކުރީން ދީފަ ހުރި ބޭހާއެކީ ބޭނުން ކުރާނީ. ހިނގާ އަހަރެންނާއެކީ މިކޮޅު ފާމަސީއިން ބޭސް ނަގަންށާ އެކީ." ޒަރަކް ބޭސް ސިޓީއެއް ތައްޔާރުކޮށްލުމާއެކު އެ ހިފައިގެން ތެދުވި އެވެ. އޭނާއާއެކު ރަހާ ވެސް ބަލިމީހުން ބަލާ ކޮޓަރިން ނުކުމެ ދެ މީހުން އެކުގައި ހިނގައިގަތެވެ.
ފާމަސީއިން ބޭސް ނަގައި ރަހާގެ ދަބަށް ބޭސް ފޮށި ލިއެވެ. އަދި އޭނާ އެ ކުލިނުކުން ނުކުންނަން ހިނގައިގަތެވެ. ޒަރަކް ވެސް އޭނާގެ ފަހަތުން ކުލިނުކުން ބޭރަށް ނުކުތެވެ. އޭރު ވެސް ބޯކޮށް ވާރޭ ވެހެނީ އެވެ. ކުލިނުކުގެ ދޮރުމަތީ ހިޔާވާނޭހާ ތަން އޮތުމުން އެ ދިމާގައި ރަހާ މަޑުކޮށްލައިގެން ހުއްޓާ ޒަރަކް ވާހަކަދެއްކި އެވެ.
"ހިނގާ އަހަރެން ގެއަށް ލައިދީފާނަން. އަނެއްކާ ތެމިގެން ދާނޭކަމެއްނެތް. އަބަދު ވާރޭއާ ތެމެންޏާ ވެސް ހުންމަޑެއް ނުވާނެ. އަނެއްކާ މިވަރަށް ވެހޭއިރު ކާރެއް ވެސް ނުލިބޭނެ ފަސޭހަ ރަޙުމަތަކު. ހިޔެއްނުވޭ އިރުއޮއްސޭއިރު ވެސް ވާރޭ ހުއްޓާނޭހެން." ބޯކޮށް ވެހެމުންދިޔަ ވާރޭއަށް ބަލަން ހުރެފައި ރަހާއަށް ނަޒަރެއް ދިނެވެ. އޭރު ރަހާގެ ނަޒަރު ވަނީ ޒަރަކްއަށް ހުއްޓިފަ އެވެ.
"ޑަކްޓަރއަށް އުނދަގޫ ކުރާކަށް ނުކެރޭނެ." ރަހާ މަޑުމަޑުން ބުންޏެވެ. ހަޤީޤަތަކީ އޭނާގެ ހަޔާތުން މިހާތަނަށް އައިއިރު ދުވަހަކުވެސް ވާކިފްނޫން އެހެން ފިރިހެނަކާއެކު ދަތުރުކޮށްފައެއް ނެތެވެ. ދުވަހަކުވެސް މީހެއްގެ ސައިކަލު ފަހަތަށް ނޫނީ ޕްރައިވެޓް ކާރަކަށް އެކަނި އަރާފައެއް ނެތެވެ. ޒަރަކްއަކީ ރަހާގެ ޑަކްޓަރެވެ. ކިތަންމެ ގާތްކޮށް ޒަރަކްގެ ވާހަކަ ހުއްޓަސް ދެމެދުގައި ރަޙުމަތްތެރިކަމެއް ނުވާކަން ރަހާއަށް ޤަބޫލުކުރެވެ އެވެ. އޭނާއާ ޒަރަކް ފުރަތަމަ ފަހަރަށް ވެސް ބައްދަލުވީ ހީލާސް މެޑި ކުލިނިކުން އެކަންޏެވެ. ޒަރަކްގެ ދަޢުވަތު ޤަބޫލުކުރާން ރަހާ ޖެހިލުންވަނީ އެވެ.
"އަހަރެންނަށް އުނދަގުލެއްނުވާނެ. ރަހާއަށް ވެސް އެނގޭނެ ކަންނޭނގެ މިކަހަލަ ދުވަހެއްގައި ޓެކްސީއެއް ހޯދުމަކީ ކިހާ ދަތިކަމެއްކަން. އެހެންނޫނަސް ރަހާއަކީ މިހާރު ބަލިމީހެއް. ތި ހަށިގަނޑުގައި މި ވާރެއާ ފިނީގައި އުޅޭނެހާ ވަރެއް ނުހުންނާނޭކަން އަހަރެންނަށް އެނގޭ. އަހަރެން ހަމަ ހެޔޮ ހިތުން ކޮށްދޭ ކަމެއްމީ. ޔޫ ޝުޑް ގޯ އަހެޑް އެންޑް އެކްސެޕްޓް މައި އޮފާ... ޕްލީޒް." ޒަރަކް މިހެންބުނެ ބޯއަރިކޮށްލަމުން ދެ ބުމަ ހިއްލާލި އެވެ. ރަހާއަށް ފުންނޭވާއެއް ދޫކޮށްލެވުނެވެ. ދެ ޚިޔާލެއްގައި ހުރެ ކަހަލަ ގޮތަކަށް އޭނާ ބޯޖަހާލީ އެވެ.
"އަހަރެން ކާރު ބޭއްވީ ތަންކޮޅެއް އެކޮޅުގައި. މި އަންނަނީ ކާރު ނަގައިގެން." ޒަރަކްގެ ފަޓުލޫނު ޖީބުން ކާރުގެ ރިމޯޓް ނަގަމުން އޭނާ ބުންޏެވެ. ރަހާ އެއްޗެކޭ ނުބުނެ ހުރީ އެވެ. ޒަރަކް ނުތެމެންވެގެން ދުވާރުމަތިން ދިޔައީ ދުވެފަ އެވެ. ގިނައިރެއްނުވެ ކަޅުކުލައިގެ އޮފުއަރާ "ވޮލްވޯ" ކާރެއް އައިސް ކުލިނިކު ދޮރުމައްޗަށް ވާހެން މަޑުކޮށްލައިފި އެވެ. އެ ދިމާއަށް ބަލަން ދެން ވެސް ރަހާ ހުރީ މިވަނީ ކިހިނެއްބާއޭ ހިތައް އަރާފަ އެވެ.
"ކީއްވެފަ ތިހުންނަނީ؟. އަވަހަށް އަރާ." ދޮރުފަތުގެ ބިއްލޫރިގަނޑު ކުޑަކޮށް ތިރިކޮށްލާފައި ޒަރަކް ގޮވާލި އެވެ. އަދި ޒަރަކްއާ ޖެހިގެން ހުރި ކުރީ ސީޓަށް އެރުމަށް ޓަކައި ރަހާއަށް ދޮރުފަތް އޭނާ ހުޅުވާލަ ދީފި އެވެ.
(ނުނިމޭ)
