ވެލާނާ އިންޓަނޭޝަނަލް އެއާޕޯޓް (ވީއައިއޭ) ގެ ޑިޕާޗާ ހޯލުން ހުއްދަ ނެތި ގިނަ އަދަދެއްގެ ސިނގިރޭޓު ނެރެން އުޅުނު މައްސަލައިގެ ތުހުމަތުގައި ހައްޔަރުކުރި ޕޮލިސް ސާޖަންޓް ޔޫސުފް ނަޒީރު ފުލުހުންގެ ވަޒީފާއިން ސަސްޕެންޑްކޮށްފި އެވެ.
ހުއްދަ ނެތި ސިނގިރޭޓް ނެރެން އުޅުނު މި މައްސަލަ ފުލުހުންނަށް ރިޕޯޓްކުރީ މިމަހުގެ 25 ވަނަ ދުވަހުގެ ހެނދުނު 6:20 ހާއިރު ކަސްޓަމްސް އިންނެވެ.
މި މައްސަލައިގައި ހައްޔަރުކޮށްފައިވަނީ ޕޮލިސް ސާޖަންޓް ޔޫސުފް ނަޒީރު (38އ)، ދަފްތަރު ނަންބަރު ރސ. 14358 މާލެ އާއި މ. ސިލްވަނެސްޓް އަހުމަދު އަފްސަލް (45އ) އެވެ.
އެ މީހުން ހައްޔަރުކުރީ ކޯޓު އަމުރެއްގެ ދަށުންނެވެ. ނަމަވެސް ކޯޓުން ވަނީ ޝަރުތުތަކަކާއެކު އެ ދެ މީހުންވެސް ދޫކޮށްލާފަ އެވެ.
ފުލުހުން ބުނީ ޔޫސުފް ނަޒީރު އިއްޔެ އިން ފެށިގެން މުސާރަ ނުލިބޭ ގޮތަށް ފުލުހުންގެ ހިދުމަތުގެ ވަޒީފާއިން ސަސްޕެންޑްކޮށްފައިވާ ކަމަށެވެ.
