މެންޗެސްޓާ ސިޓީ އާއި ބެލްޖިއަމްގެ ކެޕްޓަން ވިންސެންޓް ކޮމްޕެނީ އަށް އަނިޔާވެ ކުރިއަށް އޮތް ޔޫރޯ ފުޓްބޯޅަ މުބާރާތުގައި ނުކުޅެވޭނެކަމަށް އޭނާ ބުނެފި އެވެ.
އުމުރުން މިހާރު 30 އަހަރުގެ ޑިފެންޑަރަށް އަނިޔާވީ ޗެމްޕިއަންސް ލީގުގެ ސެމީ ފައިނަލް ދެ ވަނަ މެޗުގައި ރެއާލް މެޑްރިޑާ ދެކޮޅަށް ކުޅުނު މެޗުގަ އެވެ. އެ މެޗުގެ ފުރަތަމަ 10 މިނިޓަށް ފަހު އޭނާ ވަނީ ދަނޑުން ބާލައިފަ އެވެ.
މިއީ މި ސީޒަނުގައި ކޮމްޕެނީ އަށް ކުރިމަތިވި ފަސް ވަނަ އިންޖަރީ އެވެ. ސީޒަނުގައި ކުޅެންޖެހޭ 57 މެޗުގެ ތެރެއިން އޭނާ އަށް ފުރިހަމަކުރެވިފައިވަނީ ވެސް އެންމެ 22 މެޗެވެ.
ޔޫރޯގައި ނުކުޅެވޭނެކަން ކަށަވަރުކޮށްދެމުން ކޮމްޕެނީ އޭނާގެ ފޭސްބުކް ޕޭޖުގައި ލިޔެފައިވަނީ މިއީ ވަރަށް ދެރަ ހަބަރެއް ކަމަށާއި ނަމަވެސް ހިތްވަރުދޫނުކުރާނެ ކަމަށެވެ. އަދި އަލުން ކުޅުމުގެ ތެރެއަށް އައުމުގެ އުއްމީދު ވެސް ފާޅުކޮށްފައިވެ އެވެ.
"އަހަރެން ޔަގީންނުން ވެސް ދެންވާނީ (ޓީމުގެ) އެންމެ ގާތުގައި ހުންނާނެ ސަޕޯޓަރަށް. މިއީ އަހަރެންގެ ކުށެއްނޫން. އަހަރެން އެނބުރި އައުމަށް މަސައްކަތް ކުރާނަން،" ކޮމްޕެނީ ބުންޏެވެ.
ޔޫރީގައި ބެލްޖިއަމް ހިމެނެނީ އިޓަލީ އާއި ސްވިޑްން އަދި ނޮދަން އަޔަލޭންޑާ އެއްގްރޫޕެއްގަ އެވެ. ކޮމްޕެނީ ނެތުމުން ޓީމުގެ ކެޕްޓަން ބޭންޑް ދިނުން އެންމެ ގާތް އެއްް ކުޅުންތެރިއަކީ ޗެލްސީގެ އެޑެން ހަޒާޑެވެ.
