އދގެ ވޯލްޑް ފުޑް ޕްރޮގްރާމް (ޑަބްލިޔުއެފްޕީ) ގެ އެހީތެރިކަމާ އެކު ޣައްޒާގައި ހިންގާ ބޭކަރީތަކުން ފުށާއި ތެޔޮ ހުސްވުމުގެ ސަބަބުން ބަންދުކޮށްފި އެވެ.
ޑަބްލިޔުއެފްޕީން ބުނި ގޮތުން ބޭކަރީތައް ބަންދުކުރަން ޖެހުނީ ހަދާނެ އެއްވެސް ގޮތެއް ނެތިގެންނެވެ. އދގެ އެހީތެރިކަމާ އެކު ހިންގާ ހުރިހާ ބޭކަރީއެއް ބަންދުކުރީ މަޖުބޫރުވެގެން ކަމަށްވެސް ޑަބްލިޔުއެފްޕީން ބުންޏެވެ.
އދ އިން ބުނި ގޮތުން ފުށާއި ތެޔޮ އެތެރެކުރުމަށްޓަކައި ބޯޑަރު ހުރަސްކޮށް އިޒުރޭލަށް ވަންނަން ޖެހެ އެވެ. އަދި އިޒުރޭލުގެ ސަލާމަތީ ބާރުތަކުން ބަލަހައްޓާ ސަރަހައްދުތަކަށް ވެސް ވަންން ޖެހެ އެވެ.
ނަމަވެސް، އެއިން އެއްވެސް ތަނަކަށް، ސަރަހައްދަކަށް ވަނުމަށް އދއަށް ވެސް ހުއްދަ ނުދޭ ކަމަށް އޮފިޝަލުން ވިދާޅުވި އެވެ.
ޣައްޒާގެ އެކި ކަންކޮޅުތަކުގައި ޑަބްލިޔުއެފްޕީގެ އެހީތެރިކަމާ އެކު 25 ބޭކަރީ ހިންގާ ކަމަށް އޮފިޝަލުން ވިދާޅުވި އެވެ. ނަމަވެސް، މި ވަގުތު އެއްވެސް ބޭކަރީއެއް ހުޅުވާފައި ބެހެއްޓެން ނެތީ ކަމަށް ޑަބްލިޔުއެފްޕީން ބުންޏެވެ.
ޑަބްލިޔުއެފްޕީ ބުނި ގޮތުން ކާނާގެ ގޮތުގައި ދެވެން ހުރި ހުރިހާ އެހީތެރިކަމެއް، ކުރިއަށް އޮތް ދުވަސްތަކުގައި ވެސް ޣައްޒާގެ ރައްޔިތުންނަށް ފޯރުކޮށްދޭނެ އެވެ. ނަމަވެސް، ވަސީލަތްތައް ހުސްވުމުން ޚިދުމަތް މެދުކަނޑާލައި، ހުއްޓާލަން ޖެހޭނެ އެވެ.
ޣައްޒާއިން ކާނާ ހުސްވާ ކަމަށް އދއިން ބުނި ނަމަވެސް، އިޒުރޭލުން ގަބޫލެއް ނުކުރެ އެވެ. ޔަހޫދީން ބުނާ ގޮތުން ބޯޑަރުތައް ބަންދުކުރި ނަމަވެސް، ޣައްޒާއިން ކާބޯތަކެތި ހުހެއް ނުވާނެ އެވެ.
ޣައްޒާގައި ގުދަންކޮށްފައި އެކަށީގެންވާ ވަރަށް ކާނާ ހުރި ކަމަށް އިޒުރޭލު ސަރުކާރުން ތުހުމަތުކުރެ އެވެ.
ޣައްޒާގައި ހަރަކާތްތެރިވާ އަސްކަރީ ޖަމާތެއް ކަމަށްވާ ހަމާސްއާ އެކު ސުލްހައިގެ އެއްބަސްވުމެއް ހެދުމަށް ފަހު، އިޒުރޭލުން ވަނީ އެއްބަސްވުން އަމިއްލައަށް ބާތިލުކޮށްފަ އެވެ.
އަދި ޣައްޒާއަށް ކުރިން ހަމަލާދިން ގޮތަށް މިހާރު ވަނީ ހަމަލާތައް އަލުން ފަށާފަ އެވެ. މާރިޗު 18 ގައި ފެށި ހަމަލާތަކުގައި މިހާތަނަށް 1،000 އަށް ވުރެ ގިނަ މީހުން ވަނީ މަރުވެފަ އެވެ. އަދި ޒަޚަމްތަކާ އެކު 2،000 އަށް ވުރެ ގިނަ މީހުން ވަނީ ސިއްހީ މަރުކަޒުތަކަށް ގެންގޮސްފަ އެވެ.
