ރެއާލް ބެޓިސްއާ ދެކޮޅަށް ރޭ ކުޅުނު މެޗު 1-1 އިން އެއްވަރުވި ނަމަވެސް ބާސެލޯނާއިން ލަލީގާގެ ތާވަލުގައި 4 ޕޮއިންޓުގެ ލީޑެއް ދަމަހައްޓައިފި އެވެ.
ބާސެލޯނާގެ އޮލިމްޕިކް ސްޓޭޑިއަމްގައި ކުޅުނު މި މެޗުގައި ގިނަ ވަގުތު ބޯޅަ ހިފަހައްޓައިގެން ބާސާއިން ކުޅުނު ނަމަވެސް އެ ޓީމަށް މެޗުގައި ލިބުނު ގިނަ ފުރުސަތުތައް ގޯލަށް ބަދަލުކޮށްނުލެވުނެވެ.
މެޗުގެ ހަތްވަނަ މިނެޓުގައި ޕަބްލޯ ގަވީ ޖެހި ގޯލުން ބާސެލޯނާއަށް ލީޑު ލިބުނު ނަމަވެސް އޭގެ 10 މިނެޓު ފަހުން، ބެޓިސްގެ ޑިފެންޑަރު ނަތަން ވަނީ ޖިޔޮވާނީ ލޮސެލްސޯ ނެގި ކޯނަރަކުން ބޮލުން ޖަހައި ނަތީޖާ އެއްވަރުކޮށްފަ އެވެ.
ދެވަނަ ހާފުގައި ބާސެލޯނާގެ ޑިފެންޑަރު ޖޫލްސް ކޫންޑޭ ދިން ހުރަހަކުން ލީޑު ހޯދުމަށް ފުރުސަތެއް ލިބުނު ނަމަވެސް ބެޓިސްގެ ގޯލްކީޕަރު ވަނީ އެ ފުރުސަތު ދިފާއުކޮށްފަ އެވެ.
47,000 އަށް ވުރެ ގިނަ ސަޕޯޓާރުންގެ ކުރިމަތީގައި ކުޅުނު މި މެޗުގައި ބާސެލޯނާއަށް ގިނަ ފުރުސަތުތަކެއް ލިބުނު ނަމަވެސް އެ ފުރުސަތުތައް ބޭނުންކުރެވިފައެއް ނުވެ އެވެ.
މިހާތަނަށް 30 މެޗު ކުޅެފައިވާއިރު ބާސެލޯނާ އޮތީ 67 ޕޮއިންޓާއެކު ތާވަލުގެ އެއްވަނަ މަގާމުގަ އެވެ. ދެވަނައިގައިވާ ރެއާލް މެޑްރިޑަށް ލިބިފައިވަނީ 63 ޕޮއިންޓެވެ.
ބާސެލޯނާ މިހާރު ތައްޔާރުވަނީ ބުދަ ދުވަހުގެ ރޭ ޔޫއެފާ ޗެމްޕިއަންސް ލީގުގެ ކުއާޓަ ފައިނަލްގެ ފުރަތަމަ ލެގުގައި ޖަރުމަނުގެ ބޮރޫޝިޔާ ޑޯޓްމަންޑާ ދެކޮޅަށް ކުޅުމަށެވެ.
