ޒުވާން ކުޅުންތެރިންގެ ހުނަރު ފެންނާނެހެން ބާއްވަމުން ގެންދާ އެފްއޭއެމް 19 އަހަރުން ދަށުގެ ޗެމްޕިއަންޝިޕްގެ ފައިނަލްގައި ގަދަ ދެ ޓީމު ބައްދަލުކުރާ ގޮތަށް ހަމަޖެހިއްޖެ އެވެ. އެއީ މާޒިޔާއާއި އީގަލްސް އެވެ.
ގަލޮޅު ދަނޑުގައި ކުޅުނު ސެމީ ފައިނަލްގެ ފުރަތަމަ މެޗުގައި، ފުރިހަމަ ވަގުތު 2-2 އިން އެއްވަރުވުމަށްފަހު މާޒިޔާ ވަނީ އޮޑި ސްޕޯޓްސް ކްލަބާ ދެކޮޅަށް ޕެނަލްޓީ ޝޫޓައުޓުން 4-3 އިން މޮޅުވެފަ އެވެ.
މެޗުގެ ފުރަތަމަ ހާފުގައި މާޒިޔާއަށް ލީޑު ނަގައިދިނީ ޓީމުގެ އެންމެ މުހިއްމު ފޯވާޑް މުހައްމަދު އިލާން އިމްރާން އެވެ. ނަމަވެސް އޮޑި ސްޕޯޓްސްއިން ޓީމުގެ ހުނަރުވެރި މިޑްފީލްޑަރު އަހުޒަމް ރަޝީދު ވަނީ ހާފުގެ މެދުތެރެއިން ލިބުނު ސީދާ ހިލޭޖެހުމަކުން ނަތީޖާ އެއްވަރުކޮށްފަ އެވެ.
ދެވަނަ ހާފުގައި އަނެއްކާވެސް އަހުޒަމް ވަނީ ސަޕޯޓަރުން އުފާކޮށްދީފަ އެވެ. އޭރިއާ ބޭރުން އޭނާ ދިން ވަރުގަދަ ހަމަލާއަކުން އޮޑި ސްޕޯޓްސްއަށް ލީޑު ނަގައިދިނެވެ. ނަމަވެސް މާޒިޔާއިން ފަހު ވަގުތު ހިތްވަރުކޮށް އިލާން ވަނީ އެޓީމަށް ނަތީޖާ ހަމަހަމަ ކޮށްދީފަ އެވެ.
