މިއަހަރުގައި އެންމެ ގިނަ ބަޔަކު އިންތިޒާރުކުރާ ފިލްމުތަކުގެ ތެރެއިން ހިމެނޭ "ސަރްބްޖިތް"ގެ ޓްރެއިލާ އިއްޔެ މިވަނީ އާންމުކޮށްފަ އެވެ.
މިފިލްމަށް ގިނަބަޔަކު އިންތިޒާރު ކުރަމުން އަންނަނީ މިއީ ހަގީގީ ހާދިސާއަކަށް ވުމުންނެވެ. މިފިލްމުގައި ޓްރެއިލާއިން ޕާކިސްތާނުގެ ޖަލަށްލައި ވަރަށް އަނިޔާވެރިކޮށް ގެންގުޅެމުން ދަނިކޮށް މަރުވި ބޭބެއަށް ޕާކިސްތާނުގެ ޖަލުން ނެރޭތޯ ކުރާ އާދޭހާ، ބޭބެއަށް އިންސާފު ހޯދައިދޭން ކުރާ މަސައްކަތް ފެނިގެންދެ އެވެ.
"ސަރްބްޖިތް"ގެ ޓްރެއިލާ:
ގާތްގަނޑަކަށް ތިން މިނިޓުގެ މިޓްރެއިލާ ފެށިގެންދަނީ ވަރަށް އުފާވެރިކޮށް އުޅޭ އާއިލާ އެކެވެ. އިންތިހާއަށް އެކަކު އަނެކަކު ދެކެ ލޯބިވާ ދެބެއިންނެވެ. ދަނޑުވެރިއެއްގެ ގޮތުގައި އުޅޭ ބޭބެ (ސަރްބްޖިތް ސިންގް)އަށް އޮޅިގެން ޕާކިސްތާނުގެ ބޯޑަރު ހުރަސްކުރެވި، އޭނާ އަކީ އިންޑިއާއިން ޕާކިސްތާނަށް ޖާސުސްކުރަން ފޮނުވި މީހެއް ކަމަށް ބުނެ 23 އަހަރު ވަންދެން ވަރަށް އަނިޔާވެރިކޮށް ޕާކިސްތާނުގެ ޖަލުގައި ގެންގުޅޭތަން ފެނިގެންދެ އެވެ.
ތޭވީސް އަހަރުވަންދެން ޖަލުގައި އަނިޔާވެރިކޮށް ގެންގުޅެނިކޮށް، ޖަލުގެ ބައެއް ގައިދީން އޭނާގެ ގައިގައި ތަޅައި ލިބުނު އަނިޔާތަކުގައި މަރުވުމުން ބޭބެއަށް އިންސާފު ހޯދައިދޭން ދައްތަ (އައިޝްވާރިޔާ ރާއީ) ކުރާ މަސައްކަތްތައް ފެނިގެންދެ އެވެ.
އައިޝްވާރިޔާގެ މޮޅު ޕާފޯމަންސުން އޭނާ ވަނީ ބެލުންތެރިންގެ ހިތްއަތުލާފަ އެވެ. މޮޅަށް އެކްޓްކުރަން އައިޝްވާރިޔާ އަށް ނޭނގޭ ކަމަށް ބުނާ މީހުންގެ އަނގަ ބަންދުކޮށްލާ ވަރުގެ އެކްޓިންއެއް އޭނާގެ ކިބައިން ފެނިގެންދެ އެވެ.
ސަރްބަޖިތްގެ ރޯލުން ފެނިގެންދާ ރަންދީޕު ހޫޑާގެ ކިބައިން ވެސް ފެނިގެން ގޮސްފައިވަނީ ތައުރީފު ހައްގު މޮޅު އެކްޓިން އެކެވެ. އޭނާ ވަނީ މިފިލްމުގައި ޖަލުގައި ގިނަ ދުވަސްވަންދެން އުޅުމުގެ ސަބަބުން އަނަރޫފަވެފައިވާ ރޯލު ކުޅުމަށް ބަރުދަނުން 28 ކިލޯ ހިއްކާލައި ހަށިގަނޑަށް ބޮޑު ބަދަލެއް ގެނެސްފަ އެވެ.
ބޭބެ ޖަލަށްލާފައިވަނިކޮށް އެތަކެއް މަސައްކަތާއި އާދޭހެއް ކޮށްގެން ޖަލު ގޮޅީގައި ބޭބެ އޮންނަނިކޮށް ބައްދަލުކުރުމަށް އައިޝްވާރިޔާ އަށް ލިބޭ ފުރުސަތުގައި އޭނާގެ ގޮތްހުސްވެފައިވާ ހާލުގައި ބޭބެ ޖަލުގައި އަނިޔާވެރިކަމުގައި އެތަކެއް އަހަރު ވޭތުކުރި ފަހުން ވެސް ބޭބެ އަށް އެހީތެރިވާނެ ނުކުޅެދުމޭ ބުނާ ތަނުން ކޮންމެ މީހެއްގެ ލޮލުން ވެސް ކަރުނަ ހިލޭނެ އެވެ. މިއީ އެހާވެސް އަސަރުގަދަ ފިލްމެކެވެ.
ސަރްބްޖިތް ސިންގްގެ ރޯލުން ރަންދީޕު ހޫޑާ ފެނިގެންްދާއިރު، ދަލްބީރް ކޯރުގެ ރޯލުގެ ރޯލުން ފެނިގެންދަނީ އައިޝްވާރިޔާ އެވެ. އަދި ސަރްބްޖިތްގެ އަންހެނުން، ސުކްޕްރީތްގެ ރޯލުން ފެނިގެންދަނި ރިޗާ ޗައްޑާ އެވެ.
އޮމަންގް ކުމާރު ޑައިރެކްޓްކޮށްފައިވާ މިފިލްމު ރިލީޒްކުރުމަށް ހަމަޖެހިފައިވަނީ އަންނަ މަހުގެ 20 ވަނަ ދުވަހު އެވެ.