މަޝްހޫރު ފިލްމު ޑައިރެކްޓަރު ރާޖް ކުމާރު ހިރާނީ ފިލްމީ ތަރި ސަންޖޭ ދަތުގެ ހަޔާތުގެ މައްޗަށް އުފައްދާ ފިލްމުން ރޯލެއް ބަތަލާ ކަންގަނާ ރަނާވަތު އަށް ނުލިބުނު ނަމަވެސް ހިރާނީގެ އެހެން ފިލްމަކުން ކަންގަނާ އަށް ހުށަހެޅުމެއް ލިބިފައިވާ ކަމަށް އޭނާ ބުނެފި އެވެ.
ކޮމޭޑިއަން އެއްގެ ރޯލު ކުޅެން ޖެހޭ މިފިލްމާއި ބެހޭގޮތުން ޑައިރެކްޓަރު ހިރާނީއާ މިހާރު ވާހަކަދައްކަމުން އަންނަ ކަމަށް ކަންގަނާ ވަނީ ބުނެފަ އެވެ.
ސަންޖޭގެ ހަޔާތުގެ މައްޗަށް އުފައްދާ ފިލްމުގައި އޭނާގެ ދެވަނަ އަންހެނުން މާންޔަތާގެ ރޯލު ކުޅުމަށްވެސް ކަންގަނާ އަށް ހުށަހެޅުން ލިބިފައިވާ ކަމަށްވެ އެވެ. ނަމަވެސް ކަންގަނާ ވަނީ އޭނާއަށް އެރޯލުގެ ހުށަހެޅުން ލިބިފައިނުވާ ކަމަށް ބުނެފަ އެވެ.
ބުނެވޭ ގޮތުގައި ކަންގަނާ އަށް ހުށަހެޅުން ލިބިފައިވާ ހިރާނީގެ ފިލްމަކީ ލޯބީގެ ވާހަކައެއްގެ މައްޗަށް ބިނާކޮށް އުފައްދާ ފިލްމެކެވެ. އަދި މިފިލްމުގައި ކަންގަނާ އާއެކު ލީޑްރޯލުން ފެނިގެންދާނީ މަޝްހޫރު ބަތަލެއް ކަމަށްވެ އެވެ.
މިފިލްމުގެ ޝޫޓިން ފެށުމަށް ހަމަޖެހިފައިވަނީ ސަންޖޭގެ ހަޔާތުގެ މައްޗަށް ހިރާނީ އުފައްދާ ފިލްމުގެ ޝޫޓިން ނިމުމުންނެވެ.
މިއަހަރުވެސް ނޭޝަނަލް އެވޯޑު ހޯދާފައިވާ ކަންގަނާ މިހާރު އަންނަނީ ޑައިރެކްޓަރު ވިޝާލް ބަރްދްވާޖްގެ "ރަންގޫން" ގެ މަންޒަރުތައް ނަގަމުންނެވެ.
ކަންގަނާ ރަނާވަތު: ޑައިރެކްޓަރު ހިރާނީގެ ފިލްމަކުން ހުށަހެޅުމެއް ވަނީ ލިބިފައި