މަގާމުގެ ނުފޫޒު ނަހަމަ ގޮތުގައި ބޭނުންކޮށް، ބިދޭސީ މަސައްކަތްތެރިންގެ އަތުން ނާޖާއިޒު މަންފާ ހޯދަމުން ދިޔަ ކަމުގެ ތުހުމަތުގައި ހައްޔަރުކޮށްފައިވާ މޯލްޑިވްސް އިމިގްރޭޝަންގެ މުވައްޒަފުންގެ ވަނަވަރު ފުލުހުން މިރޭ އާންމުކޮށްފި އެވެ.
ކުށުގެ ތުހުމަތުގައި ފުލުހުން މިދިޔަ ބުރާސްފަތި ދުވަހުގެ ރޭ ފުރަތަމަ ހައްޔަރުކުރީ ތިން މީހެކެވެ. އޭގެފަހުން ހުކުރު ދުވަހުގެ ރޭ ދެ މީހުން ހައްޔަރުކުރި އެވެ.
ހުކުރު ދުވަހުގެ ރޭ ހައްޔަރުކުރި މީހުންގެ ތެރޭގައި ރައީސް ޑރ. މުހައްމަދު މުއިއްޒުގެ ސަރުކާރުން ކޮންޓްރޯލާ ޖެނަރަލް އޮފް އިމިގްރޭޝަންގެ މަގާމަށް އެންމެ ފުރަތަމަ އައްޔަންކުރެއްވި ގ. ލިޓޯނިޔާ، މުހައްމަދު ޝަމްއާން ވަހީދު ވެސް ހިމެނެ އެވެ.
މީގެއިތުރުން ހައްޔަރުކޮށްފައިވަނީ ތ. ބުރުނި، މޫމިނާގެ، މުހައްމަދު އަލްސަން އިސްމާއީލް (21 އ) އާއި، ގ. ހެޕީ ސައިޑް ގެެއަށް ނިސްބަތްވާ އިބްރާހީމް އަހްމަދު (37 އ) އާއި، ހަސަން ސަހެޝާން (47 އ)ގެ އިތުރުން މ. ހަޒާރީވިލާ، އަހްމަދު ލައްސާން (40 އ) އެވެ.
މި މީހުންގެ ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުމުން 15 ދުވަހަށް ބަންދުގައި ބޭތިއްބުމަށް ވަނީ އަމުރުކޮށްފަ އެވެ.
ތަހުގީގުގެ ބޭނުމަށް ފުލުހުން ވަނީ ޝަމްއާންގެ އަންހެނުންގެ ފޯޓު ހިފަހައްޓައި، މައްސަލައިގައި ހިމެނޭ ދެ މީހަކު ފުރުން މަނާކޮށްފަ އެވެ.
