މިއަހަރުގެ އެންމެ ބޮޑު ކުރިމަތިލުމަކަށް ވާނެ ދެފިލްމު ކަމަށްވާ ސުޕަސްޓާ ޝާހްރުކް ޚާންގެ "ރައީސް" އާއި ސަލްމާން ޚާންގެ "ސުލްތާން" ކުޑަ އީދުގައި ރިލީޒްކުރުމަށް ހަމަޖެހިފައި އޮތް ނަމަވެސް ޝާހްރުކްގެ "ރައީސް" ރިލީޒްކުރުން އަންނަ އަހަރަށް ލަސްކޮށްފި އެވެ.
"ރައީސް" ރިލީޒްކުރުމަށް މިހާރު ހަމަޖެހިފައިވަނީ އަންނަ އަހަރުގެ ޖެނުއަރީ މަހުގެ 26 ވަނަ ދުވަހު އެވެ.
މިފިލްމު ރިލީޒްކުރާ ދުވަސް ލަސްކުރާ ކަމަށް ވާހަކަތައް ދެކެވެމުން އަންނަނިކޮށް އެކަން ޔަގީންކޮށްދެމުން ފިލްމުގެ ދެޕްރޮޑިއުސަރުން ކަމަށްވާ ފަރްހާން އަހްތަރާއި ރިތޭޝް ސިދްވާނީ ނެރުނު ސްޓޭޓްމަންޓެއްގައިވަނީ "ރައީސް" އަކީ ގިނަބަޔަކު އިންތިޒާރުކުރަމުން އައި ފިލްމަކަށް ވެފައި އެފަދަ ފިލްމެއް ރިލީޒްކުރާ ދުވަސް ލަސްކުރުމަކީ ފަސޭހަކަމެއް ނޫންކަމަށް ބުނެފަ އެވެ. އަދި މިފަދަ ބޮޑު ފިލްމެއް ރިލީޒްކުރަން ޖެހޭނީ އެފިލްމަކަށް ބެލުންތެރިންގެ ސަމާލުކަން އެންމެ ބޮދަށް ލިބޭނެ ފަދަ ގޮތަކަށް ކަމަށް ގަބޫލުކުރާ ކަމަށް ވެސް ބުނެފަ އެވެ.
ބުނެވޭ ގޮތުގައި މިދެފިލްމުގެ ކުރިމަތިލުމަކަށް ނުދާން "ރައީސް"ގެ ޕްރޮޑިއުސަރުން ނިންމީ ޝާހްރުކްގެ އެންމެފަހުން ރިލީޒްވި "ދިލްވާލޭ" އާއި ސަންޖޭ ލީލާ ބަންސާލީގެ "ބާޖީރާއޯ މަސްތާނީ" އާއި އެއްދުވަހެއްގައި ރިލީޒްކޮށް އެފިލްމު ބޮކްސް އޮފީހުގައި ފެއިލް ވެފައިވާތީ ރިސްކެއް ނަގަން ބޭނުންނުވީ އެވެ.
"ރައީސް" ރިލީޒްކުރުން ލަސްކުރުމާއެކު މިއަހަރުގައި ޝާހްރުކްގެ އިތުރު ފިލްމެއް ރިލީޒްއެއް ނުވާނެ އެވެ. މިއަހަރުގައި ރިލީޒްވި ޝާހްރުކްގެ ހަމައެކަނި ފިލްމު "ފޭން" އަށް ވެސް ލިބިގެން ގޮސްފައިވަނީ ފިނި ތަރުހީބެކެވެ.
މިފިލްމުގައި ޝާހްރުކްގެ އިތުރުން މުހިންމު ރޯލުން ޕާކިސްތާނުގެ ބަތަލާ މާހިރާ ޚާން އާއި ނަވާޒުއްދީން ސިއްދީގީ ފެނިގެންދާނެ އެވެ.
