ފިތުރު އީދު ފާހަގަކުރުމުގެ ގޮތުން "އީދު ހަވީރު" މިއަދާއި މާދަމާވެސް ކުރިއަށް ގެންދަން ނިންމައިފި އެވެ.
އީދު ހަވީރު މިއަދާއި މާދަމާވެސް ބާއްވަން ނިންމީ ވަރަށް ގިނަ އާއިލާތަކުން މިކަމަށް އެދި ޝައުގުވެރިކަންފާޅު ކުރުމުންނެވެ.
އީދު ހަވީރުގައި ހިމެނޭ ހަރަކާތްތައް އިންތިޒާމުކޮށްފައިވަނީ އެމްއެންޑީއެފް އާއި ސަރުކާރުގެ ބައެއް އިދާރާތަކާއި ސަރުކާރު ހިއްސާވާ ބައެއް ކުންފުނިތައް ގުޅިގެންނެވެ.
މިހަރަކާތްތައް އިއްޔެ ކުރިއަށް ގެންދިޔައީ ސަލްޓަން ޕާކާއި، އިސްލާމީ މަރުކަޒުގެ މައިދާނާއި ޖުމްހޫރީ މައިދާނުގެ އިތުރުން ރަސްމީ ބޮޑު ފާލަން ހިމެނޭ ސަރަހައްދުގަ އެވެ. މި ހަރަކާތްތައް މިއަދާއި މާދަމާވެސް އޮންނާނީ މި ސަރަހައްދުގަ އެވެ.
ފިތުރު އީދު ފާހަގަކުރުމަށް މާލޭގައި އިއްޔެ ހަވީރު ބޭއްވި "އީދު ހަވީރު"ގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ދެކަނބަނލުން ބައިވެރިވެ ވަޑައިގެންނެވި އެވެ. މީގެ އިތުރުން ގިނަ އަދަދެއްގެ އާންމުންވެސް މި ހަވީރުގައި ބައިވެރިވި އެވެ.
