މެންޗެސްޓާ ޔުނައިޓެޑުގެ ކޯޗުކަން ހޮސޭ މޮރީނިއޯ އަށް ދޭން އުޅޭތީވެ ޓީމުގެ ބައެއް ކުޅުންތެރިން ހިތްހަމަނުޖެހުން ފާޅުކޮށްފި އެވެ.
ޔުނައިޓެޑުގެ ބައެއް އޮފިޝަލުންނާ ހަވާލާދީފައިވާ އިނގިރޭސި ނޫސްތަކުން ބުނަނީ ސީނިއާ ބައެއް ކުޅުންތެރިން މިހާރު މެނޭޖްމަންޓާ ވެސް ބައްދަލުކޮށްފައިވާ ކަމަށެވެ.
ކުޅުންތެރިން މޮރީނިއޯއާ މެދު ހިތްހަމަ ނުޖެހެނީ މިހާރުގެ ކޯޗު ލުއިސް ވެންހާލް ގެންގުޅުނު ފަދަ ކުޅުންތެރިން ގަބޫލުނުވާ އުސޫލުތަކެއް ގެންގުޅެފާނެތީ އެވެ. އެގެ ތެރޭގައި މާބޮޑަށް ޑިފެންސިވްކޮށް ކުޅުވުމާއި ކުޅުންތެރިންނާ ނުގުޅޭ ސްޓައިލްތައް ހިމެނެ އެވެ. މީގެ އިތުރުން ހަތަރު އަހަރަށްވުރެ ގިނަ ދުވަހު އޭނާ އެކުލަބުގެ ކޯޗަށް ހުރެފާނެ ކަމާމެދު ވެސް ސުވާލުތައް އުފެދިފައިވާ ކަމަށްވެ އެވެ. އިނގިރޭސި މީޑިޔާއިން ބުނާގޮތުގައި ޔުނައިޓެޑުގެ ކުޅުންތެރިން ބޭނުންވަނީ އެޓޭކަށް އިސްކަންދޭ ކޯޗެކެވެ.
މޮރީނިއޯ އަކީ އެޓޭކިން އަށްވުރެ ބޮޑަށް ޑިފެންސަށް އިސްކަންދޭ ކޯޗެކެވެ. ނަމަވެސް އޭނާ އަކީ ވެންހާލް އަށްވުރެ ކާމިޔާބު ކޯޗެކެވެ. ޔުނައިޓެޑުގެ ކޯޗުކަން އޭނާ އަށް މި ހަފުތާގައި ދޭނެކަން ގާތްގަނޑަށް ކަށަވަރުވެފައިވާއިރު އޭނާ އެންމެ ފަހުން ކޯޗުކޮށްދިނީ ޗެލްސީ އަށެވެ. އެކުލަބުގެ ކުޅުންތެރިންނާއި ބައެއް އޮފިޝަލުންނާ މައްސަލަޖެހި، ނަތީޖާތައް މާބޮޑަށް ގޯސްވުމުން އޭނާ މަގާމުން ވަކިކުރީ މިދިޔަ ސީޒަނުގެ މެދުތެރެއިންނެވެ. ނަމަވެސް އޭނާ އަކީ ޗެލްސީގެ އެންމެ ކާމިޔާބު ކޯޗެވެ.
ޕްރެމިއާ ލީގު ތިން ފަހަރު ހޯދާފައިވާ މޮރީނިއޯ ވަނީ ޕޯޓޯ އާއި އިންޓަމިލާނަށް ޗެމްޕިއަންސް ލީގު ވެސް ކާމިޔާބުކޮށްދފަ އެވެ. އަދި ސްޕޭނުގެ ރެއާލް މެޑްރިޑަށް ސްޕެނިޝް ލީގު އެންމެ ފަހުން ހޯދައިދިނީ ވެސް އޭނާ އެވެ.
ކޯޗު މޮރީނިއޯ (ކ) އާއި ޔުނައިޓެޑުގެ މިހާރިގެ ކޯޗު ލުއިސް ވެންހާލް: ކުޅުންތެރިން ވަނީ މޮރީނިއޯގެ ޝަކުވާ އުފުލާފައި.