ކުރީގެ މަޝްހޫރު އެކްޓަރު ގުލްޝަން ގްރޯވާ ބެލުންތެރިންގެ މެދުގައި މަގުބޫލު ވެގެން ގޮސްފައިވަނީ ނުބައިބައި ރޯލުތައް ކުޅުމަށް ދެވަނައެއް ނެތް އެކްޓަރެއްގެ ގޮތުގަ އެވެ. ގުލްޝަން އަށް ބެލުންތެރިންގެ އެންމެ ބޮޑު މަގުބޫލުކަމެއް ލިބިގެން ގޮސްފައިވަނީ 1989 ވަނަ އަހަރު ނިކުތް "ރާމްލަކަން" ގައި އޭނާ ކުޅުނު ކޭސަރިޔާ ވިލާރަތީ ނުވަތަ ބެޑްމޭންގެ ރޯލުންނެވެ.
ފިލްމު އިންޑަސްޓްރީގައި ވެސް އެންމެ މަޝްހޫރު ބޭޑްމޭންގެ ގޮތުގައި ބެލެވޭ ގުލްޝަން ވަނީ އޭނާ ނޫން އެހެން މީހަކަށް "ރާމްލަކަން" ގެ ބޭޑްމޭން ރޯލު އޭނާއަށް ވުރެން މޮޅަށް ނުކުޅެވޭނެ ކަމަށް ބުނެފަ އެވެ.
ގުލްޝަން މިހެން ބުނެފައިވަނީ ޑައިރެކްޓަރު ރޯހިތު ޝެޓީ "ރާމްލަކަން" ގެ ރީމޭކެއް އުފައްދަން ތައްޔާރުވަމުން އަންނަނިކޮށެވެ. މި ފިލްމުގެ ލީޑްރޯލުން ފެނިގެންދާނީ ޝާހިދު ކަޕޫރާއި ރަންވީރު ސިންގް އެވެ.
މި ފިލްމުގައި އޭނާގެ ރޯލު ކުޅެން އެންމެ އެކަށީގެންވަނީ ކޮން އެކްޓަރެއްތޯ އެހުމުން ގުލްޝަން ވަނީ އެރޯލު ކުޅެވޭނެ ފެންވަރުގެ އެކްޓަރެއް ހުރިކަން ޔަގީން ނޫން ކަމަށާއި އެރޯލަކީ ކުޅެން ވަރަށް އުނދަގޫ ރޯލެއް ކަމަށް ބުނެފަ އެވެ.
"އެއީ ވަރަށް އޮރިޖިނަލް ރޯލެއް. ބޭޑްމޭންގެ ރޯލު ކުޅެވޭނީ އެންމެ މީހަކަށް އެއީ އަހަރެން،" ގުލްޝަން ބުނެފައިވެ އެވެ.
"ރާމްލަކަން" ގައި ރާމްގެ ގޮތުގައި ފެނިގެންގޮސްފައިވަނީ ޖެކީ ޝްރޮފް އެވެ. އަދި ލަކަންގެ ގޮތުގައި ފެނިގެންގޮސްފައިވަނީ އަނިލް ކަޕޫރެވެ.
