އަނުޝްކާގެ ދިފާއުގައި ސަޕޯޓަރުންނަށް ވިރާތުގެ ރައްދެއް

މަޝްހޫރު ބަތަލާ އަނުޝްކާ ޝަރްމާ އާއި ކްރިކެޓް ކުޅުންތެރިޔާ ވިރާތު ކޯލީގެ ދެ އަހަރުވީ ލޯބީގެ ގުޅުން ވަނީ ޖެނުއަރީ މަހުގެ ތެރޭގައި ނިންމާލާފަ އެވެ.

ބޮލީވުޑްގެ އެހެން ތަރިންނާއި ހިލާފަށް އަނުޝްކާ އާއި ވިރާތް 2014 ވަނަ އަހަރުގެ ތެރޭގައި ރައްޓެހިވި ހިސާބުން ފެށިގެން މިދެތަރިން ވަނީ އެކަކު އަނެކަކު ދެކެ ވާ ލޯބި ހާމަކޮށްފަ އެވެ. އަދި ދެމީހުން ވެސް ވަނީ ލޯބީގެ ގޮތުން ގުޅިގެން އުޅޭކަން މީޑިއާގައި ހާމަކޮށްފަ އެވެ.

ވިރާތް ކުޅޭ މެޗްތައް ބަލަން އަނުޝްކާ ގޮސް އޭނާއަށް ސަޕޯޓްކޮށްފައިވާއިރު، އިންޑިއާ ބަލިވި އެތަކެއް ފަހަރު ސަޕޯޓަރުން ވަނީ އިންޑިއާ ބަލިވުމުގެ ޒިންމާ އަނުޝްކާގެ ބޮލުގައި އަޅުވާފަ އެވެ.

މިދެމީހުން ރުޅިވި ފަހުން އެކަކު އަނެކަކާ ވާހަކަ ދެއްކުން ހުއްޓާލާފައިވާ ކަމުގެ އަޑުތަކެއް އަރާފައިވާއިރު، އެކަކު އަނެކަކު ސޯޝަލް މީޑިއާއިން ވެސް އަންފޮލޯކުރި ވާހަކަތަކެއް ވެސް ވަނީ ދެކެވިފަ އެވެ.

މިހާރު ކުރިއަށްދާ ޓްވެންޓީ20 ކްރިކެޓް ވޯލްޑް ކަޕުގައި ވިރާތު އިންޑިއާގެ ޓީމު ސެމީ ފައިނަލާ ހަމައަށް ގެންދިއުމަށް މޮޅު ކުޅުމެއް ދައްކާފައިވާއިރު، އިންޑިއާގެ މޮޅާއެކު ޓްވިޓާގައި ގިނަ އަދަދެއްގެ ބަޔަކު ވަނީ އަނުޝްކާ އަށް ފާޑުކިޔަން ފަށާފަ އެވެ. އެގޮތުން ޓްވިޓާގައި އަނުޝްކާ އާއި ވިރާތު ރުޅިވިފަހުން ވެސް އިންޑިއާ ކުޅޭ ކޮންމެ މެޗެއްގައި ހުއްޓުމެއްނެތި އަނުޝްކާ އަށް ފާޑުކިޔަމުން އަންނަތީ އެކަމާ ހިތްހަމަނުޖެހިގެން ސަޕޯޓަރުންނަށް ވަރުގަދަ ރައްދެއްދީފަ އެވެ.

އަނުޝްކާއަށް ސޯޝަލް މީޑިއާގައި ފާޑުކިޔާމުން ދިޔަ ފަރާތްތަކާއި ދެކޮޅަށް ތެދުވެ ވިރާތް އަނުޝްކާ އަށް ތާއިދުކޮށް ވަނީ ޓްވީޓެއް ކޮށްފަ އެވެ.

އަނުޝްކާ އަށް ފާޑުކިޔަމުން އައި ފަރާތްތަކަށް ރައްދުދެމުން ވިރާތް ވަނީ މެދުކެނޑުމެއްނެތި އަނުޝްކާއާ ޖައްސާލައިގެން އުޅޭ މީހުން ލަދުގަންނަން ޖެހޭނެ ކަމަށާއި އަނެކާއާ ދޭތެރޭ ކޮންމެވެސް ވަރެއްގެ ހަމްދަރުދީއެއް ވެސް ވާންޖެހޭނެ ކަމަށެވެ. އަދި އަނުޝްކާ އޭނާއަށް އަބަދުވެސް އޭނާގެ އުންމީދު އާލާކޮށްދީނީ ކަމަށް ބުނެފަ އެވެ.

މީގެކުރިން ވިރާތް އާއި އަނުޝްކާ ލޯބީގެ ގޮތުން ގުޅިގެން އުޅުނުއިރު، ވޯލްޑް ކަޕް ސެމީ ފައިނަލްގައި އިންޑިއާ ބަލިވުމުން އެކަމުގެ ޒިންމާ އަނުޝްކާ ނަގަން ޖެހޭނެ ކަމަށް ބުނެ ސަޕޯޓަރުން އަނުޝްކާއާ ސޯޝަލް މީޑިއާގައި ދިމާކޮށްފަ އެވެ. ނަމަވެސް އޭރު އަނުޝްކާގެ ދިފާއުގައި ވިރާތް އެއްވެސް ބަހެއްވެސް ބުނެފައިނުވާއިރު، ކުއްލިއަކަށް މިދެމީހުން ރުޅިވިފަހުން އަނުޝްކާގެ ދިފާއުގައި ވިރާތު ނިކުތުމުން ގިނަ ބަޔަކު ވަނީ އެކަމާ ގުޅޭގޮތުން ސުވާލު އުފައްދާފަ އެވެ.

އަނުޝްކާ މިހާރު އަންނަނީ ސަލްމާން ޚާން އާއެކު "ސުލްތާން"ގެ މަންޒަރުތައް ނަގަމުންނެވެ. މިފިލްމުގައި އަނުޝްކާ ރެސްލިންތަޅާ މީހެއްގެ ރޯލު ކުޅޭއިރު އޭނާ އަންނަނީ ވަރަށް ބުރަކޮށް ރެސްލިންތަޅާ މީހެއްގެ ގޮތަށް ހަށިގަނޑު ބައްޓަންކޮށް، ރެސްލިންތަޅަން ދަސްކުރަމުންނެވެ.

ވިރާތު އާއި ރުޅިވިފަހުން އަނުޝްކާ އޭނާ މަތިން ހަނދާން ނައްތާލައި އޭނާގެ ހުރިހާ ވަގުތެއް "ސުލްތާން" ފިލްމަށް ހުސްކޮށްފައިވާއިރު، ވިރާތް އަންނަނީ އަނުޝްކާ ރުއްސޭނެ ގޮތެއް ހޯދަމުންނެވެ.

ވިރާތް އާއި އަނުޝްކާ ރުޅިވެފައިވަނީ އޭނާ ވީހާވެސް އަވަހަކަށް އަނުޝްކާއާ ކައިވެނިކުރަން ބޭނުންވި ނަމަވެސް އަނުޝްކާ އޭނާގެ ހުރިހާ ވަގުތެއްވެސް ކެރިއަރަށް ހުސްކުރަން ބޭނުންވުމުންނެވެ. އެގޮތުން 2017 ވަނަ އަހަރު ނިމުމުގެ ކުރިން ކައިވެނި ކުރަން އަނުޝްކާ ދެކޮޅު ހެދިކަމަށްވެ އެވެ.