ޔޫއެފާ ޗެމްޕިއަންސް ލީގުގެ 16 ވަނަ ބުރުގެ ފުރަތަމަ ލެގުގައި ސްޕެއިންގެ ކުލަބު ބާސެލޯނާ، މެޗުގެ ބޮޑުބައި 10 ކުޅުންތެރިންނާއެކު ކުޅެ ޕޯޗުގަލްގެ ބެންފިކާއާ ދެކޮޅަށް 1-0 އިން މޮޅުވެއްޖެ އެވެ.
ބުދަ ދުވަހުގެ ރޭ ލިސްބަންގެ އެސްޓާޑިއޯ ޑަ ލުޒްގައި ކުޅުނު މި މެޗުގައި ބާސެލޯނާގެ ބްރެޒިލް ކުޅުންތެރިޔާ ރަފިންހާ ވަނީ މެޗުގެ 61 ވަނަ މިނެޓުގައި މުބާރާތުގައި އޭނާ ޖެހި 9 ވަނަ ލަނޑު ޖަހައި ޓީމަށް މޮޅުވުމުގެ ފުރުސަތު ހޯދައިދީފަ އެވެ.
މި މެޗަކީ ބާސެލޯނާއަށް ވަރަށް ބޮޑު ގޮންޖެހުމަކާ ކުރިމަތިވި މެޗެކެވެ. އެއީ މެޗުގެ 22 ވަނަ މިނެޓުގައި ޓީމުގެ 18 އަހަރުގެ ޑިފެންޑަރު ޕައު ކުބާސީއަށް ރަތް ކާޑު ދެއްކުމާއި ގުޅިގެން މެޗު ނިމެންދެން 10 ކުޅުންތެރިންނާއެކު ކުޅެން ޖެހުމުންނެވެ. ކުބާސީއަށް ރަތް ކާޑު ދެއްކީ ބެންފިކާގެ ސްޓްރައިކަރު ޕަވްލިޑިސް ހަމަލާއެއް އުފައްދަން މަސައްކަތް ކުރަނިކޮށް އޭނާއަށް ފައުލް ކުރުމުންނެވެ.
"މި ކާމިޔާބީއާމެދު އަހަރެން ވަރަށް ބޮޑަށް ފަޚުރުވެރިވަން. ޓީމުން ވަރަށް ހިތްވަރާއެކު މަސައްކަތް ކުރި މެޗެއްގައި މި މޮޅުވުން ލިބުނީ،" މެޗަށް ފަހު ވާހަކަދައްކަމުން ބާސެލޯނާގެ ކޯޗު ހާންސީ ފްލިކް ބުނެފައިވެ އެވެ.
"ރަތް ކާޑު ދެއްކިފަހުން ޓީމުން ވަރަށް ރަނގަޅަށް ޑިފެންޑް ކުރި. އަދި ލިބުނު މަދު ފުރުސަތުތަކުގެ ބޭނުން ހިފި،" ބާސެލޯނާގެ މިޑްފީލްޑަރު ޕެޑްރީ ނޫސްވެރިންނާ ވާހަކަދައްކަމުން ބުނެފައިވެ އެވެ.
މި ދެ ޓީމު ދެވަނަ ލެގުގައި ބައްދަލުކުރާނީ އަންނަ އަންގާރަ ދުވަހު ސްޕެއިންގެ ބާސެލޯނާ ގައެވެ.
މި މެޗަށް ބާސެލޯނާގެ ސަޕޯޓަރުން ވަރަށް ބޮޑަށް އިންތިޒާރު ކުރަމުންދާއިރު، ކުބާސީއަށް ދެއްކި ރަތްކާޑާ ގުޅިގެން އެ މެޗުގައި އޭނާއަށް ނުކުޅެވޭނެ އެވެ.
