އިންޓަނޭޝަނަލް އިސްލާމިކް ލިކުއިޑިޓީ މެނޭޖްމެންޓް (އައިއައިއެލްއެމް) ގެ ބައްދަލުވުމެއްގައި މޯލްޑިވްސް ސެންޓާ ފޯ އިސްލާމިކް ފައިނޭންސް (އެމްސީއައިއެފް) އިން ބައިވެރިވެ ފުރަތަމަ ފަހަރަށް ރާއްޖެ ތަމްސީލުކޮށްފި އެވެ.
އައިއައިއެލްއެމް އަކީ އިސްލާމިކް ފައިނޭންސްގެ ދާއިރާ ހަރުދަނާކޮށް އިސްލާމީ ޝަރީއާގެ އުސޫލްތަކާ އެއްގޮތަށް އިންވެސްޓްމަންޓްތައް އިތުރު ކުރުމަށް މެންބަރު ގައުމުތަކަށް އެހީތެރިވެދޭ ކުންފުންޏެކެވެ. ދުނިޔޭގެ ސެންޓްރަލް ބޭންކުތަކާ މާލީ އިދާރާތަކުގެ އިތުރުން ބައެއް ޖަމްއިއްޔާތައް ގުޅިގެން، 2010 ވަނަ އަހަރު ވުޖޫދަށް ގެނައި އެ ކުންފުނީގެ ތިން ވަނަ "ރައުންޑް ޓޭބަލް އޮން ލިކުއިޑިޓީ މެނޭޖްމަންޓް" ގެ ބައްދަލުވުމުގައި ރާއްޖެ ތަމްސީލުކުރަނީ އެމްސީއައިއެފްގެ ޗެއާމަން އަދި ޑެޕިއުޓީ ފިނޭންސް މިނިސްޓަރު ޑރ. އާއިޝަތު މުނީޒާއެވެ.
މިއަދުގެ ނިޔަލަށް އިންޑޮނޭޝިއާގެ ވެރިރަށް ޖަކާޓާގައި ކުރިއަށްދާ އެ ބައްދަލުވުމުގައި ރާއްޖޭގެ އިސްލާމީ ފައިނޭންސްގެ ދާއިރާގެ މިހާރުގެ ހާލަތާއި ރާއްޖޭގައި ބޭނުންކުރާ އިސްލާމިކް ފައިނޭންސް އިންސްޓްރޫމަންޓްތަކާ ބެހޭގޮތުން މަޝްވަރާކުރާނެ އެވެ. އަދި ބައިނަލްއަގްވާމީ ގޮތުން ލިކުއިޑިޓީ (ފައިސާ) މެނޭޖް ކުރުމަށް ދިމާވެފައިވާ ގޮންޖެހުން ހައްލުކުރުމަށް މަޝްވަރާކުރުން ވެސް އެ ބައްދަލުވުމަށް އެޖެންޑާކޮށްފައި ވެއެވެ.
އިއްޔެ އެ ބައްދަލުވުން ފައްޓަވައިދެއްވީ އައިއައިއެލްއެމްގެ ސީއީއޯ ގެ މަގާމް އަދާކުރައްވާ އެމްސީއައިއެފްގެ ބޯޑް ޑިރެކްޓަރު އަދި މެލޭޝިއާގެ ޕްރޮފެސަރެއް ކަމަށްވާ ރިޕްއަތު އަހުމަދު އަބްދުލް ކަރީމް އެވެ.
އަވަސް އަށް މައުލޫމާތު ދެއްވަމުން ޑރ. މުނީޒާ ވިދާޅުވީ، ރާއްޖެ ފަދައިން އިސްލާމީ ފައިނޭންސްގެ ދާއިރާ ތަރައްގީ ކުރަމުން އަންނަ ގައުމަކަށް އައިއައިއެލްއެމްގެ މަތީ ފެންވަރުގެ ބައްދަލުވުމެއްގައި ބައިވެރިވުމުގެ ފުރުސަތު ލިބުމަކީ ދާއިރާއަށް ލިބޭ ފެހި ސިގްނަލެއް ކަމަށެވެ.
ރާއްޖެއަކީ އައިއައިއެލްއެމްގެ މެންބަރު ގައުމަކަށް ނުވި ނަމަވެސް އެ ބައްދަލުވުމުގައި ރާއްޖެއިން ބައިވެރިވީ އައިއައިއެލްއެމުން ދިން ދައުވަތަކަށެވެ.
މޯލްޑިވްސް ސެންޓަ ފޯ އިސްލާމިކް ފައިނޭންސް އަކީ ރާއްޖޭގައި އިސްލާމިކް ފައިނޭންސް ކުރިއަރުވާ ތަރައްގީކުރުމަށާއި ދެކުނު އޭޝިއާ ސަރަހައްދުގައި އިސްލާމިކް ފައިނޭންސްގެ މަރުކަޒަކަށް ރާއްޖެ ހެދުމުގެ މަގުސަދުގައި، ރައީސުލްޖުމްހޫރިއްޔާ އަބްދުﷲ ޔާމީންގެ ގަރާރެއްގެ ދަށުން މިއަހަރުގެ މާޗް މަހުގެ އުފެއްދި ސެންޓަރެކެވެ. އެ ކުންފުނީގެ ޗެއާޕާސަން އަކަށް ޑރ. މުނީޒާ ހަމަޖައްސާފައިވަނީ މިދިޔަ އަންގާރަ ދުވަހު އެވެ.