މާލޭގައި ހިންގާ ހުޅުމާލެ ފެރީ ޓާމިނަލާއި މާލޭގައި ހިންގާ ވިލިމާލެ ފެރީ ޓާމިނަލްގެ ބަނދަރު، ލޯންޗު ފެރީ އޮޕަރޭޓް ކުރާ މީހުންނަށް ހުޅުވާލުމަށް މިއަދު ނިންމައިފި އެވެ.
އެމްޓީސީސީގެ އޮފިޝަލަކު ވިދާޅުވީ އެ ކުންފުނީގެ މި ނިންމުމަކީ ރައީސް ޑރ. މުހައްމަދު މުއިއްޒުގެ ހާއްސަ އިސްނެންގެވުމެއްގެ ދަށުން ނިންމި ނިންމުމެއް ކަމަށެވެ.
ފެރީ ޓާމިނަލްތަކުގެ ބަނދަރު ލޯންޗް އޮޕަރޭޓް ކުރާ މީހުން ބޭނުންކުރަން ފުރުސަތު ހުޅުވާލަން ނިންމީ ރަށްރަށުން މާލެއަށް އަންނަ މީހުންނަށް ލުއިގޮތެއް ހަމަޖެއްސުމަށް ކަމަށް އެމްޓީސީސީ އިން ބުންޏެވެ.
ފަޅު ބޭނުންކުރަން ޝައުގުވެރިވާ ފަރާތްތަކުން މިމަހުގެ 10 ވަނަ ދުވަހުގެ މެންދުރުފަހު 2:00ގެ ކުރިން [email protected] އީމެއިލްއަށް ލިޔުމުން ޝައުގުވެރިކަން ހުށަހަޅަންޖެހެ އެވެ.
"އިތުރު މައުލޫމާތު ހޯދެއްވުމަށް މިކުންފުނީގެ ނަންބަރު 7978865 އަށް ގުޅުއްވުން އެދެމެވެ،" އެމްޓީސީސީ އިން ބުންޏެވެ.
މާލެ އިން އަތޮޅުތަކަށް ދަތުރުކުރާ ލޯންޗުތައް މިހާރު އާންމުކޮށް ފުރަނީ މާލޭގެ އެމްއެމްއޭއާ ދިމާލު ޖެޓީންނާއި މޭރީބްރައުން ޖެޓީއާ ދިމާލުންނެވެ. އެކަމަކު އެ ސަރަހައްދުގައި ހިޔާވާނެ އެއްވެސް ގޮތެއް ނެތުމަކީ އާންމުންގެ ވަރަށް ބޮޑު ކަންބޮޑުވުމެކެވެ.