އިމިގްރޭޝަންގެ ބައެއް މުވައްޒަފުން ބިދޭސީންގެ އަތުން ނާޖައިޒު މަންފާ ހޯދަމުންދާ ކަމަށް ތުހުމަތުކޮށް ތިން މީހަކު ހައްޔަރުކޮށްފި އެވެ.
މިކަމާ ގުޅިގެން ފުލުހުން މިރޭ ނެރުނު ބަޔާނެއްގައި ބުނީ އިމިގްރޭޝަންގެ ބައެއް މުވައްޒަފުން މަގާމުގެ ނުފޫޒު ނަހަމަ ގޮތުގައި ބޭނުންކޮށް، ބިދޭސީ މަސައްކަތްތެރިންގެ އަތުން ނާޖާއިޒު މަންފާ ހޯދަމުންދާ ކަމުގެ މައުލޫމާތު ލިބުމާ ގުޅިގެން އެ މައްސަލަ ފުލުހުން ތަހުގީގު ކުރަމުންދާ ކަމަށެވެ.
މައްސަލައާއި ގުޅިގެން ތިން މީހަކު ހައްޔަރުކުރީ މާޗް 20 ވަނަ ދުވަހުގެ ރޭ ހިންގި އޮޕަރޭޝަނެއްގައި ގެއެއް ބަލައި ފާސްކުރުމަށްފަހު ކަމަށްވެސް ފުލުހުން ބުންޏެވެ. އެކަމަކު ހައްޔަރުކޮށްފައިވަނީ ސީދާ އިމިގްރޭޝަންގެ މުވައްޒަފުން ކަމެއް ފުލުހުން ނުބުނެ އެވެ.
މައްސަލައިގެ ތަހުގީގު ކުރިއަށްދާ މިންވަރަކުން މައްސަލައާ ގުޅޭ އިތުރު ތަފްސީލް ހާމަކުރާނެ ކަމަށްވެސް ފުލުހުން ބުންޏެވެ.
އިމިގްރޭޝަންގެ ބައެއް މުވައްޒަފުން ބިދޭސީންގެ އަތުން ނާޖައިޒު މަންފާ ހޯދަމުންދާ ކަމަށް ތުހުމަތުކޮށް ތިން މީހަކު ހައްޔަރުކުރިއިރު ކުއްލި ގޮތަކަށް އިމިގްރޭޝަން ކޮންޓްރޯލަރު މުހައްމަދު ޝަމްއާން ވަހީދު ވަނީ މަގާމުން ވަކިކުރައްވާފަ އެވެ.
