ވ. ރަކީދޫގައި އިއްޔެ އަނިޔާވެރިކޮށް މަރާލާފައި އޮއްވާ ފެނުނު މުހައްމަދު އިބްތިހާލްގެ މަރުގެ މައްސަލައިގައި އެއްވެސް ފަރާތެއްތެ އިހުމާލެއް އޮތްތޯ ބެލުމަށް ތަހުގީގު ކުރަމުންދާ ކަމަށް ކޮމިޝަނާ އޮފް ޕޮލިސް ހުސައިން ވަހީދު މިއަދު ވިދާޅުވެއްޖެ އެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ސީޕީ ހުސައިން ވިދާޅުވީ އިބްތިހާލް މަރާލި މައްސަލަ ތަހުގީގު ކުރުމުގެ އިތުރުން އެކަމުގައި އެއްވެސް ފަރާތެއްގެ އިހުމާލެއް އޮތްތޯ ބެލުމަށް ވެސް ތަހުގީގު ކުރަމުންދާ ކަމަށެވެ. އަދި އެ ތަހުގީގުން ފުލުހުން ވެސް އިސްތިސްނާ ނުވާނެ ކަމަށާއި އެކަމުގައި އިހުމާލުވެފައިވާ ހުރިހާ ފަރާތްތަކާ ދެކޮޅަށް ވެސް ފިޔަވަޅު އަޅާނެ ކަމަށް ހުސައިން ވިދާޅުވި އެވެ.
"ޕޮލިސްގެ ޕްރޮފެޝަނަލް ސްޓޭންޑާޑްސްގެ ޓީމެއް މިހާރު ވެއްޖެ ގޮސްފައި. ތަހުގީގު ޓީމެއް މިހާރު ވެއްޖެ އެކޮޅަށް ގޮސްފައި، މި ހުރިިހާ ކަމެއް ނިމުނީމާ އެއަށް ފުރިހަމަ ޖަވާބެއް ދެވޭނީ." ހުސައިން ވިދާޅުވި އެވެ.
ސީޕީ ހުސައިން އެގޮތަށް ވިދާޅުވިއިރު އިބްތިހާލްގެ މަރުގެ މައްސަލައިގައި ޖެންޑާ މިނިސްޓްރީ އާއި ފުލުހުންގެ އިހުމާލު އޮތް ކަމަށް ފެންނާތީ އެ ދެ މުއައްސަސާގެ މައްޗަށް ޖިނާއީ ތަހުގީގެއް ހިންގަން ހިއުމަން ރައިޓްސް ކޮމިޝަންގެ މައްޗަށް ޕްރޮސެކިއުޓާ ޖެނެރަލް މިއަދު ވަނީ އަމުރު ކުރައްވައިފަ އެވެ.