އއ. ރަސްދޫގައި ހިނގި އަލިފާނުގެ ހާދިސާގައި ފިހުނު ދެ މީހުންގެ ތެރެއިން އަންހެން މީހާ މަރުވެއްޖެ އެވެ.
ރަސްދޫގައި މިދިޔަ ހަފްތާގައި ހިނގި އަލިފާނުގެ ހާދިސާއާއި ގުޅިގެން މާލެއަށް ގެނެސް ފަރުވާ ދެމުން ދިޔައީ އުމުރުން 31 އަހަރުގެ ދެމަފިރިން ކަަމަށްވާ އައިޝަތު ރިފްގާ އާއި އަލީ ސާމިން އެވެ.
އައިޖީއެމްއެޗްގެ އައިސީޔޫގައި ވެންޓިލޭޓަރުގައި ބާއްވައިގެން ދެ މީހުންނަށް ފަރުވާ ދެމުން ދަނިކޮށް ރިފްގާ ނިޔާވީ މިރޭ އިރާކޮޅުގެ ވަގުތެއްގައެވެ.
އއ. އަތޮޅު އޮފީހުގައި މަސައްކަތް ކުރަމުން ދިޔަ ރިފްގާ އާއި ސާމިންގެ ހަށިގަނޑުގައި އަލިފާން ރޯވި ސަބަބެއް އަދިވެސް ވަނީ ސާފުވާ ގޮތް ނުވެފަ އެވެ.
އައިޖީއެމްއެޗްއަށް ރިފްގާ ގެންދިޔައިރު އޭނާގެ ހަށިގަނޑު 83 ޕަސަންޓް އަދި ސާމިންގެ ހަށިގަނޑުގެ 78 ވަނީ ފިހިފަ އެވެ.
ރިފްގާ މަރުވެފައި މިވަނީ ރާއްޖޭން ބޭރުން ބާން ސްޕެޝަލިސްޓް ޑޮކްޓަރެއް މިދިޔަ ހުކުރު ދުވަހު ރާއްޖެ ގެނެސްފައި ވަނިކޮށެވެ.
ރަސްދޫ އަލިފާންގެ ހާދިސާގައި ރިފްގާއާއި ސާމިން ދިރިއުޅެމުން ދިޔަ ގެއަށްވެސް އަދި އެމީހުން ދިރިއުޅޭ ކޮޓަރިއަށްވެސް އަދި އެ ގޭގައި ދިރިއުޅޭ އެހެން މީހަކަށްވެސް އެ ދެ މަފިރިންގެ ފަސް އަހަރުގެ ދަރިފުޅަށްވެސް މާބޮޑު އަނިޔާއެއް ގެއްލުމެއް ލިބިފައެއް ނުވެ އެވެ.
