އަންނަ އެޕްރީލް މަހު ފަށާ ދިރާސީ އާ އަހަރަށް ގްރޭޑް 1 އަށް ވަނުމުގެ ފުރުސަތު 5،700 އަށްވުރެ ގިނަ ދަރިވަރުންނަށް ދީފި އެވެ.
ދިރާސީ އަހަރު ސަރުކާރު ސްކޫލުތަކުގެ އެލްކޭޖީ، ޔޫކޭޖީ އަދި ގްރޭޑް އެކަކަށް ދަރިވަރުން ވެއްދުމަށް އެޑިއުކޭޝަން މިނިސްޓްރީން ހުޅުވާލީ މިދިޔަ އަހަރުގެ އޮކްޓޫބަރު މަހު އެވެ.
އެ މިނިސްޓްރީން ބުނި ގޮތުގައި ގްރޭޑް 1 އަށް ފުރުސަތު ދިން ދަރިވަރުންގެ ތެރެއިން 2،000 އެއްހާ ދަރިވަރުންނަކީ މާލެ ސަރަހައްދުގެ ސްކޫލުތަކުން ފުރުސަތު ދީފައިވާ ދަރިވަރުންނެވެ.
ގްރޭޑް 1 އަށް ވަނުމުގެ ފުރުސަތު ދަރިވަރުންނަށް ދިނުމަށް ކުރަންޖެހޭ މަސައްކަތްތައް މިހާރު ނިމިފައިވާ ކަމަށްވެސް އެ މިނިސްޓްރީން ވަނީ ބުނެފަ އެވެ.
ދިރާސީ އާ އަހަރުގެ ކިޔެވުން ފެށުމަށް ހަމަޖެހިފައިވަނީ އަންނަ އެޕްރީލް މަހުގެ ހަތްވަނަ ދުވަހު އެވެ.
ފައިނަލް އެކަޑެމިކް ކަލަންޑަރުގައިވާ ގޮތުން ފުރަތަމަ ޓާމްގެ ކިޔެވުމަށްފަހު ޗުއްޓީ ލިބޭނީ ޖުލައި 28 އިން އޮގަސްޓް ހަތެއްގެ ނިޔަލަށެވެ. އަދި ދެވަނަ ޓާމްގެ ކިޔެވުން ކުރިއަށްދާނީ އޮގަސްޓް 10 ވަނަ ދުވަހުން ޑިސެމްބަރު 25 ވަނަ ދުވަހުގެ ނިޔަލަށެވެ.
