ރާއްޖޭގެ ފުރަތަމަ ފަހަރަށް އުފެއްދި ރޮމޭންޓިކް ކޮމެޑީ ފިލްމް "ވާށޭ މަށާ އެކީ" ރޭ އޮލިމްޕަހުގައި ރިލީޒްކޮށްފި އެވެ. މިއީ ތަފާތު މަސައްކަތަކަށް ފާހަގަކޮށްލެވޭ ޑާކްރެއިން އެންޓަޓެއިންމެންޓުގެ އަށް ވަނަ ފިލްމެވެ.
ދަރިން ހޯދަން ބޭނުން ނުވާ ޒުވާން ފިރިއަކާއި ކުޑަކުދިން ދެކެ އިންތިހާ އަށް ލޯބިވާ އަންބެއްގެ ވާހަކަ ދައްކުވައިދޭ މި ފިލްމުގައި މައިގަނޑު ދެ ތަރިންގެ ގޮތުގައި ހަރަކާތްތެރިވަނީ ޑާކްރެއިން އެންޓަޓެއިންމެންޓްގެ "އެންމެފަހު ވިންދާ ޖެހެންދެން" އިން ވެސް ފެނިގެންދިޔަ އަދި ކުރިއަރަމުން އަންނަ އުއްމީދީ ދެ ތަރިން ކަމަށްވާ ޖުމައްޔިލް ނިމާލް އާއި މަރިޔަމް މަޖުދާ އެވެ. އަދި މީގެ އިތުރުން މަޝްހޫރު މިއުޒިކް ބޭންޑް ސްކޯސް އޮފް ފްލެއާޒްގެ ލަވަ ކިއުންތެރިޔާ ފުބޫ އާއި ކޮމޭޑިއަން އަހުމަދު ސުނީ އަދި ބޭރުގެ ދެ ބަތަލާ އިން ވެސް ފިލްމުގައި ހިމެނެ އެވެ.
ޑާކްރެއިންގެ މަޝްހޫރު ޕްރޮޑިއުސަރު މުހައްމަދު އަލީ (މޮގާ) ފަހަތުގައި ހުންނެވި މި ފިލްމަށް ސްކްރީން ޕްލޭ ތައްޔާރުކޮށްފައި ވަނީ މަހުދީ އަހުމަދެވެ. އަދި ޑައިރެކްޓްކޮށްފައި ވަނީ އަލީ ޝިފާއު (ޗިއްޕެ) އެވެ. މި ފިލްމު ޝޫޓްކޮށްފައިވަނީ މާލެ، ހުޅުމާލެ އަދި ވިލިނގިލީގަ އެވެ. މި ފިލްމުގައި ހަ ލަވަ ހިމެނޭއިރު އެ ހަ ލަވަ އަކީވެސް އަމިއްލަ ރާގުގެ ލަވަތަކެވެ.
ފިލްމަކީ ރީތި އަދި ބެލުންތެރިންނަށް ކަމުދާނެ ފިލްމަކަށްވާނެ ކަމަށް ޑާކްރެއިން އިން ތަކުރާރުކޮށް ބުނަމުން ގޮސްފައިވާއިރު ރޭ ފިލްމް ބެލި ބައެއް މީހުންވެސް ވަނީ މިކަމާ އެއްބަސްވެ، ފިލްމަށް ނިކަން ގަދަ އަށް ތައުރީފު އޮއްސާލައިފަ އެވެ.
"މި ފިލްމް ވަރަށް ވަރަށް ރީތި. އެންމެ ފަހު ވިންދާ ޖެހެންދެން އަށްވުރެވެސް މާރީތި. އަދިވެސް ބަލައިލަން ބޭނުން" ރޭ ފިލްމް ބަލަން ދިޔަ އަންހެން ކުއްޖަކު ފިލްމާ ބެހޭގޮތުން އަވަސް އާ ވާހަކަ ދައްކަމުން ބުންޏެވެ.
"އެއްވެސް ރީއްޗެއް ނޫން. މީ ހަމަ ކޮޕީއެއް. އެކަމަކު ޖުމައްޔިލް އާއި މަޖޫގެ އެކްޓިން ވަރަށް މޮޅު. އެ ދެމީހުން ވަރަށް ގުޅޭ. އަސްލު ހީކުރި ވަރެއް ނޫން. އެންމެ ފަހު ވިންދާ ޖެހެންދެން މާ ރީތި، ދިވެހި ސޮސައިޓީ އާއި ނުގުޅޭ ބައެއް މަންޒަރުތައްވެސް ހުރި، އެނގޭ އެއީ މިހާރު އާންމު ކަންތައްތަ ކަން. އެކަމަކު ފިލްމަކުން ދައްކުވައިދިނީމަ ރަނގަޅު މެސެޖެއް ނޫން ކަންނޭނގެ އެދެވެނީ" ރޭގައި ފިލްމު ބަލާފައި ނުކުތް މެދުއުމުރުގެ މީހަކު ބުންޏެވެ.
"މުޅި ލައިފްގަވެސް ބެލި އެންމެ ސަޅި ފިލްމު މީ. ވަރަށް ވަރަށް ހަބޭސް. ނޭނގެ ބުނާނެ އެއްޗެއްވެސް. ޖުމަލް އާ މަޖޫގެ އެކްޓިން ހަމަ އޯސަމް. މިހާރުގެ ޔޫއްޕެ އާއި ނިއުމާ އެއީ ހަމަ" ފިލްމަށް ދިޔަ އެހެން މީހަކު ބުންޏެވެ.
"ކަމަކު ނުދޭ. މަ ބެލި ކޮންމެސް ހިންދީ ފިލްމެއްގެ ކޮޕީއެއްހެން ހީވަނީ. އެހާ ކަމަކު ނުދޭ، އެކްޓިން ވެސް މޮޅެއް ނޫން. އަސްލު ވަރަށް ރީތިވާނެ ކަމަށް ހީކޮށްގެން އައީ" މިއީ ވެސް ބެލުންތެރިއެއްގެ ހިޔާލެވެ.
ކޮންމެއަަކަސް ފިލްމަށް މިފަދަ ހިޔާލުތަކެއް އޮހެމުންދާއިރު ފިލްމުގެ ފޯރި އަތޮޅުތަކުގައި ވެސް ބޮޑުކަން ފާހަގަކޮށްލެވެ އެވެ. ފިލްމުގެ ޝޯތައް އަތޮޅުތަކުގެ ތެރޭގައި ފަށާނެ އިރަކަަށް އިންތިޒާރުކުރަމުން އަންނައިރު އޮލިމްޕަހުގައި ކުރިއަށް އޮތް މި ފިލްމުގެ ތިން ޝޯ ހައުސްފުލްވެފައިވާކަން ވެސް ފާހަގަކޮށްލެވެ އެވެ.