އއ. ހިމަންދޫގެ ފަޅު ތެރޭގައި އޮތް ލޯންޗެއްގައި އަލިފާން ރޯވެ، އަޑިއަށް ހިނގައްޖެ އެވެ.
ފުލުހުން ބުނީ ހިމަންދޫ ފަޅުގައި އޮތް "ކައެލް ވިންގް" ނަކަށް ކިޔާ ލޯންޗެއްގައި އަލިފާން ރޯވި ކަމުގެ މައުލޫމާތު ލިބުނީ މިއަދު ފަތިހު 5:50 ހާއިރު ކަމަށެވެ.
ލޯންޗުގައި ރޯވި އަލިފާން ނިއްވާލެވުނީ ހިމަންދޫ ކައުންސިލާއި ރައްޔިތުންނާއި ފުލުހުން ގުޅިގެން ކުރި މަސައްކަތުން މިއަދު ހެނދުނު 6:26 ހާއިރު ކަމަށް ފުލުހުން މައުލޫމާތު ދީފައިވެ އެވެ.
ފުލުހުން ބުނީ ހާދިސާ ހިނގި ވަގުތު ލޯންޗްގައި މަސައްކަތް ކުރާ ދެ މީހަކާއި ކުޑަ ކުއްޖެއް ހުރި ކަމަށެވެ. މިހާދިސާއާއި ގުޅިގެން ލޯންޗުގައި މަސައްކަތް ކުރާ ދެ މީހުންނަށް ކޮންމެވެސް ވަރަކަށް އަނިޔާވި ކަމަށާއި ނަމަވެސް ބޮޑު އަނިޔާއެއް ނުލިބޭ ކަމަށްވެސް ފުލުހުން ބުންޏެވެ.
އަލިފާން ރޯވި ލޯންޗް ވަނީ ބޭނުން ނުކުރެވޭ އަނދާފައި ކަމަށްވާތީ ލޯންޗް މިހާރު ވަނީ އަޑިއަށްވެސް ގޮސްފަ އެވެ.
ލޯންޗުގައި ރޯވާން މެދުވެރިވި ސަބަބު އަދި ސާފުވާ ގޮތެއް ނުވެ އެވެ.
މިމައްސަލަ އިތުރަށް ތަހުގީގު ކުރަމުންދާ ކަމަށްވެސް ފުލުހުން ބުންޏެވެ،
