ކުރީގެ ދެ ލޯބިވެރިން ކަމަށްވާ ރަންބީރު ކަޕޫރާއި ކެޓްރީނާ ކައިފް މިހާރު ކުޅެމުން އަންނަ ފިލްމު "ޖައްގާ ޖާސޫސް" އުފައްދަން ފެށިތާ މިހާރު ދެ އަހަރަށް ވުރެން ގިނަ ދުވަސްވީ އެވެ.
އަދިވެސް މި ފިލްމުގެ ބޮޑުބައެއްގެ ޝޫޓިން ނުނިމޭއިރު، ފިލްމުގެ ބަތަލާ ކެޓްރީނާގެ ސަބަބުން ފިލްމުގެ ނުނެގި ހުރި މަންޒަރުތައް ނެގުމަށް ވަނީ ބޮޑު ދަތިތަކާ ކުރިމަތިވެފަ އެވެ.
ކަނޑައެޅިފައިވާ ތާރީހަށް ފިލްމުގެ ޝޫޓިން ނުނިމި ރިލީޒް ކުރުުން ދެ ފަހަރެއްގެ މަތިން ވަނީ ލަސްވެސް ކޮށްފަ އެވެ. މި ފިލްމުގެ ޝޫޓިން މެދުކެނޑިފައި އޮތުމަށްފަހު މިދިޔަ އަހަރުގެ ފަހުކޮޅު އަލުން ޝޫޓްކުރަން ފަށާފައިވާއިރު، އޭރުން ފެށިގެން ކެޓްރީނާ ވަނީ އޭނާގެ ހަށިގަނޑަށް ބޮޑެތި ބަދަލުތަކެއް ގެނެސްފަ އެވެ.
މި އަހަރުގެ ޖެނުއަރީ މަހުގެ ތެރޭގައި ރަންބީރާއި ކެޓްރީނާ ރުޅިވި ފަހުން ބަރުދަނުން ބޮޑުތަނެއް ލުއިކޮށްލައި ހަށިގަނޑުވެސް ވަނީ ކުރިއަށް ވުރެން ލޫޅާފަތި ކޮށްލާފަ އެވެ. ހަށިގަނޑު ވަރަށް ބޮޑަށް ހިއްކާލައި ސިފައަށް ބޮޑު ބަދަލެއް އައިސްފައިވާތީ "ޖައްގާ ޖާސޫސް" ގެ ޑައިރެކްޓަރު އަނޫރާގް ކަޝްޔަޕް ވަނީ ކެޓްރީނާއާ ބައްދަލުކޮށް އެމީހުންގެ ކަންބޮޑުވުން އޭނާއާ ހިއްސާކޮށްފަ އެވެ.
ޖޫން އެކެއްގައި ރިލީޒްކުރާ ގޮތަށް އޮތް މި ފިލްމުގެ މަންޒަރުތަކުގެ ތެރެއިން މޮރޮކޯގައި ނަގަން ޖެހޭ މަންޒަރުތައް ކެޓްރީނާގެ ހަށިގަނޑަށް ގެނައި ބަދަލުގެ ސަބަބުން ވަނީ މަޑުޖެހިފަ އެވެ. ފިލްމު އުފައްދާ ފަރާތުން މިހާރު އަންނަނީ ފިލްމުގެ ކުރިން ނެގިފައިވާ މަންޒަރުތައް އަލުން ޝޫޓްކުރުމާ ގުޅޭގޮތުން ވާހަކަ ދައްކަމުންނެވެ. މި މަންޒަރުތައް އަލުން ނަގަން ޖެހޭނަމަ މިި ފިލްމު ކަނޑައެޅިފައިވާ ތާރީހުގައި މި ފިލްމު ރިލީޒްއެއް ނުކުރެވޭނެ އެވެ.
މީގެއިތުރުންވެސް ރަންބީރާއި ކެޓްރީނާ ރުޅިވިފަހުން މި ދެތަރިންގެ ހިމަނައިގެން ފިލްމުގެ ޝޫޓިން ކުރިއަށް ގެންދަން، ފިލްމުގެ ޓީމަށް އަންނަނީ ބޮޑެތި އުނދަގޫތައް ދިމާވަމުންނެވެ.