އެއާޕޯޓުގައި ޑިއުޓީ ފްރީ ފިހާރައެއް ހަދާނެ ފަރާތެއް ހޯދަނީ

އިބްރާހިމް ނާސިރް އިންޓާނޭޝަނަލް އެއާޕޯޓް (އައިއެންއައިއޭ) ގައި ޑިއުޓީ ފްރީ ފިހާރައެއް ހަދައިދޭނެ ފަރާތެއް ހޯދަން ފަށައިފި އެވެ.

އެއާޕޯޓްސް ކޮމްޕެނީގެ އިއުލާނެއްގައި ބުނެފައި ވަނީ ޑިޕާޗަ ޓާމިނަލުގައި ޑިއުޓީ ފްރީ ފިހާރައެއް ހަދައިދޭން ޝައުގުވެރިވާ ފަރާތްތަކުން އަންނަ މަހު ދެވަނަ ދުވަހުގެ ރަސްމީގަޑި ނިމުމުގެ ކުރިން އެ ކުންފުންޏަށް ސިޓީއަކުން އެދުމަށެވެ. އެ މުއްދަތުގެ ކުރިން ޝައުގުވެރިކަން ފާޅުކުރާ ފަރާތްތައް ރަޖިސްޓަރީ ކުރުމަށްފަހު، އިނގިރޭސިބަހުން ތައްޔާރު ކުރެވިފައިވާ ބީލަންފޮތެއް އެ ފަރާތްތަކަށް އިއުލާން ކުރާނެ ކަމަށެވެ.

ބީލަންތައް ހުށަހެޅުމުގެ ސުންގަޑިއަކީ މެއި 18 ވާ ބުދަ ދުވަހުގެ 2:00 އެވެ. ބީލަންތައް ހުޅުވާނީ އެ ދުވަހު އެމްއޭސީއެލްގެ މައި އޮފީހުގައި ބީލަން ހުށަހަޅާ ފަރާތްތަކުގެ ހާޒިރުގައެވެ.

އެމްއޭސީއެލުން ބުނީ އެ މަސައްކަތް ކުރާނެ ފަރާތެއް ފައިނަލް ކުރާނީ ފަންނީ އަދި މާލީ ދިރާސާއެއް ހެދުމަށްފަހު، ކަމަށެވެ.