ސްޕެނިޝް ލީގުގައި ރޭ ކުޅުނު ފޯރިގަދަ މެޗުގައި ބާސެލޯނާ އިން އެތުލެޓިކޯ މެޑްރިޑް އަތުން 4-2ގެ ނަތީޖާއަކުން މޮޅުވެއްޖެ އެވެ.
ފަހަތުން އަރައި ހޯދި މި ކާމިޔާބީއާއެކު ބާސެލޯނާ ވަނީ ރެއާލް ފަހަތަށް ޖައްސާލުމަށްފަހު އަނެއްކާވެސް ލީގު ތާވަލުގެ އެއްވަނައަށް އަރާފަ އެވެ.
ސްޕޭނުގެ މެޑްރިޑްގައި ހުންނަ އެތުލެޓިކޯ މެޑްރިޑުގެ ރިޔާދު އެއާ މެޓްރޮޕޮލިޓާނޯ ސްޓޭޑިއަމްގައި ކުޅުނު މި މެޗުގައި ބާސެލޯނާއަށް ލީޑު ލިބުނީ ވަރަށް ދަތި ވަގުތެއްގަ އެވެ. މެޗުގެ ފުރަތަމަ ހާފުގެ ފަހު މިނިޓުގައި އެތްލެޓިކޯ މެޑްރިޑްގެ ހޫލިއަން އަލްވަރޭޒް ވަނީ ގޯލެއް ކާމިޔާބުކޮށްދީފަ އެވެ.
އެތްލެޓިކޯ މެޑްރިޑަށް ލީޑު ފުޅާކޮށްދިނީ މެޗުގެ 70 ވަނަ މިނިޓުގައި އެލެގްޒެންޑަ ސޯލޮތް ޖެހި ގޯލާއެކުގަ އެވެ. ނަމަވެސް މިއަށްފަހު ބާސެލޯނާއިން ދައްކާލީ ހައިރާންކުރުވަނިވި ކުޅުމެކެވެ.
ހެންސީ ފްލިކް ގެނައި ބަދަލުތަކާއެކު މުޅި މެޗުގެ އޮއިވަރު ބަދަލުވެގެން ދިޔަ އެވެ. މެޗުގެ 72 ވަނަ މިނިޓުގައި ރޮބަޓް ލެވަންޑޯސްކީ ވަނީ ބާސެލޯނާއަށް ފުރަތަމަ ގޯލު ޖަހައިދީ ލީޑު ހަނިކޮށްފަ އެވެ. އަދި އޭގެފަހުން 78 ވަނަ މިނިޓުގައި ރަފީނިއާ ދިން ބޯޅައަކުން ފެރާން ޓޮރޭޒް ވަނީ ބާސެލޯނާއަށް މެޗުގެ ނަތީޖާ އެއްވަރުކޮށްދީފަ އެވެ.
މެޗުގެ އިތުރު ވަގުތުގައި ބާސެލޯނާ އިން ވަނީ ފުރަތަމަ ފަހަރަށް ލީޑު ނަގާފަ އެވެ. އިތުރު ވަގުތުގެ ދެވަނަ މިނިޓުގައި ލަމީން ޔަމާލް ޖެހި ބޯޅައެއް އެތްލެޓިކޯގެ ކުޅުންތެރިއެއްގެ ގައިގައި ޖެހި މިސްރާބު ބަދަލުވެގެން ގޮސް ގޯލުގެ ތެރެއަށް ވަންއިރު ކީޕަރަށް ކުރެވުނު މާބޮޑު ކަމެއް ނެތެވެ. އިތުރު ވަގުތުގެ އަށްވަނަ މިނިޓުގައި ފެރާން ޓޮރޭޒް ވަނީ އޭނާގެ ދެވަނަ ގޯލާއެކު ބާސެލޯނާއަށް ލީޑު ފުޅާކޮށްދީފަ އެވެ.
މި މެޗުން ބާސެލޯނާ މޮޅުވުމާއެކު އެ ޓީމަށް ވަނީ ލީގުގައި މިހާތަނަށް ކުޅުނު 27 މެޗުން 60 ޕޮއިންޓް ލިބި ތާވަލުގެ އެއްވަނައަށް އަލުން ލިބިފަ އެވެ. ދެވަނައިގައި އޮތް ވާދަވެރި ރެއާލް މެޑްރިޑް އެއް މެޗު އިތުރަށް ކުޅެ 60 ޕޮއިންޓް ލިބިފައިވީ ނަމަވެސް، ބާސެލޯނާއަށް އެއްވަނަ ލިބިފައިވަނީ ގޯލުގެ ފަރަގުންނެވެ. އެތުލެޓިކޯ މެޑްރިޑަށް ލިބިފައިވާ 56 ޕޮއިންޓާއެކު އެ ޓީމު އޮތީ ތާވަލުގެ ތިންވަނައިގަ އެވެ.
