ޕްރައިވެޓް އިންޝުއަރެންސް އޮންނަ މީހުންނަށްވެސް އާސަންދައިގެ ދަށުން އައުޓް ޕޭޝަންޓް ހިދުމަތް ލިބޭނެ އިންތިޒާމު ހަމަޖައްސަވައިފި އެވެ.
މިގޮތަށް ދިން ނަމަވެސް ޕްރައިވެޓް އިންޝުއަރެންސް އޮންނަ ފަރާތްތަކަށް ފުރަތަމަ ހިދުމަތަށް ފައިސާ ކަނޑާނީ ޕްރައިވެޓް އިންޝުއަރެންސުންނެވެ.
އާސަންދަ އިސްލާޙުކޮށް އެނިޒާމުގައި ހުރި އިސްރާފުތައް ކުޑަކުރުމަށް ސަރުކާރުން ފެށި މަސައްކަތުގެ ތެރެއިން ޕްރައިވެޓް އިންޝުއަރެންސް އޮންނަ ފަރާތްތަކަށް އައުޓް ޕޭޝަން ހިދުމަތް ނުވަތަ އެނދުމަތި ނުވެ ހޯދާ ހިދުމަތްތަކަށް އާސަންދަ ވަނީ ކަނޑާލަފަ އެވެ. އަދި މިފަދަ ފަރާތްތަކުގެ ޕްރައިވެޓް އިންޝުއަރެންސްގެ ޕެކޭޖް ހަމަވުމުން އާސަންދައިން ހިދުމަތަށް އެދެވޭގޮތަށް މިދިޔަ އަހަރު އިންތިޒާމުތަކެއް ހަމަޖެއްސި އެވެ. އެހެންނަމަވެސް މިކަމުގައި އާންމުންގެ ގިނަ ބައެއްގެ ކަންބޮޑުވުން ހުރުމާއެކު އާސަންދައިން ވަނީ މިކަން ބަދަލުކޮށްފަ އެވެ.
އާސަންދައިން ވަނީ މިއަދުން ފެށިގެން އަނެއްކާވެސް ޕްރައިވެޓް އިންޝުއަރެންސް އޮންނަ ފަރާތްތަކަށް ޑޮކްޓަރަށް ދެއްކުމަށްޓަކައި ކޮންސަލްޓޭޝަން ފީ، އިންޝުއަރެންސުން ކެނޑުމަށްފަހު ބާކީ އާސަންދައިން ކަވަރުކުރާ ގޮތަށް ވަނީ ހަމަޖައްސާފަ އެވެ.
އާސަންދަ ކުންފުނިން ބުނީ ޕްރައިވެޓް އިންޝުއަރެންސް އޮންނަ މީހުންނަށް އެނދުމަތި ނުވެ ފޯރުކޮށްދޭ އެހެނިހެން ހިދުމަތްތަކަށް އާސަންދަ މެދުވެރިކޮށް މިއުސޫލުގެ ދަށުން އަމަލުކުރާނީ ކުރިއަށް އޮތް އޭޕްރީލް މަހުގެ 27 ވަނަ ދުވަހުން ފެށިގެން ކަމަށެވެ. މިގޮތަށް ހަމަޖެއްސި ނަމަވެސް ޕްރައިވެޓް އިންޝުއަރެންސް އޮންނަ މީހުންނަށް ފުރަތަމަ ފީއަށް ކަނޑާނީ، ޕްރައިވެޓް އިންޝުއަރެންސުން ކަމަށާއި އެއަށްފަހު ބާކީ ވާ އަދަދު އާސަންދައިގެ ތެރެއިން ކަނޑާނެ ކަމަށެވެ. މިއީ އާސަންދަ އިސްލާހުކުރުމަށް ކުރަމުންދާ މަސައްކަތުގެ ދަށުން ގެނައި ބަދަލެއް ކަމަށް އެކުންފުނިން ބުންޏެވެ.
އާސަންދައަށް ދައުލަތުގެ ބަޖެޓުން ކުރާ ހަރަދުތައް އަހަރުން އަހަރަށް އިތުރުވަމުންދާތީ އެ ނިޒާމު އިސްލާހުކޮށް ހަރަދު ކުޑަކުރުމަށް ދުނިޔޭގެ މާލީ އިދާރާތަކުން ދަނީ ސަރުކާރަށް ވަރަށް ބޮޑަށް ބާރުއަޅަމުންނެވެ.
