ސްޕެނިޝް ލަލީގާގެ ތަށި ހޯދުމުގެ ރޭހުން އެތްލެޓިކޯ މެޑްރިޑް ބޭރުވެއްޖެ އެވެ.
މި އަހަރުގެ ޗެމްޕިއަންސް ލީގުގެ ފައިނަލަށް ހޮވިފައިވާ ޓީމު ރޭހުން ބޭރުވީ ޓޭބަލުގެ އެންމެ ފަހަތުގައިވާ ލެވަންޓޭ އަތުން 1-2 އިން ބަލިވުމުންނެވެ.
އެތްލެޓިކޯ ބަލިވުމުން ތަށި ހޯދުމުގެ ފުރުސަތު މިހާރު އޮތީ އެންމެ ފަހުގެ ޗެމްޕިއަން ބާސެލޯނާ އާއި ރެއާލް މެޑްރިޑަށެވެ. ނަމަވެސް ކޮންމެ ޓީމަކަށް ބާކީ އެއްމެޗު އޮތްއިރު ކުރިއަށް އޮތް މެޗު ކާމިޔާބުކޮށްފިނަމަ ޗެމްޕިއަންކަން ލިބޭނީ ބާސެލޯނާ އަށެވެ.
މިވަގުތު ޓޭބަލުގެ އެއްވަނާގައި ބާސެލޯނާ އޮތީ 88 ޕޮއިންޓާއެކުގަ އެވެ. ދެ ވަނާގައި ޗެމްޕިއަންސް ލީގު ފައިނަލުގައި އެތްލެޓިކޯއާ ވާދަކުރަން ހޮވިފައިވާ ރެއާލް އޮތީ 87 ޕޮއިންޓާއެކުގަ އެވެ. އެތްލެޓިކޯ ތިން ވަނާގައިވަނީ 85 ޕޮއިންޓާއެކުގަ އެވެ.
ލަލީގާގައި ރޭ ބާސެލޯނާ މޮޅުވީ އެސްޕަނިޔޯލް އަތުން 5-0 އިންނެވެ. ލަނޑު ޖެހީ ލަޔޮނަލް މެސީ އާއި ލުއިސް ސުއަރޭޒް އަދި ނޭމާ އާއި ރަފީނިއާ އެވެ. މީގެ ތެރެއިން ސުއަރޭޒް ދެ ލަނޑު ޖެހި އެވެ.
ރެއާލް މޮޅުވީ ވެލެންސިއާ އަތުން 3-2 އިންނެވެ. ކްރިސްޓިއާނޯ ރޮނާލްޑޯ ދެ ލަނޑު ޖެހިއިރު އަނެއް ލަނޑު ޖެހީ ކަރީމް ބެންޒެމާ އެވެ. ވެލެންސިއާ އަށް ލަނޑު ޖަހައިދިނީ އަންްދްރޭ ގޯމޭޒް އާއި ރޮގްރިގޯ އެވެ.