ކުރީގެ ނައިބު ރައީސް އަހުމަދު އަދީބު ފިސްތޯލައެއް ގެންގުޅުނު ކަމަށް ބުނާ މައްސަލަ ބައްލަވާ، ކްރިމިނަލް ކޯޓްގެ ފަނޑިޔާރުންގެ ބެންޗް އުވާލައި، އެ ކޯޓް ހިންގުމާ ހަވާލުވެ ހުންނެވި ގާޒީ އަބްދުލްބާރީ ޔޫސުފް އެ މައްސަލަ ބައްލަވަން ފައްޓަވައިފި އެވެ. އެގޮތަށް ހަމަޖެއްސި ސަބަބެއް ނޭނގެ އެވެ.
މި މައްސަލާގައި މިއަދު ހެނދުނު ބޭއްވި އަޑުއެހުމުގައި ގާޒީ ބާރީ ވިދާޅުވީ، މައްސަލައިގެ ބެންޗް އުއްވާލައި، މައްސަލަ އަމިއްލައަށް ބެއްލެވުމަށް ނިންމަވާފައިވާ ކަމަށެވެ.
ގާޒީ ބާރީ ވަނީ މި މައްސަލާގެ ކުރިން ހުށަހަޅާފައިނުވާ ހެކިތަކެއް ވެސް ބަލައިގެންފަ އެވެ. ހެކި ހުށަހަޅަން ލިބުނު ފުރުސަތު ހުށަނާޅާ ހެކިތައް ބަލައިގަތުމުން އަދީބުގެ ވަކީލް މޫސާ ސިރާޖް ވަނީ އެކަން ފާހަގަކުރައްވާފަ އެވެ. އެއަށް ޖަވާބު ދެއްވަމުން ގާޒީ ވިދާޅުވީ، "ބަލައިގަނެ، މިހާރު ކުރިއަށް ގެންދަނީ މި،" ކަމަށެވެ.
މި މައްސަލާގައި މިއަދު ވަނީ ތިން ސިއްރު ހެއްކެއްގެ ހެކި ބަސް ނަގާފަ އެވެ. ތިން މީހުން ވެސް ވަނީ އަދީބު ދިރިއުޅުއްވި އެޕާޓްމެންޓުން ފިސްތޯލަ ފެނުނު ކަމަށް ބުނެ އަދީބާ ދެކޮޅަށް ހެކި ބަސް ދީފަ އެވެ.
މައްސަލާގެ ހެކި ބަސް ނެގުން މިއަދު ނިންމާލާފައިވާއިރު، ހުލާސާ ބަޔާން އިއްވުމަށް އަންނަ ހޮނިހިރު ދުވަހު 9:00 އަޑުއެހުމެއް ވަނީ ތާވަލުކޮށްފަ އެވެ. މި މައްސަލާގައި ވަރަށް އަވަހަށް ހުކުމް އިއްވާނެ ކަމަށް ބެލެެވެ އެވެ.
