ސާކް ފިލްމް ފެސްޓިވަލުގައި ރާއްޖެއިން ބައިވެރިކުރަން ނިންމާފައި މިވަނީ ޑާކްރެއިން އެންޓަޓެއިންމެންޓުގެ ފިލްމު "މިކޮއެ ބައްޕަ ބައެބައެ" އަދި އަލީ ސީޒަންގެ "އަހުޝާމް" އެވެ. "މިކޮއެ ބައްޕަ ބައެބައެ" ބައިވެރި ކުރަން ފިލްމުގެ އެކްޓްރެސް އައިޝަތު ރިޝްމީ އަދި ފިލްމުގެ ޑައިރެކްޓަރު ރަވީ ފާރޫގު ވަނީ ރޭ ސްރީ ލަންކާ އަށް ގޮސްފަ އެވެ.
މި ފެސްޓިވަލް ކުރިއަށް ގެންދާނީ މިމަހު އެކަކުން ހަޔެކަށެވެ. ދެ ފީޗާ ފިލްމުގެ އިތުރަށް މި ފަހަރުގެ ފިލްމް ފެސްޓިވަލްގައި ހައުސިން މިނިސްޓްރީގެ ޑްރާމާ "އެއްފަސް" ވެސް ބައިވެރި ކުރަން ވަނީ ނިންމައިފަ އެވެ.
މިކޮއެ ބައްޕަ ބައެބައެ ގައި ފެނިގެން ދަނީ ހަނދާން ނެތޭ ބަލިޖެހޭ ބައްޕައެއްގެ ކިބައިން މަންމައަކު އޭނާގެ ތުއްތު ތުއްތު ދަރިފުޅު ސަލާމަތްކުރުމަށް ކުރާ މަސައްކަތްތަކެވެ. ފިލްމުގެ ކުރި މަރާނުލާ ނަމަ ބުނެވޭނީ މިހެންނެވެ. އެހެން ނަމަވެސް ފިލްމު ނިމޭއިރު މަންޒަރު ބަދަލުވެގެންދެ އެވެ. މި ފިލްމަކީ ފިލްމުގެ ކޮންމެ ސީން އެއް ބަލަމުންދާއިރު ކުރިއަށް އޮންނަ ސީންގައި ކަންތައް ވާނެ ގޮތް އަންދާޒާކޮށްލަންވެސް ނޭނގޭ ފިލްމެކެވެ.
މިކޮއެ ބައްޕަ ބައެބައެ ރަވީ ޑައިރެކްޓްކޮށްފައިވާއިރު ރަވީގެ "އިނގިލި" އަށް ވަނީ 2014 ވަނަ އަހަރު ބްރޯންޒް މެޑަލް ލިބިފަ އެވެ.
އަދި އަލީ ސީޒަންގެ "އިންސާނާ" އަށް ވެސް މި ފިލްމު ފެސްޓިވަލްގައި އެ ވަނަ ލިބިފައިވެ އެވެ.