ބޮލީވުޑްގެ މަޝްހޫރު ތަރި ރިތިކް ރޯޝަން އާއި އަންހެނުން ސުޒާން ޚާން، އެދެމީހުންގެ 14 އަހަރުވީ ކައިވެނި ނިމުމަކަށް ގެނެސްފައިވަނީ 2014 ވަނަ އަހަރުގެ ފަހުކޮޅު އެވެ.
ރިތިކް އާއި ސުޒާން ވަރިވިފަހުން މިވީހާތަނަށް ވެސް މިދެމީހުން އެކުގައި ބޭރުތެރެއިން ފެނިފައެއް ނުވެ އެވެ. ވަރިވިފަހުން ފުރަތަމަ ފަހަރަށް އިއްޔެ މިދެމީހުން ވަނީ އެމީހުންގެ ހަނގު ފިރިހެން ދަރިފުޅު ރިދާންގެ އަށް ވަނަ އުފަންދުވަސް ފާހަގަކުރުމަށް ބޭއްވި މެންދުރުގެ ކެއުމެއްގައި ބައިވެރިވެފަ އެވެ.
ދެކުދިންނާއި އާއިލާގެ ބައެއް މެމްބަރުންވެސް ބައިވެރިވި މިލަންޗް ނިންމާލުމަށްފަހު ރެސްޓޯރަންޓުން މިދެމީހުންގެ ކުދިންނާއެކު ނިކުމެފައިވަނީ އެކުގަ އެވެ. މިފޮޓޯތަކާއެކު މިދެމީހުން އަލުން ގުޅެނީތޯ ސުވާލުކުރަމުން ދަނިކޮށް ސުޒާން ވަނީ އޭނާއާ ރިތިކް ވަކިވީ އަލުން ގުޅޭ ގޮތަކަށް ނޫންކަމަަށް ބުނެފަ އެވެ.
"ހީކުރުންތައް ހުއްޓާލާ. އަހަންނާއި ރިތިކް އަލުން ނުގުޅޭނަން. ނަމަވެސް އަހަރުމެން ދެމީހުންވެސް އެންމެ ރަނގަޅު މައިންބަފައިންނަށް ވާނަން" ސުޒާން ކުރި ޓްވީޓެއްގައި ބުނެފައިވެ އެވެ.
ރިތިކް އާއި ސުޒާން 2000 ވަނަ އަހަރު ކައިވެނިކުރީ ގިނަ އަހަރުތަކެއް ވަންދެން ލޯބީގެ ގޮތުން ގުޅިގެން އުޅުމަށްފަހު އެވެ. މިދެމީހުން ވަރިވި ގޮތާއި ބެހޭގޮތުން މީޑިއާގައި ތަފާތު ގޮތްގޮތަށް ވާހަކަ ދެކެވެނު ނަމަވެސް މިވީހާ ތަނަށްވެސް އެކަމާ ގުޅޭގޮތުން އެއްވެސް ވާހަކައެއް ދައްކާފައެއްނުވެ އެވެ.
ބަތަލާ ކަންގަނާ ރަނާވަތު އާއި ރިތިކްގެ ދެމެދުގައި އުފެދިގެން އުޅޭ ކޯޅުންގަނޑުގައި، މިދިޔަ ހަފްތާގެ ތެރޭގައި ވަނީ ޕާޓީއެއްގެ ތެރެއިން ރިިތިކާއި ކަންގަނާ އެކަކު އަނެކަކު ގައިގައި ބައްދައިގެން ހުންނަ ފޮޓޯއެއް ސޯޝަލް މީޑިއާގައި ދައުރުވެފަ އެވެ. މިފޮޓޯ ސޯޝަލް މީޑިއާގައި ދައުރުވާން ފެށުމާއެކު ސުޒާން ކުރި ޓްވީޓެއްގައި ވަނީ އެފޮޓޯއަކާއި ފޮޓޯޝޮޕް ކޮށްފައިވާ ފޮޓޯއެއް ކަމަށާއި ދޮގުވާހަކަތަކުގައި މާބޮޑު ބުރަދަން ހުންނަ ކަމަށް ބުނެފަ އެވެ. އަދި އޭނާ އާންމުކުރި ފޮޓޯއަކީ އެކަން ސާބިތުކޮށްދޭން ކުރި ކަމެއް ކަމަށާއި މިމައްސަލައިގައި އޭނާ ސަޕޯޓްކުރާނީ ރިތިކަށް ކަމަށް ބުނެފަ އެވެ.