ބޮލީވުޑްގެ ތަރި ސުޝާންތް ސިންގް ރާޖްޕުތް އާއި ލޯބިވެރިޔާ އަންކިތާ ލޯކަންޑޭ ރުޅިވިކަމުގެ އަޑުތައް އަރާފައިވަނީ މިދިޔަ ހަފްތާގެ ތެރޭގަ އެވެ.
ސުޝާންތު އާއި އަންކިތާގެ ހަ އަހަރުވީ ލޯބީގެ ގުޅުން ނިންމާލީ އަންނަ ޑިސެމްބަރުގެ ތެރޭގައި މި ދެތަރިން ކައިވެނިކުރަން ނިންމާފައިވާ ކަމުގެ ވާހަކަތައް ވެސް ދެކެވިފައި ވަނިކޮށެވެ.
މި ދެތަރިން ދެމެދުގައި މައްސަލަޖެހި ރުޅިވާން ޖެހުނީ އެހެން ބަތަލާއިންނާ ސުޝާންތްއާ ގުޅުން އޮންނަ ކަމަށް އަންކިތާ ޝައްކުކޮށް އޭނާ މާބޮޑަށް ކޮންޓްރޯލް ކުރަން މަސައްކަތްކުރާތީ ކަމަށްވެ އެވެ. އަދި ގިނަ ޓީވީ ސިލްސިލާތަކުން ވެސް އަންކިތާ އަށް ހުށަހެޅުންތައް ލިބުނު ނަމަވެސް ޒުވާން ރޯލުތައް ނޫނީ ނުކުޅޭނެ ކަމަށް ބުނެ އަންކިތާ ގޭގައި އިންނާތީ ވެސް މި ދެމީހުންގެ މެދުގައި ވަނީ މައްސަލަތައް ޖެހިފަ އެވެ.
އަންކިތާ އާއި ސުޝާންތް ރުޅިވި ކަމުގެ ވާހަކަ ދެކެވެން ފަށާފައިވަނީ އިންޑިޔާގައި ފާހަގަކުރާ ހޯލީ ފެސްޓިވަލެއްގައި މީހުންތަކެއްގެ މެދުގައި ހުރެ ސުޝާންތު ނަގާފައިވާ ފޮޓޮއަކާއެކު އޭނާ ކޮށްފައިވާ ޓުވީޓެއްގައި އެންމެންގެ މެދުގައި އެކަނިވެފައި ހުރި ކަމަށާއި "ތި ހުރީ ކޮންތާކުހޭ" ބުނެ ކުރި ޓްވީޓާ ގުޅިގެންނެވެ. ސުޝާންތްގެ ޓްވީޓްގެ ޖަވާބުގެ އަންކިތާ ވަނީ އެކަނިވެރިކަން އިހްސާސް ނުކުރުމަށާއި އޭނާ އަބަދުވެސް ސުޝާންތްގެ ހިތުގައި އޭނާގެ ހަޔާތުގައި ވާނެ ކަމަށް ބުނެފަ އެވެ.
ކޮންމެއަކަސް މިދެތަރިން ރުޅިިވެފައިވާ ކަމުގެ ވާހަކަތައް ދެކެވެން ފެށުމުން ސުޝާންތް ހިންދުސްތާނީ ޓައިމްސް އަށް ފޮނުވި ޓެކްސްޓް މެސެޖެއްގައި ވަނީ އެކަމާ ގުޅޭ ގޮތުން މިވަގުތު ވާހަކަ ދެއްކެން ނެތް ކަމަށާއި އެއީ ހިތްހަމަޖެހޭ އިހްސާސްތަކެއް ނޫން ކަމަށް ބުނެފަ އެވެ.
ނަމަވެސް އަންކިތާ އެންމެފަހުން މިވަނީ އޭނާއާ ސުޝާންތް ރުޅިވިކަމަށް ދެކެވޭ ވާހަކަތަކަކީ އެއްވެސް ތާކުންތާކު ނުޖެހޭ ވާހަކަތަކެއް ކަމަށް ބުނެ އެވާހަކަތައް ދޮގުކޮށްފަ އެވެ. އޭނާއާ ސުޝާންތް ރުޅިވި ކަމަށް ދެކެވޭ ވާހަކަތަކާ ގުޅިގެން އަންކިތާ ވަނީ އެދެމީހުންގެ ހައަހަރުވީ ލޯބީގެ ގުޅުން ނިމިއްޖެ ކަމަށް ބައެއް ފަރާތްތަކުން ދޮގު ވާހަކަތައް ފަތުރަނީ ކީއްވެގެން ކަން ނޭނގޭ ކަމަށް ބުނެފަ އެވެ.
"އަހަރުމުން ރުޅިވެއްޖެ ކަމަށް ދެކެވޭ ވާހަކައަކީ އެއްވެސް ހަގީގަތެއް އެކުލެވޭ ވާހަކައެއް ނޫން. އަހަރެން އަބަދުވެސް ހުންނާނީ ސުޝާންތް އާއެކު. ސުޝާންތް ދެކެ އަހަރެން އިންތިހާއަށް ލޯބިވޭ" އޭނާއާ ލޯބިވެރިޔާއާ ގުޅިގެން ދެކެވޭ ވާހަކަތަކާ މެދު ހިތްހަމަނުޖެހޭ ކަމަށް ބުނަމުން އަންކިތާ ބުނެފައިވެ އެވެ.
އަންކިތާ އިތުރަށް ވަނީ އޭނާއާ ސުޝާންތް ރުޅިވި ހަބަރު ނޫސްތަކުން ފެނުމުން ޑައިރެކްޓަރު ދިނޭޝް ވިޖާންގެ "ރާބްތާ"ގެ ޝޫޓިންގައި ބުޗަރެސްޓްގައި ހުރި ސުޝާންތް އަށް ގުޅުމުން އޭނާއަށް ވެސް އެހަބަރުތަކުން ލިބުނީ ބޮޑު ޝޮކެއް ކަމަށް ބުނެފަ އެވެ.
އެދެމީހުންގެ ދެމެދުގައި އެއްވެސް މައްސަލަ ނުޖެހޭ ކަމަށާއި އަދިވެސް އެމީހުންގެ ދެމެދުގައި އޮތް ގުޅުން ވަރުގަދަކަމާ އެކު އޮތް ކަމަށް ބުނަމުން އަންކިތާ ވަނީ އެމީހުންގެ ކައިވެނިވެސް ކުރިން ޕްލޭންކުރެވިފައި އޮތްގޮތަށް ކުރިއަށްދާނެ ކަމަށެވެ.
ސުޝާންތް އާއި އަންކިތާ ފުރަތަމަ ބައްދަލުވީ 2009 ގައި ޒީޓީވީން ދެއްކަން ފެށި "ޕަވިތުރަ ރިޝްތާ"ގެ ސެޓުންނެވެ.
ސުޝާންތް އާއި އަންކިތާ: ރުލިވި ކަމަށް ދައްކާ ވާހަކަ އަންކިތާ ދޮގުކުރޭ