ރައީސްކަމުން ދުރުކޮށްފިނަމަ ބްރެޒިލް ސަސްޕެންޑްކޮށްލާނެ ކަމުގެ އިންޒާރު!

ބްރެޒިލްގެ ރައީސް ދިލްމާ ރޫސެފް މަގާމުން ދުރުކުރުމުގެ މަރުހަލާ އިދިކޮޅު ފަރާތްތަކުން ފަށާފައިވާއިރު އެ ފަރާތްތަކަށް ރޫސެފް ވަރުގަދަ އިންޒާރެއް ދެއްވައިފި އެވެ.

ރޫސެފް އިއްޔެ ވިދާޅުވީ، ރައީސްކަމުން ދުރުކޮށްފިނަމަ، ސައުތް އެމެރިކަން ޓްރޭޑް ބްލޮކް މެކަސުއާގައި ބްރެޒިލް ސަސްޕެންޑްކޮށް ދިނުމަށް އެދެމުގެ ފުރުސަތު އެބަ އޮތް ކަމަށާއި އެކަން ކުރައްވާނެ ކަމަށެވެ. މެންބަރު ގައުމެއްގެ އިންތިހާބީ ވެރިކަމެއް ބަދަލުކޮށްފިނަމަ އެކަން ބަލާ ފިޔަވަޅު އެޅުމުގެ ބާރު މެކަސުއާއަށް ލިބެ އެވެ.

"އަހަރެން މަގާމުން ދުރުކުރުމަށް ކުރާ މަސައްކަތުގެ ސަބަބުން ގައުމަށް ބޮޑު ގެއްލުމެއްވާނެ، މެކަސުއާއިން ފިޔަވަޅުތަކެއް އަޅާނެ، ގައުމުގެ އިގްތިސޯދަށް ވެސް އަސަރުކުރާނެ،" ރޫސެފް ވިދާޅުވި އެވެ.

ރޫސެފް ވިދާޅުވީ، އެކަަމަނާ މަގާމުން ދުރުކުރުމަށް ކުރާ މަސައްކަތަކީ ބަގާވާތެއް ކަމަށެވެ.

މަޝްހޫރު އިކޮނޮމިސްޓެއްގެ ގޮތުގައި ބްރެޒިލްގެ ރައީސް ކަމަށް 2011 ވަނަ އަހަރު ވަޑައިގެންނެވި ރޫސެފް އަކީ ބްރެޒިލްގެ ފުރަތަމަ އަންހެން ރައީސެވެ. އެކަމަނާ މަގާމުން ދުރުކުރުމުގެ ކެމްޕޭނެއް ފަށާފައި ވަނީ 2014 ވަނަ އަހަރުގެ ރީއިލެކްޝަންގެ ކެމްޕޭނަށް ދައުލަތުގެ ޚަޒާނާއިން ފައިސާ ހޭދަކުރެއްވި ކަމަށް ކުރާ ތުހުމަތަކާ ގުޅިގެންނެވެ. ނަމަވެސް އެ ތުހުމަތުތައް އެކަމަނާ އިއްޔެ ވެސް ވަނީ ދޮގުކުރައްވާފަ އެވެ. ވިދާޅުވީ އެއްވެސް ގޯސް ކަމެއް ކުރައްވާފައިނުވާނެ ކަމަށެވެ.

މިދިޔަ ހަފުތާގެ ތެރޭގައި ރައީސް ދިލްމާ ރޫސެފް މަގާމުން ވަކިކުރުމުގެ މަރުހަލާ ފެށުމަށް، ގާނޫނު ހަދާ މަޖިލީހުގެ ތިރީ ގެ، ކޮންގްރެސް އިން ފާސްކޮށްފަ އެވެ. ހަ ގަޑިއިރަށް ވުރެ ގިނަ ވަގުތަށް ދިގުދެމިގެން ދިޔަ ހޫނު ބަހުސްތަކާއި ޒުވާބާއި މާރަމާރީއަށް ފަހު، ރޫސެފް މަގާމުން ވަކިކުރުމުގެ ތަހުގީގު ފަށަން ފާސްކޮށްފައި ވަނީ ބޭނުންވި ވޯޓަށް ވުރެ ވެސް މަތިން ވޯޓް ހޯދައިގެންނެވެ. ރޫސަފްއާ އެއްކޮޅަށް 137 މެމްބަރުން ވޯޓް ދެއްވިއިރު އެކަމަނާއާ ދެކޮޅަށް ވޯޓް ދިން މެމްބަރުންގެ އަދަދަކީ 367 އެވެ.

ބްރެޒިލްގެ ކޮންގްރެސް އިން، ފާސްކުރި މޯޝަން ދެން ދާނީ ސެނެޓަށް ނުވަތަ ގާނޫނު ހަދާ މަޖިލީހުގެ މަތީގެއަށެވެ. އެއަށް ފަހު ސެނެޓުން މި މޯޝަން ފާސްކޮށްފި ނަމަ 180 ދުވަހަށް މަގާމާ ދުރަށް ޖެހިވަޑައިގަތުމަށް މަޖުބޫރުވެ އެކަމަނާގެ މައްޗަށް ތަހުގީގެއް ފަށާނެ އެވެ. ސެނެޓުން މި މޯޝަން ފާސްކުރުމާ އެކު އަންނަ މަހުގެ މެދުތެރޭގައި ރޫސެފް މަގާމުން ސަސްޕެންޑްކުރާނެ ކަމަށް ބެލެވެ އެވެ.

ރޫސެފްގެ މައްޗަށް އުފުލޭ ދައުވާ އަކީ ހަގީގަތެއް ކަމަށް ކޯޓުން ހުކުމް ކޮށްފިނަމަ 2018 އާއި ހަމަޔަށް ނައިބު ރައީސް މިޗެލް ޓެމާ ވެރިކަމާއި ހަވާލު ވާނެއެވެ. ނަމަވެސް ބުނެވޭ ގޮތުގައި ޓެމާގެ ޕާޓީ، ބްރެޒީލިއަން ޑިމޮކްރެޓިކް މޫވްމަންޓަކީ ވެސް ރޫސެފްގެ ކޮރަޕްޝަންގެ މައްސަލައިގައި ބައިވެރިވެފައިވާ ޕާޓީއެކެވެ.